بايقاۋعا قاتىسۋعا نيەت بىلدىرگەن ۇمىتكەرلەردىڭ وتىنىشتەرى ءساۋىردىڭ باسىنا دەيىن قابىلدانعان. قازىلار القاسى ىرىكتەۋ كەزەڭىنە قاتىسقان 200-دەن استام ۇمىتكەردىڭ ىشىنەن فينالعا 77 ءانشىنى تاڭداپ الىپتى. ولار جاس ەرەكشەلىكتەرىنە قاراي 7 مەن 23 جاس ارالىعىنداعى ءتورت توپقا ءبولىنىپ ونەر كورسەتەدى.
«التىن ميكروفوننان» ۇمىتكەر ءاربىر ونەرپاز ەسترادا جانرىنىڭ كەز كەلگەن باعىتىنا ءتان ەكى ءان ورىندايدى. قازاقستان انشىلەرى ءبىر ءاندى مىندەتتى تۇردە قازاق تىلىندە ورىنداۋى شارت.
قۇرامىنا ءار ەلدەن كەلگەن بەلگىلى ونەر قايراتكەرلەرى ەنگەن قازىلار القاسىنا قازاقستاننىڭ ەڭبەك سىڭىرگەن قايراتكەرى جەڭىس سەيدوللا ۇلى تورەلىك ەتەدى. بايقاۋدىڭ اشىلۋ سالتاناتىندا قۇتتىقتاۋ ءسوز سويلەپ, ۇمىتكەرلەرگە اق جول تىلەگەن ءانشى: «جيىرما جىلدىق تاريحى بار «التىن ميكروفون» حالىقارالىق بايقاۋى – بۇگىندە قوستاناي ءوڭىرىنىڭ عانا ەمەس, ونەرگە تالابى بار بارشا قازاق ەلىنىڭ دارىندى جاستارىنا داڭعىل جول اشاتىن بىرەگەي جوبا» دەدى.
ۇيىمداستىرۋشىلاردىڭ ايتۋىنشا, بايقاۋدىڭ لاۋرەاتتارى مەن ديپلومانتتارى ارنايى ديپلومدارمەن جانە اقشالاي سىيلىقتارمەن ماراپاتتالادى. باس جۇلدە يەگەرلەرى قازاقستاندا, سونداي-اق ەۋروپا مەن ازيا ەلدەرىندە وتەتىن ءداستۇرلى حالىقارالىق بايقاۋلاردىڭ بىرىنە قاتىسۋ مۇمكىندىگىنە يە بولادى.
قوستاناي وبلىسى
