بىراق ىسكەر ايەل العان بەتىنەن قايتپادى. كاسىپورىندى اياعىنا تۇرعىزىپ, جۇمىسىن جانداندىرا ءتۇستى. بيزنەسىن وركەندەتۋگە اگرارلىق نەسيە كورپوراتسياسىنىڭ جەڭىلدەتىلگەن نەسيەسىنىڭ كومەگى ءتيدى.
قۇس فابريكاسى اتى ايتىپ تۇرعانداي, فەنيكس قۇسى سەكىلدى, 2016 جىلى قايتا قۇرىلدى. قاڭقاسى عانا قالعان عيماراتتى قالپىنا كەلتىرىپ بولعان سوڭ كاسىپورىن باسشىسىنىڭ الدىندا ونى زاماناۋي تەحنيكامەن جابدىقتاۋ ماقساتى تۇردى. بۇعان قوماقتى قاراجات قاجەت ەدى. قارجى كوزىن ىزدەي ءجۇرىپ, فابريكا يەسى اگرارلىق نەسيە كورپوراتسياسىنا جۇگىندى.
«2018 جىلى سول كەزدەگى «اگروەكسپورت» باعدارلاماسىمەن 658 ملن تەڭگە نەسيە راسىمدەپ, نيدەرلاندىدان قۇس وسىرۋگە قاجەتتى زاماناۋي قۇرال-جابدىقتار مەن اۋىل شارۋاشىلىعى تەحنيكاسىن ساتىپ الدىق. بۇل بىزگە ءوندىرىس قۋاتىن ارتتىرۋعا مۇمكىندىك بەردى. جىلىنا 5 مىڭ توننا قۇس ەتىن وندىرەتىن ەدىك. تەحنولوگيانى جاڭارتقالى ەت ءوندىرىسى 7 مىڭ تونناعا دەيىن ارتتى», دەيدى «اۋليە-اتا فەنيكس» جشس ديرەكتورىنىڭ كومەكشىسى ءىلياس دۇيسەن.
قۇس فابريكاسىنىڭ اۋماعى 536 گەكتار جەردى الىپ جاتىر. 18 قۇس ءوسىرۋ قوراسى بار. كاسىپورىندا تاۋىق ەتىنەن 37 ءتۇرلى ءونىم شىعارىلادى. جىلىنا 3 ملن-عا جۋىق قۇس سويىلادى. بالاپاندارعا بيداي مەن جۇگەرى بەرىپ, سالماعىن ەكى كيلوگرامنان اسىرماي باعادى. حالىقارالىق ستاندارت تالابى سولاي. ديرەكتوردىڭ كومەكشىسىنىڭ سوزىنە سەنسەك, «اۋليە-اتا فەنيكس» تاۋىق ەتىمەن تەك ىشكى نارىقتى قامتىپ وتىرعان جوق. بىلتىر كورشىلەس قىرعىز رەسپۋبليكاسى مەن رەسەي فەدەراتسياسىنا ەكسپورتقا 400 توننا ءونىم جونەلتىلگەن. بۇل شامامەن جالپى ءونىمنىڭ بەس پايىزعا جۋىعىن قۇرايدى.
مەملەكەتتىڭ قولداۋى ارقىلى ىشكى نارىق پەن ەكسپورتقا ءونىم شىعارۋدى جولعا قويعاننان كەيىن سەرىكتەستىكتىڭ قارجىلىق جاعدايى وڭالىپ, الەۋەتى ارتا باستادى. ناتيجەسىندە, جۇمىسكەرلەردىڭ دە جاعدايى تۇزەلدى. قازىر قۇس فابريكاسىندا 247 ازامات ەڭبەك ەتىپ ءجۇر. ولاردىڭ باسىم بولىگى – جەرگىلىكتى تۇرعىندار. جۇمىسكەرلەر جالاقىلارىن ۋاقتىلى الىپ وتىر. ولارعا ون ءۇشىنشى جالاقى دا قاراستىرىلعان. ورتاشا جالاقى مولشەرى – 149 مىڭ تەڭگە.
«اۋليە-اتا فەنيكس» قوجايىنى ەندى فابريكانى كەڭەيتۋ ءۇشىن اگرارلىق نەسيە كورپوراتسياسىنان تاعى 1 ملرد تەڭگە نەسيە الۋعا بەكىنىپ وتىر. جاڭا عيمارات سالىپ, شەتەلدەن قۇرال-جابدىق ساتىپ اكەلىپ, قۇس وسىرەتىن قورا سانىن 24-كە جەتكىزبەك.
«قاراجات قولىمىزعا تيسە, تەحنيكالىق بازانى كۇشەيتىپ, قۇس ەتى ءونىمىنىڭ كولەمىن 12 مىڭ تونناعا دەيىن جەتكىزۋدى جوسپارلاپ وتىرمىز. اگرارلىق نەسيە كورپوراتسياسى ارقىلى نەسيە الۋدىڭ ءوز ارتىقشىلىقتارى بار. ماسەلەن, ەكى جىلعا دەيىن نەسيەنى وتەۋدەن بوساتادى. ايتسە دە, ءبىز ءبىر جىل عانا دەمالىس الدىق. بۇل ورتا بيزنەسپەن اينالىسىپ وتىرعان سەرىكتەستىكتەر ءۇشىن وتە قولايلى. ءوز-وزىڭە كەلىپ, شيرىعىپ الۋ ءۇشىن ءبىر جىل ۋاقىت جەتكىلىكتى. ودان كەيىن توقسان سايىن التى پايىزبەن بەرىلگەن نەسيەنى ۋاقتىلى وتەپ وتىراسىڭ», دەيدى «اۋليە-اتا فەنيكس» جشس ديرەكتورىنىڭ كومەكشىسى ءىلياس دۇيسەن.
اگرارلىق نەسيە كورپوراتسياسى ەل بويىنشا 19 قۇس فابريكاسىن 36 ملرد تەڭگەگە قارجىلاندىرعان. جامبىل وبلىسىنداعى فيليالى سوڭعى جىلدارى وڭىردە قۇس فابريكاسى سەكىلدى 6 ءىرى جوباعا 4 ملرد تەڭگە نەسيە بەرگەن. قازىر فيليال اۋىل شارۋاشىلىعى تاۋارلارىن ءوندىرىپ وتىرعان 9 مىڭعا جۋىق كاسىپكەرگە قىزمەت كورسەتىپ وتىر.
جامبىل وبلىسى,
بايزاق اۋدانى,
مىرزاتاي اۋىلى
