قازاقستان سىرتقى ىستەر ءمينيسترى ەرلان ىدىرىسوۆ استاناعا رەسمي ساپارمەن تۇڭعىش رەت كەلگەن ەكۆادور سىرتقى ىستەر ءمينيسترى ريكاردو پاتينومەن كەزدەسۋ وتكىزدى, دەپ حابارلادى قر ءسىم-ءىنىڭ ءباسپاسوز قىزمەتى.
ە.ىدىرىسوۆ ەكۆادور سىرتقى ىستەر ءمينيسترىنىڭ ساپارى ەكىجاقتى قاتىناستاردىڭ تاريحىندا العاش رەت جۇزەگە اسىپ وتىرعانىن اتاپ كورسەتىپ, استانا كيتونى لاتىن امەريكاسىنداعى ماڭىزدى ساياسي جانە ەكونوميكالىق سەرىكتەسى رەتىندە قاراستىراتىنىن ايتتى.
تاراپتار ەكىجاقتى, وڭىرلىك, كوپجاقتى ىنتىماقتاستىقتىڭ ءبىرشاما ماسەلەلەرىن, سونىڭ ىشىندە بۇۇ قاۋىپسىزدىك كەڭەسىنە 2017-2018 جىلدارى تۇراقتى ەمەس مۇشەلىگىنە قازاقستاننىڭ كانديداتۋراسىن قولداۋ ماسەلەسىن تالقىلادى. قازاقستان مەن ەكۆادوردى دامۋدىڭ ورتاق باسىمدىقتارى مەن حالىقارالىق ماسەلەلەر بويىنشا ۇستانىمدارىنىڭ جاقىندىعى بىرىكتىرەدى.
قازاقستاندىق سىرتقى ساياسات مەكەمەسىنىڭ باسشىسى اتاپ وتكەندەي, قر ءسىم ازاماتتارىمىز ءۇشىن ۆيزالىق ءتارتىپتى ليبەريزاتسيالاۋ ىسىمەن داعدىلى تۇردە اينالىسادى. وسىعان وراي, سۇحباتتاستار ەكى ەل ازاماتتارىنىڭ ءوزارا ۆيزاسىز ساپارلارى تۋرالى كەلىسىمنىڭ ارادا كۇشىنە ەنۋىنىڭ ماڭىزدىلىعىن اتاپ ءوتتى (2013 جىلدىڭ قىركۇيەك ايىندا قول قويىلعان كەلىسىمنىڭ كۇشىنە ەنۋى ءۇشىن مەملەكەت ىشىندە كەلىسۋ ۇدەرىسىنەن ءوتۋى ءتيىس; قازاقستان تاراپىنىڭ ۇدەرىسى اياقتالعان, ەكۆادور تاراپى جاقىندا اياقتايتىن بولادى).
ەكۆادور قازاقستاننىڭ لاتىن امەريكاسىنداعى ءتورتىنشى ءىرى ساۋدا سەرىكتەسى بولىپ تابىلادى (برازيليا – 377,1 ملن. اقش دولل., مەكسيكا – 121,4 ملن. اقش دولل., ارگەنتينا – 40,1 ملن. اقش دولل. جانە ەكۆادور – 38,9 ملن. اقش دولل.; 2013 جىلدىڭ دەرەكتەرى بويىنشا). 2013 جىلى ەكىجاقتى ساۋدا اينالىمىنىڭ كولەمى 30%-عا ءوستى. «بۇل جامان كورسەتكىش ەمەس, سوندا دا بۇل ىنتىماقتاستىقتى كەڭەيتۋگە ەلەۋلى الەۋەتىمىز بار ەكەنى انىق», دەدى قر ءسىم باسشىسى.
كەلىسسوزدەردىڭ ماڭىزدى قورىتىندىسى ەكى ەلدىڭ جان-جاقتى ىنتىماقتاستىعىنا قوسىمشا ۇلەس قوساتىن ءسىم-ارالىق ساياسي كونسۋلتاتسيالار تۋرالى مەموراندۋمعا قول قويۋ بولىپ تابىلادى.
ءوزىنىڭ رەسمي ساپارى شەڭبەرىندە ەكۆادور سىرتقى ىستەر ءمينيسترى ر.پاتينو قر پارلامەنتى سەناتىنىڭ توراعاسى ق-ج.توقاەۆ, پرەمەر-مينيستر ك.ءماسىموۆ, مۇناي جانە گاز ءمينيسترى ۇ.قارابالين, قورشاعان ورتا جانە سۋ رەسۋرستارى ءمينيسترى ن. قاپپاروۆپەن جانە بىرقاتار مينيسترلىكتەر مەن مەكەمەلەردىڭ باسشىلارىمەن كەزدەستى.
قازاقستان مەن ەكۆادور اراسىنداعى ديپلوماتيالىق قاتىناستار 2012 جىلدىڭ 23 قاڭتارىندا ورناعان.
