ب ۇلىنگەندى قالپىنا كەلتىرۋ, باردىڭ باعاسىن اسىرۋ, قوعامدى وركەندەتۋ مەن قالالىقتاردىڭ جايلى تۇرمىسىن جاقسارتۋ – جاستاردى ەلجاندىلىققا تاربيەلەۋ ءۇشىن كەرەك دۇنيە. تالدىقورعان قالاسى, گاۋھار انا كوشەسى 110 مەكەنجايىندا ورنالاسقان «جاس تەحنيكتەر ستانساسى» دەپ اتالىپ كەلگەن نىساندا وتكەن رەسپۋبليكالىق ەكوسەنبىلىكتە وسى ۇعىمنىڭ ماڭىزىنا تاعى دا ءبىر مارتە كوز جەتكىزدىك.
اتالعان شارانى «KazEco Patrol» رقب ۇيىمداستىرىپ, ونىڭ جوعارى دەڭگەيدە وتۋىنە تالدىقورعان قالالىق اكىمدىگى, قالالىق تۇرعىن ءۇي-كوممۋنالدىق شارۋاشىلىعى ءبولىمى, «التىن ادام» جەتىسۋ شەبەرلەر» ورتالىعى جانە وقۋشىلار سارايى مەكەمەسىنىڭ قىزمەتكەرلەرى مەن ەكوەرىكتىلەر اتسالىستى. جالپى, سەنبىلىككە 100-دەن اسا ادام قاتىستى.
ايتا كەتەرلىگى, اتالعان نىسان قالانىڭ ورتالىعىندا ورنالاسقانىمەن, 36 جىلدان بەرى قاراۋسىز قالعاندىقتان, ءشوپ باسىپ, قوقىس ءۇيىلىپ, اعاشتارى قۋراپ, جىلىجايلاردىڭ قاڭقاسى قاۋساپ, سۇرقى قاشىپ كەتكەن ەكەن. قىسقاسى, 1970 جىلدارى ىرگەسى قالانىپ, سول تۇستاعى ەكولوگياعا قىزىعاتىن جاستاردىڭ ءجيى كەلەتىن جەرىنە اينالعان ستانسانىڭ بۇگىنگى جاعدايى ايانىشتى. سول كەزدە وسى ورتادان بولاشاق ارمانىن ۇشتاعانداردىڭ ءبىرى بۇگىندە «التىن ادام» جەتىسۋ شەبەرلەرى» ورتالىعىنىڭ ديرەكتورى, ۇلتتىق ونەر مەن ەكولوگيالىق ماسەلەلەرگە ءجىتى نازار اۋدارىپ, تۋريزم سالاسىن وركەندەتۋگە باستاماشى بولىپ جۇرگەن دينارا باكيروۆا وسىدان 40 جىل بۇرىن ءوزى كۋا بولعان جاعدايلارمەن ءبولىستى.
– باستاۋىش سىنىپتا وقىپ جۇرگەندە بۇل ستانساعا ءجيى كەلەتىنبىز. ول كەزدە اۋماقتا نەشە ءتۇرلى اعاش ءوسىپ, سان ءتۇرلى گۇل جايقالىپ تۇراتىن. جىلىجايلاردا وسىمدىكتىڭ سان ءتۇرى ءوسىپ, بالالاردىڭ قىزىعۋشىلىعىن ارتتىراتىن. كەيىن تالدىقورعان وبلىسى الماتى وبلىسىنا قوسىلعان كەزدە بۇل جەر قاراۋسىز قالىپ, مۇلكى تونالىپ, كەزىندەگى بار كوركەمدىك كوزدەن بۇلبۇل ۇشتى. قازىر كورسەڭىز, قوقىس الاڭىنا اينالىپ قالدى دەرسىڭ. بۇل سەنبىلىك «KazEco Patrol» قوزعالىسىنىڭ وبلىستىق فيليالىنىڭ اشىلۋىنا تۇسپا-تۇس قولعا الىندى. ماقساتىمىز – بۇل نىساندى قايتا جاڭعىرتۋ عانا ەمەس, سونىمەن قاتار بالالاردى قورشاعان ورتانى قورعاۋ ىسىنە بەلسەندى قاتىسا الاتىنداي ەتنواۋىل ۇيىمداستىرۋ, – دەپ اتاپ ءوتتى دينارا سەرىكقىزى.
سەنبىلىككە ارنايى كەلىپ قاتىسقان «KazEcoPatrol» رقب جەتەكشىسى تيمۋر ەلەۋسىزوۆ اتالعان شارانىڭ وتۋىنە جانە بولاشاقتىق ماڭىزى بار باستامانى قولداعان وبلىس باسشىلارى مەن قالا اكىمدىگىنە العىسىن ءبىلدىردى. سونداي-اق الداعى ۋاقىتتا دا بىرلەسە جۇمىس اتقارۋعا دايىن ەكەنىن جەتكىزدى.
اۋماقتى تازارتۋ جۇمىسىن قالا اكىمدىگى بەلسەندى قولداپ, جۇمىسشىلار مەن ارنايى تەحنيكانى دا ءبولدى. تراكتورلار, بۋلدوزەر جانە بىرنەشە «كاماز» جانە تاجىريبەلى جۇمىسشىلار كۇنى بويى ەرىكتىلەرمەن بىرگە جۇمىس اتقاردى.
– بۇل نىسان بۇگىندە قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ مەنشىگىندە تۇر. ەندى مۇنى «تالدىقورعان كوركەيتۋ» مەكەمەسىنىڭ قۇزىرىنا تاپسىرامىز. الدىمەن وسى نىساندى تازالاپ, كۇل-قوقىسى شىعارىلىپ, قۋراعان اعاشتار كەسىلىپ, اۋلا رەتتەلگەن سوڭ اعىمدى جوندەۋ جۇمىسى جۇرگىزىلەدى. سول قاتاردا ءتۇرلى اعاش كوشەتى وتىرعىزىلىپ, گۇل ەگىلەدى. قازىر 10 شتات اشىلىپ, قىزمەتكەرلەر الىندى. اعاش كوشەتى مەن گۇل قىستاي وسىندا باپتالىپ, كوكتەمدە قالانىڭ ءار جەرىنە وتىرعىزىلادى. ونى كۇتىپ-باپتاۋ, ءوسىرۋ جۇمىسىنا قالاداعى ەكولوگيالىق باعىتتا جۇمىس ىستەيتىن قوعامدىق بىرلەستىك مۇشەلەرى مەن جاس ەكوەرىكتىلەردى تارتىپ, ولاردىڭ تاجىريبە جيناۋىنا دا كومەكتەسەمىز, – دەيدى تالدىقورعان قالاسى اكىمىنىڭ ورىنباسارى دياس احمەتقاليەۆ.
اكتسياعا قالالىق وقۋشىلار سارايىنىڭ بالالارى دا قاتىستى.
– بۇل شارا جاس ەكوەرىكتىلەردىڭ قورشاعان ورتاعا دەگەن تۇسىنىگىن تەرەڭدەتۋ ءۇشىن وتە ماڭىزدى. ويتكەنى جاستار وزدەرى جاساعان ورتانى ايالاۋدى, قورعاۋدى بۇگىننەن باستاپ ۇيرەگەنى دۇرىس. وقۋشىلار سارايىنىڭ وقۋشىلارى الداعى ۋاقىتتا دا وسىنداي شارالارعا بەلسەنە قاتىسادى, – دەيدى وقۋشىلار سارايىنىڭ ادىسكەرى مەرۋەرت مۇراتقىزى.
ءبىر كۇندە جالپى 80 توننا ءتۇرلى قاتتى قالدىق پەن قوقىس جينالدى. ەندى قوقىستان تازالانعان جەردە كەلەسى كەزەكتە اتقارىلاتىن جۇمىستار باستالماق.
جەتىسۋ وبلىسى
