الدىن الا مالىمەت بويىنشا, قالالىق مادەنيەت جانە دەمالىس ساياباعى ماڭىندا ورنالاسقان گاراجدا جارىلىس بولعان. وقيعا ورنىنان ءۇش ادامنىڭ ءمايىتى تابىلعان. قازىر وندا پوليتسيا مەن ءورت سوندىرۋشىلەر جۇمىس ىستەپ جاتىر.
ءورت سالدارىنان يساتاي-ماحامبەت كوشەسى بويىنداعى اباي داڭعىلىنان يحسانوۆ كوشەسىنە دەيىنگى ارالىقتا كولىك قوزعالىسىن جابۋعا تۋرا كەلدى.
باتىس قازاقستان وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى تاراتقان مالىمەتكە قاراعاندا, 30 شارشى مەتر اۋماقتاعى گاراج جانعان, ىشىندە «ۆاز-2121» ورتەنگەن. كەيىنىرەك ءورت 42 شارشى مەترلىك جەكە تۇرعىن ءۇيدىڭ شاتىرىنا جايىلعان. ءورت سوندىرۋشىلەر گاراجدان ءۇش ءمايىتتى تاۋىپ, ءتورت وتتەگى باللونىن شىعاردى.
ءورت 21:31-دە اۋىزدىقتالىپ, 22:02-دە تولىعىمەن سوندىرىلگەن. ءورتتىڭ شىعۋ سەبەبى مەن شىعىنى انىقتالىپ جاتىر. وقيعا ورنىندا باتىس قازاقستان وبلىسى توتەنشە جاعدايلار دەپارتامەنتىنىڭ 23 قىزمەتكەرى مەن 7 تەحنيكا جۇمىس ىستەدى.
