ەندى پارلامەنت, جاڭادان جاساقتالعان ۇكىمەت, اكىمدەر جانە بارلىق بيلىك ورگاندارى الەۋمەتتىك-ەكونوميكالىق سالاداعى ماسەلەلەردى شەشۋگە بۇرىنعىدان دا باسا ءمان بەرۋى كەرەك. وسىعان وراي مەملەكەت باسشىسى بۇل باعىتتاعى بىرقاتار باسىمدىقتى بەلگىلەپ بەردى. الەۋمەتتىك-ەكونوميكالىق ساياسات, ەڭ الدىمەن, ازاماتتاردىڭ ءومىر ءسۇرۋ ساپاسىن ارتتىرۋعا باعىتتالۋى قاجەت. بۇگىندە بۇل ماسەلەدە ينفلياتسيا باستى كەدەرگى بولىپ وتىر.
سوعان بايلانىستى پرەزيدەنتىمىز ينفلياتسيانىڭ مونەتارلىق جانە مونەتارلىق ەمەس فاكتورلارىنىڭ اسەرىن ازايتۋدى تاپسىردى. بۇل رەتتە كۇندەلىكتى تاۋارلاردىڭ قىمباتتاۋى وزەكتى ماسەلە ەكەنى بەلگىلى. ونىڭ سەبەبىن انىقتاۋ ءۇشىن وندىرىستەن ساتىلىمعا دەيىنگى بارلىق تىزبەكتى جان-جاقتى قاراۋ قاجەت. سونداي-اق مەملەكەت باسشىسى باعانىڭ كۇرت وسۋىمەن كۇرەسۋ ءۇشىن تۇراقتاندىرۋ قورلارىن ءتيىمدى پايدالانۋدى, اۋىل شارۋاشىلىعى ونىمدەرىن ساقتاۋ جانە وتكىزۋ بويىنشا زاماناۋي ينفراقۇرىلىم قۇرۋ جۇمىستارىن جەدەلدەتۋدى تاپسىردى.
جالپى, بارلىق ەكونوميكالىق ساياسات ەكونوميكانى ارتاراپتاندىرۋعا جانە وقشاۋلاۋدى ۇدايى ارتتىرا وتىرىپ وتاندىق ءوندىرىستى دامىتۋعا باسىمدىق بەرۋى قاجەت. پرەزيدەنتىمىز اتاپ وتكەندەي, ەلىمىزدى يندۋستريالاندىرۋ ساياساتى ناقتى ءارى شىنايى جۇرگىزىلۋگە ءتيىس. ول ءۇشىن وتاندىق بانكتەردى ۇلتتىق ەكونوميكا مەن وندىرىستەرگە كرەديت بەرۋگە جۇمىلدىرۋ, بيزنەس پەن ينۆەستيتسيالار ءۇشىن قولايلى جاعدايلار جاساۋ وتە ماڭىزدى.
سونىمەن قاتار ەلىمىزگە الەۋمەتتىك-ەكونوميكالىق دامۋدىڭ نەگىزى بولاتىن جاڭا سالىق ساياساتى كەرەك. ول قوسىلعان قۇنى جوعارى ءونىم وندىرىسىنە سالىناتىن ينۆەستيتسيالاردى قولداۋعا جانە تەحنولوگيالىق ەكسپورتتى ىنتالاندىرۋعا باعىتتالعانى ءجون.
ەكونوميكالىق ءوسۋدىڭ تاعى ءبىر ماڭىزدى شارتى ەنەرگەتيكالىق جانە ينجەنەرلىك ينفراقۇرىلىمدى جاڭعىرتۋ ەكەنى انىق. وسىعان وراي مەملەكەت باسشىسى ۇكىمەتكە «ينۆەستيتسيا ورنىنا تاريف» جاڭا تاريفتىك ساياساتىنا كوشۋدى تاپسىردى.
كەڭەستە پرەزيدەنت اۋىل تۇرعىندارىنىڭ تابىسى مەن تۇرمىس ساپاسىن ارتتىرۋ ماسەلەلەرىن دە ەرەكشە باقىلاۋ كەرەكتىگىن ايتتى. بۇل رەتتە ەكونوميكالىق ساياساتتى ىسكە اسىرۋ جانە ينۆەستيتسيالار تارتۋ ءۇشىن اكىمدەرگە زور جاۋاپكەرشىلىك جۇكتەلەدى.
سونداي-اق جەرگىلىكتى ءوزىن-ءوزى باسقارۋ الەۋەتىن دە ءتيىمدى پايدالانۋ قاجەت. كەڭەسكە وبلىستىق جانە اۋداندىق ءماسليحات توراعالارىنىڭ قاتىسۋى – وسى باعىتتاعى ماڭىزدى قادام.
سەنات – ءبىرىنشى كەزەكتە, وڭىرلەردىڭ مۇددەسىن قورعايتىن پالاتا. سوندىقتان الداعى ۋاقىتتا ماڭىزدى الەۋمەتتىك-ەكونوميكالىق ماسەلەلەردى شەشۋ جانە حالىقتىڭ ءومىر ءسۇرۋ ساپاسىن ارتتىرۋ ءۇشىن ۇكىمەت, اكىمدەر جانە ماسليحاتتارمەن بىرلەسكەن جۇمىسىمىزدى بەلسەندى تۇردە جالعاستىرا بەرەمىز.
ماۋلەن اشىمباەۆ,
سەنات توراعاسى
