سۋرەتتەردى تۇسىرگەن ەرلان ومار, «EQ»
ماسەلەن, ناۋقاستارعا كۇردەلى وپەراتسيا جاساپ جۇرگەندەردىڭ قاتارىندا اتىراۋلىق دارىگەرلەر دە بار. وبلىستىق اۋرۋحاناداعى گينەكولوگيا بولىمشەسىنىڭ مەڭگەرۋشىسى جانارگۇل بەكەنوۆانىڭ ايتۋىنشا, جىل باسىندا قابىلداۋ بولىمشەسىنە كەلگەن 53 جاستاعى ايەل تۇسكەن.
«سول كەزدە ناۋقاس ىشكى اعزاسىنىڭ اۋىرعانى تۋرالى شاعىم ايتتى. جۇرەگى اينىپ, قۇسقان. اعزاسىندا السىزدىك, باس اينالعانى بايقالدى. جىنىس جولىنان قان كەتكەن. ءبىزدىڭ بولىمشە دارىگەرلەرى ناۋقاستى تولىق تەكسەرۋدەن وتكىزدى. ونىڭ قورىتىندىسىمەن ناۋقاسقا «جاتىردىڭ الىپ ميوماسى. ءتۇيىن نەكروزى, ورتاشا انەميا» دياگنوزى قويىلدى», دەيدى ج.بەكەنوۆا.
ميوما – جاتىردىڭ قاتەرلى ەمەس ىسىگى. بىراق مۇنداي ىسىكپەن ءجۇرۋ قيىندىق تۋدىرادى. ادام اعزاسىنا كەرى اسەرى بار. سول سەبەپتەن بولىمشە مەڭگەرۋشىسىنىڭ جەتەكشىلىگىمەن گينەكولوگ دارىگەرلەر ىنكار ونداسىنوۆا مەن ماقسات تۋعانباەۆ ناۋقاستىڭ جاتىرىنا وپەراتسيا جاساپ, سالماعى 8 كگ ميومانى الىپ تاستاعان.
ال وبلىستىق ونكولوگيا ديسپانسەرىندە قاتەرلى ىسىككە شالدىققان 59 جاستاعى ناۋقاسقا جاسالعان كۇردەلى وپەراتسيا ءساتتى اياقتالدى. ديسپانسەر ديرەكتورى ەلميرا ساپاروۆانىڭ ايتۋىنشا, وپەراتسياعا دەيىن ناۋقاسقا «رەتروپەريتونەۋم ساركوماسى» دياگنوزىن قويىلعان. ونكولوگيا ديسپانسەرىندەگى كۇردەلى وپەراتسيانى حيرۋرگيا ءبولىمىنىڭ مەڭگەرۋشىسى ماقسات شامشەنوۆ پەن وبلىستىق كارديوورتالىقتىڭ قان تامىرلار حيرۋرگى ەرلان مادەشەۆ جاسادى. حيرۋرگتەرگە اسسيستەنتتەر مەرەي قازعاليەۆ پەن ماقسات تۋعانباەۆ, مەيرامگۇل يگىباەۆا, انەستەزيولوگ الياكبار يماماتدينوۆ كومەكتەستى.
«ناۋقاسقا جاسالعان كۇردەلى وپەراتسيا ورتاڭعى لاپاروتوميا دەپ اتالادى. حيرۋرگتەر اناستوموزداردى قويۋ ارقىلى ناۋقاستىڭ دەنەسىنەن بىرنەشە ىسىكتى الىپ تاستاعان. ونىڭ ىشىندە سىرتقى مىقىن ارتەرياسى مەن سول جاقتاعى نەسەپاعاردىڭ تومەنگى ۇشتەن ءبىر بولىگىن رەزەكتسيالاۋ ارقىلى الىنعان ۇلكەن رەتروپەريتونەالدى ىسىكتەر بار. ەڭ ۇلكەن ىسىكتىڭ سالماعى – 15 كگ», دەيدى ە.ساپاروۆا.
اتىراۋ وبلىسى
