الماتى, ورال, قاراعاندى, ساتباەۆ, استانا, شىمكەنت, قىزىلوردا, اقتوبە, تاراز جانە تۇركىستان قالالارىنان كەلگەن جەڭىمپازدارعا العاشقى كۇنى رومانتيكالىق كەشكى اس, فوتوسەسسيا جانە مادەني باعدارلاما ۇيىمداستىرىلسا, ەرتەڭىنە ولار قالا ماڭىنداعى كيەلى جەرلەرگە زيارات ەتتى. «بيىل رامازان ايىمەن تۇسپا-تۇس كەلىپ وتىرعان «قوزى كورپەش – بايان سۇلۋ كۇنى» قاسيەتتى شاھاردا ەرەكشە فورماتتا اتاپ وتىلۋدە. وسى مەرەكەگە وراي ۇيىمداستىرىلعان «Neke tour» رەسپۋبليكالىق بايقاۋى قوعامنىڭ ەرەكشە قىزىعۋشىلىعىن تۋدىردى. ەل كولەمىندە العاش رەت ۇيىمداستىرىلعان جوباعا 345 جۇپ ءوتىنىم بەرىپ, بايقاۋدىڭ ماڭىزدىلىعىن ارتتىردى. بۇل وتاۋ قۇرعان جۇپتاردىڭ سەنىمدى, ماحابباتتى سەرىك ەتكەن بەرىكتىگى مەن قاسيەتتى تۇركىستانعا دەگەن قۇرمەتى دەپ بىلەمىن», دەگەن تۇركىستان وبلىسى مادەنيەت جانە تۋريزم باسقارماسى باسشىسىنىڭ ورىنباسارى ءادىل قونىسبەكوۆ بايقاۋ جەڭىمپازدارىن ماراپاتتادى.
ەسكە سالا كەتەيىك, اتالعان بايقاۋدى مادەنيەت جانە تۋريزم باسقارماسىنىڭ «Open Turkistan» تۋريستىك-اقپاراتتىق ورتالىعى جاريالاعان بولاتىن. بايقاۋ شارتتارى بويىنشا, 3-9 ءساۋىر ارالىعىندا ەرلى-زايىپتى جۇپتار neke-turkistan.kz پورتالى ارقىلى قاتىسۋعا ونلاين-ءوتىنىم جولداعان. بايقاۋ شارتى بويىنشا جاسى مەن تۇرعان وڭىرىنە قاراماستان ەندى عانا ءۇي بولعان جاس جۇبايلار جانە بۇرىن ۇيلەنگەن ەرلى-زايىپتى جۇپتار قاتىسا الدى. «شاڭىراق», «ماحاببات», «ارۋ» جانە «جانۇيا» اتالىمدارى بويىنشا جەڭىمپازدار انىقتالدى. ال بايقاۋدىڭ باس جۇلدەسى – نەكە قيۋ ءراسىمىن وتكىزۋ ءۇشىن ەلىمىزدىڭ رۋحاني استاناسى تۇركىستانعا رومانتيكالىق ساياحات جاساۋ. «بايقاۋ تۋرالى ءبىلىپ, كوپتەگەن ەرلى-زايىپتى جۇپ قاتىسۋعا ءوتىنىم جىبەرگەنىنە قۋانىشتىمىز. مۇنداي بەلسەندىلىك جاستاردىڭ ءوز حالقىنىڭ مادەني جانە رۋحاني قۇندىلىعىنا دەگەن قۇرمەتى, سول سالت-داستۇرمەن ءومىر سۇرۋگە دەگەن قۇلشىنىسى بايقالادى. نەكە قيۋ ءراسىمىنىڭ قاسيەتتى ءمان-ماعىناسى باياندى ءارى باقىتتى وتباسىلىق ومىرگە جاقسى نەگىز بولادى», دەيدى ۇيىمداستىرۋشىلار.
سونداي-اق بۇل كۇنى وبلىستىق «فاراب» امبەباپ عىلىمي كىتاپحاناسىنىڭ ۇيىمداستىرۋىمەن عاشىقتار كۇنىنە وراي «ماحاببات سەرەناداسى» اتتى پوەزيا كەشى ءوتتى. كەش كەيىپكەرلەرى – جاس اقىندار سىرلى ولەڭدەرىن وقىپ, كورەرمەنگە ليريكالىق كوڭىل-كۇي سىيلادى.
تۇركىستان
