مانشۇك يبراەۆا – Yessenov University عىلىم جانە تەحنولوگيالار فاكۋلتەتى جاراتىلىستانۋ عىلىمدارى كافەدراسىنىڭ پروفەسسورى, PhD دوكتورى, عىلىم جولىندا تاجىريبەسىن جەتىلدىرگەن مامان. ونىڭ عىلىمي باعىتى – تابيعي قوسىندىلاردىڭ حيمياسى نەمەسە فيتوحيميالىق زەرتتەۋلەر. باعىتى بويىنشا وسىمدىكتەردىڭ قۇرامىنان دارىلىك زاتتاردى الادى. وسى ۋاقىتقا دەيىنگى جەتىستىگىنىڭ ءبىرى - 2015 جىلى قىتايعا بارىپ, ارتەميزيا وسىمدىگىنىڭ قۇرامىن زەرتتەپ, باكتەرياعا قارسى ءونىم شىعارعان.
ال 2016 جىلى پاكىستانداعى كاراچي ۋنيۆەرسيتەتىندە ۆەرباسكۋم وسىمدىگىنە زەرتتەۋ جۇرگىزگەن. قۇرامىنان بۇرىن الەمدە بولماعان جاڭا ەكى زات الىندى. سول زاتتاردان فيتوپرەپارات دايىنداعان. ول لەيشمانيا اۋرۋىنا قارسى كۇشتى بەلسەندىلىك كورسەتتى. ناتيجەلەرىنىڭ بارلىعى پاتەنتتەلگەن بولاتىن. وسىلايشا SCOPUS بازاسىنا ماتەريالدار شىققان ەدى.
2022 جىلدان باستاپ «جاس عالىم» جوباسى قولعا الىندى. جوبا بويىنشا جىل سايىن 1000 گرانت بولىنەدى. بيىل بۇل جوبا جالعاسۋدا. اقتاۋلىق عالىم مانشۇك يبراەۆانىڭ ايتۋىنشا, قازىر «جاس عالىم» جوباسىنا قاتىسىپ, ناتيجەسىن كۇتۋدە. قازىرگى تاڭدا مانشۇك يبراەۆا ماڭعىستاۋ وسىمدىكتەرىنىڭ قۇرامىن زەرتتەۋ ءۇشىن تاجىريبەلىك-بوتانيكالىق باعىمەن بىرلەسە جۇمىس ىستەۋگە نيەتتى. عالىمنىڭ سوزىنشە, ماڭعىستاۋ - ءاريدتى زونا, وسىمدىكتەرى اششى, باكتەريالاردى ولتىرۋگە جانە ادام اعزاسىنا پايدالى. سوندىقتان الداعى جوسپارى بويىنشا جەرگىلىكتى جەردە وسەتىن وسىمدىكتەردىڭ قۇرامىنا زەرتتەۋ جۇرگىزىپ, جاڭا ناتيجە شىعارماق.
ايتا كەتەيىك, ەلدە 2022 جىلمەن سالىستىرعاندا عالىمداردىڭ سانى ارتۋدا, ونىڭ ىشىندە 40 جاسقا دەيىنگى عالىمداردىڭ ۇلەسى 46%-عا جەتكەن.
