سۋرەتتى تۇسىرگەن دميتري ەروفەەۆ
ەشقانداي قاراجاتسىز تۇرعىن ۇيگە قول جەتكىزگەن تۇرعىندار قۇددى قاسيەتتى ايدا تىلەگى قابىل بولعانداي ءماز-مەيرام. تالدىقورعاندىقتاردىڭ رياسىز قۋانىشى اسپاندى الديلەپ تۇرعانداي. سۋ جاڭا ءۇي ارنايى سولار ءۇشىن سالىنعان. بىردەن 60 وتباسىنا باسپانا كىلتى تابىستالدى. تۇرعىن ءۇيلى بولعانداردىڭ ءبارى – الەۋمەتتىك وسال توپتاعى جەتىسۋلىقتار. ولاردىڭ قاتارىندا 10 بالانىڭ اناسى, مۇمكىندىگى شەكتەۋلى بالا تاربيەلەۋشى, جارىمجان جاندار بار. ءبارى شىنايى, ەشقانداي پافوس جوق.
قۋانىش يەلەرى ەشكىمگە, ەشتەڭەگە شىعىندالمايدى. تەك شىرايلى شاھاردىڭ ورتالىعىنداعى سۋ جاڭا باسپاناعا قونىس اۋدارادى. مەملەكەت باسشىسى ەلىمىزدەگى بيزنەس وكىلدەرىن جيىپ, ەلدىكتى, ەگەمەندىكتى بىرگە اسقاقتاتۋعا بىرلەسە جۇمىس ىستەۋگە, قايىرىمدىلىق جاساۋعا, تۋعان جەردى تۇلەتۋگە, ەل ەكونوميكاسىن وركەندەتۋگە بىرلەسە اتسالىسۋدى ۇسىنعان ەدى. مىنە, سونىڭ جەمىسى تالدىقورعاندا جالعاسىن تاپقانداي.
جاڭادان پايدالانۋعا بەرىلگەن كوپقاباتتى تۇرعىن ءۇيدىڭ جالپى اۋماعى – 4 702 شارشى مەتر. ءوز يەلەرىن تاپقان باسپانانى بەلگىلى اتىمتاي جومارت دانيار ابۋلعازين سالدىرعان. مۇنداي جاڭالىقتى باسپانا كىلتىن تابىستاۋ راسىمىندە الماتى وبلىسىنىڭ بۇرىنعى اكىمى قانات بوزىمباەۆ بايان ەتتى.
– قاسيەتتى رامازان ايىندا قۋانىشتى ءساتتىڭ كۋاسى بولىپ تۇرمىز. باسپانالى بولۋ قانداي باقىت؟! تالدىقورعان قالاسىندا 15 مىڭنان اسا تۇرعىننىڭ باسپاناعا مۇقتاجدىعى بارىن وبلىس اكىمى بولىپ تۇرعاندا بىلەتىنمىن. باسپانا تاپشىلىعىن ازايتۋ ءۇشىن ءتۇرلى جوبا, باستامالار جاساقتالدى. سونىڭ ءبىرى دە بىرەگەيى – ەلدەگى كاسىپكەرلەردىڭ, مىقتى مەتسەناتتاردىڭ كومەگىمەن باسپانا سالىپ, الەۋمەتتىك وسال توپتاردى ۇيمەن قامتۋ. دانيار رۇستەم ۇلىنا تەلەفونمەن حابارلاسىپ, باسپاناعا مۇقتاج جانداردىڭ كوپتىگىن ايتقانمىن. سودان قايىرىمدى ازامات قامسىز قالماي, وسى باسپانانىڭ ىرگەتاسىن قالاپ, بۇگىندە سىزدەرگە سىيعا تارتۋدا. بۇل كوپقاباتتى تۇرعىن ۇيدەن پاتەر العانداردىڭ شاڭىراعى شاتتىققا, قۋانىشقا, باقىتقا تولسىن, – دەدى ق.بوزىمباەۆ.
ارتىنشا ءسوز العان د.ابۋلعازين جەرگىلىكتى اكىمدىككە, «حارەكەت» قايىرىمدىلىق قورىنا, ونىڭ ىشىندە قۇرىلتايشىسى ماديار سەرىكباەۆقا العىسىن ءبىلدىرىپ, قايىرلى ىسكە مەملەكەت باسشىسىنىڭ ءسوزى سەبەپكەر بولعانىن دا جاسىرمادى. قايىرىمدىلىق قورىنا ەرەكشە توقتالۋىنىڭ دا ءجونى بار. سەبەبى «حارەكەتتىكتەر» ءۇي يەلەرىن انىقتاپتى.
مۇنان سوڭ ۇيىمداستىرۋشىلار پاتەر كىلتتەرىن سالتاناتتى تۇردە يەلەرىنە تابىستادى. ولاردىڭ قاتارىندا ەرلان سەرىكباەۆ تا بار. سۋ جاڭا پاتەردىڭ يەسى ەكىنشى توپ مۇگەدەگى ەكەن. قانشا جىلدان بەرى ءۇي كەزەگىندە تۇرعان. وسى ۋاقىتقا دەيىن پاتەر جالداپ تۇرىپ كەلگەن ول كوز جاسىنا دا ەرىك بەردى.
«قاسيەتتى ايدا تىلەگىم دە, ارمانىم دا ورىندالدى. قايىرلى جاندارعا العاۋسىز العىس بىلدىرەمىن. شىنى كەرەك, كوكىرەگىم سايراپ تۇرعانمەن تولقىنىستان سويلەي دە الماي تۇرمىن. باستىسى, وسىنداي رياسىز قۋانىش ءاربىر شاڭىراقتا ورىن السىن», دەدى ە.سەرىكباەۆ.
قايىرلى ءىستىڭ يەلەرى مۇنىمەن توقتاپ قالماپتى. باسپاناعا قول جەتكىزگەندەرگە باسقا دا تارتۋ جاساپتى. ءاربىر پاتەرگە اسۇيلىك جيھاز بەن ىدىس-اياق, ءبىر-ءبىر مۇزداتقىشتى سىي ەتىپتى.
ءىس-شارا بارىسىندا ەل اعالارىنىڭ مۇنداي جومارتتىعىنا رازى بولعان اقمارال دونباەۆا ىستىق ءىلتيپاتىن ءبىلدىردى. 10 بالانىڭ اناسى قايىرىمدى جانداردىڭ مۇنداي قامقورلىعى بۇگىن ءۇشىن ەمەس, بولاشاق ءۇشىن جاسالعان ءورىستى تىرلىك ەكەنىن ءسوز ەتتى.
«بۇگىن ءوزىم ءۇشىن ەمەس, بالالارىم ءۇشىن قۋانىپ وتىرمىن. ءاربىر بالا وڭتايلى ورتادا, جايلى جەردە ءومىر ءسۇرۋى كەرەك. وسى ۋاقىتقا دەيىن پاتەر الۋ ارمان بولدى. قازىر سول تىلەۋىمىز ورىندالىپ وتىر. بالالارىمنىڭ اتىنان, ءوزىمنىڭ اتىمنان ەل اعالارىنا ريزالىعىمدى بىلدىرەمىن. سول كىسىلەردىڭ ارقاسىندا بولاشاقتىڭ 10 تۇلعاسى الاڭسىز ءبىلىم الىپ, جايلى جەردە تۇراتىن بولدى», دەدى ا. دونباەۆا.
ءىس-شارا سوڭىندا پاتەر يەلەرى ەستەلىك سۋرەتكە ءتۇسىپ, رامازان ايىندا رياسىز ريزاشىلىقپەن تارقاستى.
جەتىسۋ وبلىسى
