ەلوردا اكىمدىگىنىڭ مالىمەتىنشە, «جاسىل استانا» ءداستۇرلى ەكولوگيالىق ايلىعى 6 مامىرعا دەيىن جالعاسادى. ونىڭ اياسىندا استانادا قالالىق قىزمەتتەردى, ەڭبەك ۇجىمدارىن جانە قالانىڭ بەلسەندى تۇرعىندارىن جۇمىلدىرا وتىرىپ, بىرنەشە كوممۋنالدىق جانە جالپىقالالىق سەنبىلىك وتكىزىلەدى.
ەسكە سالا كەتەيىك, ەكولوگيالىق ايلىق 8 ءساۋىر كۇنى العاشقى كوكتەمگى كوممۋنالدىق سەنبىلىكتە اشىلعان. ەڭبەك ۇجىمدارىنىڭ, قالا تۇرعىندارىنىڭ كۇشىمەن پوليگونعا 555,58 توننا قالدىق شىعارىلدى. جالپى اۋدانى 2,5 ملن شارشى مەتردەن اساتىن ساياباقتار مەن سكۆەرلەردى جيناۋ, اعاش وتىرعىزۋ جۇرگىزىلدى. ءىس-شاراعا اۋداندىق اكىمدىكتەر, كوممۋنالدىق قىزمەتتەر, پيك جانە ميب ۇجىمدارى, شاعىن جانە ورتا بيزنەس سۋبەكتىلەرى بەلسەندى قاتىستى.
ەكىنشى كوممۋنالدىق سەنبىلىك 22 ءساۋىر كۇنى ءوتتى. وعان 3 203 ادام, 222 كاسىپورىن مەن ۇيىم قاتىسىپ, 587 ارنايى تەحنيكا جۇمىلدىرىلدى. پوليگونعا 246,92 توننا قالدىق شىعارىلدى.
29 ساۋىردەگى سەنبىلىك كەزىندە ۇيىمدار مەن كاسىپورىنداردىڭ ۇجىمدارى ءوز اۋماعىندا اعاش وتىرعىزىپ, قوقىس جينايدى, سونداي-اق سۋ ايدىندارى ماڭىن تازارتادى.
