ءسابيدىڭ اتا-اناسى تىلەپ تاپقان پەرزەنتىنە «باۋىر تسيرروزى» دياگنوزى قويىلعاندا ۇرەيلەنگەنىن جاسىرمادى. بىراق بالاسىنىڭ ەرتەڭ-اق ساۋىعىپ كەتەتىنىنە ىشتەي سەنىپ, تىلەكشى بولدى. سودان ءسابيدىڭ دياگنوزى بەلگىلى بولعان سوڭ, دارىگەرلەر ونى انا مەن بالا ورتالىعىنا اۋىستىرعان. ءسابيدىڭ اتا-اناسى ەلدە الەۋەتى زور ورتالىقتىڭ بارىن ەستىگەن سوڭ, شەتەلدە قارالۋ تۋرالى وي مازالاماعانىن ايتادى. سونىمەن وپەراتسيا قاڭتاردا, «قازاقستان حالقىنا» قورىنىڭ قولداۋىمەن ء«بىر جاسقا دەيىنگى بالالاردىڭ باۋىر ترانسپلانتاتسياسى» تاقىرىبىندا وتكەن مەنتورلىق شەبەرلىك ساباعى اياسىندا ءساتتى جاسالعان. ياعني وپەراتسياعا ورتالىق دارىگەرلەرىمەن قاتار جاپوندىق دارىگەرلەردىڭ دە قوسقان ۇلەسى بار.
– دارىگەرلەر ەمنىڭ ەڭ وڭتايلى ءتۇرى ترانسپلانتاتسيا دەگەن شەشىم قابىلدادى. ارينە, العاشىندا قورقىنىش بولدى, بالامنان ايىرىلىپ قالمايمىن با دەگەن ويلار دا مازالاعان. وپەراتسيانى قاي دارىگەرلەر جاسايدى ەكەن, قالاي بولار ەكەن دەگەن ويلار مازا بەرمەدى. قورىقتىم. دارىگەرلەردىڭ تاجىريبەسىنە, بالامىزدىڭ امان قالاتىنىنا سەنىم بىلدىردىك. جولداسىمنىڭ دونور بولۋعا مۇمكىندىگى بولعان سوڭ, ترانسپلانتاتسياعا بىردەن شەشىم قابىلدادىق. وپەراتسيادان كەيىن, ارقامىزدان جۇك تۇسكەندەي ءبىراز جەڭىلدەپ قالدىق. ورتالىقتىڭ دارىگەرلەرىنە العىس ايتامىن. بارلىعى – تاجىريبەسى تولىسقان, وزىنە سەنىمدى, بىلىكتى ماماندار. بالامىزعا جاقسى كوڭىل ءبولىپ, ۇنەمى احۋالىن ايتىپ, ەسكەرتىپ وتىردى, دەيدى ءسابيدىڭ اناسى.
بالاسىن امان الىپ قالۋدىڭ مۇمكىندىگى بارىن ەستىگەن اكەسى ويلانباستان دونور بولۋعا دايىن ەكەنىن ايتقان. ول «باۋىر ەتى بالاسىنىڭ ءومىرى جايلى سۇراق تۋعاندا كەز كەلگەن اكە قاراپ قالماسى انىق» دەدى.
– البەتتە, دارىگەرلەردەن مەنىڭ دونور بولۋىما بولاتىنىن ەستىگەندە بىردەن كەلىستىم. بويدا مۇلدە قورقىنىش, ۇرەي بولعان جوق. ۇلىمنىڭ اماندىعىن ويلادىم, سونى تىلەدىم. دەگەنمەن مۇنداي جاعدايعا العاش رەت دۋشار بولعاندىقتان ازداپ قوبالجىعانىمىز راس. دارىگەرلەرگە العىس ايتامىن. ۇلىمىزدى امان الىپ قالۋدى ويلاپ, بارىنشا كومەكتەستى, بارلىق ەمشارانى ۋاقىتىمەن جۇرگىزدى. كەيىن وپەراتسيا دا ءساتتى ءوتتى, دەيدى اكەسى تىلەۋبەك.
ونسىز دا كۇردەلى وپەراتسياعا بالانىڭ سالماعى, جاسى اجەپتاۋىر اسەر ەتەتىنى بەلگىلى. بىراق وسى جولعى وپەراتسيادا ءسابيدىڭ تىنىس الۋى قيىنداي باستاعان سوڭ, دارىگەرلەر بارىنشا جەدەل ىسكە كىرىسكەن. ويتكەنى انا مەن بالا ورتالىعىنداعى دارىگەرلەر باۋىر ترانسپلانتاتسياسىن 2015 جىلى باستاپ, كۇنى بۇگىنگە تاجىريبەسىن تولىقتىرۋدان قول ۇزبەگەن. ەسەسىنە, ءوز ءىسىن جەتىك بىلەتىن ماماندار 15 بالاعا باۋىر اۋىستىرۋ وپەراتسياسىن جاساعان. دارىگەرلەر ورتالىقتاعى ون التىنشى باۋىر ترانسپلانتاتسياسىنىڭ دا ءساتتى شىققانىن, قازىر بالا مەن اكەسىنىڭ احۋالى ءتاۋىر ەكەنىن ايتتى.
– قازىر كىشكەنتاي قاھارمانىمىز – ۇيىندە, جاقىندارىنىڭ ورتاسىندا. جاعدايى جاقسى, ءومىر سۇرۋگە بارلىق مۇمكىندىگى بار. اناسىنا وپەراتسيادان كەيىنگى كەزەڭدەگى كۇتىم تۋرالى تۇسىندىردىك. بالانىڭ باۋىرى جۇمىس ىستەپ تۇر, ءوزى تىنىس الادى. تەراپيادان اسقىنۋسىز وتەدى. دونور بولعان بالانىڭ اكەسى دە اۋرۋحانادان شىعارىلدى, دەيدى ورتالىق دارىگەرى زاريپ مۋحامەدوۆ.
نەگىزى, جىل سايىن انا مەن بالا ورتالىعىندا ورتا ەسەپپەن 2-3 باۋىر ترانسپلانتاتسياسى جانە 20 بۇيرەك ترانسپلانتاتسياسى جاسالادى ەكەن. ونىڭ باسىم كوپشىلىگى – تۋىستىق دونوردان. بىراق كەيدە تۋىستارىنىڭ اعزاسى بەلگىلى ءبىر سەبەپتەرمەن بالاعا سايكەس كەلمەيتىن جاعدايلار دا كەزدەسەدى. ارينە, مۇندايدا بالالار مايىتتىك دونور ءۇشىن كۇتۋ پاراعىندا تۇرۋعا ءماجبۇر. مىسالى, قازىردىڭ وزىندە انا مەن بالا ورتالىعىنىڭ كۇتۋ پاراعىندا 18 بالا باۋىر ترانسپلانتاتسياسىنا جانە 30 بالا بۇيرەك ترانسپلانتاتسياسىنا مۇقتاج. ءساتىن سالسا, اتا-انانىڭ ارمان-تىلەگى قابىل بولىپ, بالپاناقتاي بالالارىن تەزىرەك باۋىرىنا باسسا دەپ تىلەيمىز.
