ءۇش كۇنگە سوزىلعان عاجايىپ ونەر دوداسى جەتىسۋلىقتاردى عانا ەمەس, ەلىمىزدىڭ تۇكپىر-تۇكپىرىنەن جينالعان تەاتر جاناشىرلارىنا دا ۇلكەن رۋحاني ازىق بولدى. بەكزادا بولمىسىمەن, تۇنىق تابيعاتىمەن, كورەگەندىگى ءھام اقكوكىرەك ادالدىعىمەن, ەرەكشە دارىنىمەن ەل ماحابباتىنا كەنەلىپ, جۇرت شاراپاتىنا بولەنگەن بياپا جايلى ايتار ءسوز كوپ. ەستەلىكتەر دە تۇگەسىلەر ەمەس.
اتالعان ونەر بايگەسىندە بەكزات ونەردىڭ وشاعىن ۇرلەپ, جالىنىن مازداتىپ جۇرگەن جەتىسۋ وبلىسىنداعى «حالىقتىق» اتاعى بار تەاترلار مەن تۇساۋى جاڭا كەسىلگەن جاس ونەر ۇجىمدارى سىنعا ءتۇستى. ۇلاعاتتى تۇلعانىڭ ۇمىتۋعا بولمايتىن ءومىر سوقپاعىن, ونەردە سومداپ كەتكەن ءاز بەينەسىن, «بياپا» دەپ قادىر تۇتقان قازاق كورەرمەندەرىنىڭ ماحابباتى مەن ونەر ۇجىمدارىنىڭ داۋىلپازعا دەگەن قۇرمەتىن فەستيۆال بارىسىندا ايقىن اڭعاردىق.
وبلىستىق مادەنيەت, ارحيۆتەر جانە قۇجاتتاما باسقارماسى مەن وبلىستىق حالىق شىعارماشىلىعى ورتالىعىنىڭ ۇيىمداستىرۋىمەن دۇبىرلەگەن دودادا ايماقتاعى 13 تەاتر ونەر جارىستىردى, ۇزەڭگى قاعىستىردى. ەلىمىزگە تانىمال كينواكتەرلەرى, ب.ريموۆا اتىنداعى تالدىقورعان دراما تەاترىنىڭ مايتالماندارى سەرىك نۇرحالىق, كەندەباي تەمىرباەۆ, ساعىندىق ءجۇمادىل, عاليا تەمىرباەۆا جانە وبلىستىق مادەنيەت, ارحيۆتەر جانە قۇجاتتاما باسقارماسىنىڭ ءبولىم باسشىسى گۇلميرا قالقاباەۆا قازىلىق ەتكەن الامان جوعارى دەڭگەيدە ءوربىدى.
وبلىستىق فيلارمونيا عيماراتىندا وتكەن ماراپاتتاۋ سالتاناتىندا العاشقى بولىپ ءسوز العان وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ مىندەتىن اتقارۋشى گ ۇلىم ابسەيىتوۆا حالقىمىزدىڭ ماڭدايىنا بىتكەن اسىل اپامىزدىڭ تاريحتاعى تۇعىرىن, ايشىقتى ءىزىن اتاپ, سارالاپ ءوتتى. ءوز كەزەگىندە داۋىلپازىن دارىپتەۋ ونەرى وزعان ەلدىڭ عانا قولىنان كەلەر ءىس دەپ تولعاندى.
ونەر باسەكەسىندە, تالانت تارتىسىندا سىنالعان تەاتر ۇجىمدارىن جانە جەكەلەي شىعارماشىلىق ادامدارىن ماراپاتتاۋ سالتاناتىندا العاشقى بولىپ اتالىمدار بويىنشا سىيلىق ۇسىنىلدى. اتاپ ايتساق, «ۇزدىك جاس اكتەر» اتالىمىن تالدىقورعاندىق م.ماقاتاەۆ اتىنداعى پوەتيكالىق «جاس اكتەر» تەاترىنىڭ ونەرپازى الىبەك دانابەك, «ۇزدىك ستسەنوگراف» اتالىمىن تالدىقورعاندىق ارايلىم قالمۇحامبەتوۆا, «ۇزدىك رەجيسسۋرا» اتالىمىن بەلگىلى رەجيسسەر ۇلان احمەتوۆ يەلەندى. سونىمەن قاتار «ۇزدىك ەر ادام بەينەسى» اتالىمىن «جاس ۇلان» جاستار تەاترىنىڭ اكتەرى بەكجان كارىموۆ, «ۇزدىك ايەل ادام بەينەسى» اتالىمىن سارقان اۋداندىق ونەرپازدار تەاترىنىڭ اكتريساسى گاۋھار تۇراليەۆا ەنشىلەدى. اتالعان ازاماتتار 80 مىڭ تەڭگەنىڭ سەرتيفيكاتىن قانجىعالادى.
وزدەرىنىڭ اسەرلى قويىلىمى ارقىلى كورەرمەننىڭ كوڭىل تورىنەن ورىن العان بىرقاتار تەاتر ىنتالاندىرۋ سىيلىعىمەن جانە 100 مىڭ تەڭگەلىك سەرتيفيكاتپەن ماراپاتتالدى. اتاپ ايتساق, م.ماقاتاەۆ اتىنداعى پوەتيكالىق «جاس اكتەر», قاراتال تەاترلارى مەن حالىقتىق اتاعى بار اقسۋ, ءۇشارال, «قۋىرشاق» تەاترلارى ىنتالاندى. ال جارىستىڭ 3-ءشى تۇعىرىنان جاركەنتتىك دانەش راقىشەۆ اتىنداعى حالىق تەاترى مەن تالدىقورعاندىق «جاس ۇلان» جاستار تەاترى كورىنىپ, 250 مىڭ تەڭگەنى ەنشىلەدى. ءوز كەزەگىندە كوكسۋلىق مۇقىرى حالىق تەاترى مەن سارقان اۋداندىق ونەرپازدار تەاترى ءىى ورىن يەگەرى دەپ تانىلىپ, 300 مىڭ تەڭگەگە يە بولدى.
حالىق ەرتەگىسى «قاڭباق شالدى» ساحنالاپ كورەرمەننىڭ ىقىلاسىنا بولەنگەن «Smile Aksu» قۋىرشاق تەاترى مەن س.ءجۇنىسوۆتىڭ «جارالى گۇلدەر» دراماسى ارقىلى جەتىسۋلىقتاردى ءتانتى ەتكەن كۇرەڭبەل تەاترى ءى ورىننان كورىندى. العاشقى تۇعىردان قاتار كەلگەن قوس تەاترعا 400 مىڭ تەڭگەنىڭ سەرتيفيكاتى تابىس ەتىلدى.
«جۇزدەن جۇيرىك, مىڭنان تۇلپار» دەگەندەي, كەرە قارىس ماڭدايىن كەرمە جىبىنە الدىمەن تيگىزگەن «جەتىسۋ مۋزىكالىق جاستار تەاترى» الەكساندر ۆولوديننىڭ «كەزدەسۋ مەن قوشتاسۋ. س ليۋبيمىمي نە راسستاۆايتەس» دراماسىن ساحنالاپ, باس بايگەنى ەنشىلەپ, 500 مىڭ تەڭگەنى قانجىعاعا بوكتەردى.
ماراپاتتاۋ سالتاناتىندا ءسوز العان قازىلار القاسىنىڭ توراعاسى, تەاتر جانە كينواكتەرى سەرىك نۇرحالىق:
«ونەر – ەلگە ورتاق قازىنا, جالپىۇلتتىق قۇندىلىق. بۇگىنگى كۇنى وتكەنىنە سالاۋات ايتىپ, الىپتارىن ارداقتاپ جاتقان ەلدەن باقىتتى مەملەكەت بولماس دەپ ويلايمىز. قازاق اسپانىندا ونەردىڭ شىراعىن جاعىپ, تەاتردىڭ قاسيەتتى ساحناسىنا سانالى عۇمىرىن ارناعان, كينو ونەرى ارقىلى ەل اناسىنىڭ كەيپىن سومداعان بياپانىڭ قۇرمەتىنە وسىلاي بايگە ارناۋدىڭ ءوزى زور مارتەبە. وسىنداي الاماندى جاساعان وبلىستىق مادەنيەت باسقارماسى مەن حالىق شىعارماشىلىق ورتالىعىنا ونەر ادامدارىنىڭ, حالىقتىڭ اتىنان العىس ايتقىم كەلەدى», دەپ تەبىرەندى.
سالتاناتتى جيىن سوڭىندا كوپشىلىك كورەرمەن ءى. جانسۇگىروۆ اتىنداعى جەتىسۋ ۋنيۆەرسيتەتى جانىنان قۇرىلعان «جەتىسۋ مۋزىكالىق جاستار تەاترىنىڭ» ءۇش كۇندىك الامان بايگەسىن ەنشىلەگەن قويىلىمىن تاماشالادى.
جەتىسۋ وبلىسى
