وسىدان ءدال 20 جىل بۇرىن ەل استاناسىن اۋىستىرۋ تۋرالى تاريحي شەشىم قابىلدانعان ەدى.
6 شىلدە – ەلوردانىڭ تۋعان كۇنى. 6 شىلدە – ەلباسىنىڭ دا تۋعان كۇنى. ەلوردا مەن ەلباسى ەگىز ۇعىم دەيتىنىمىز سوندىقتان. تۋعان كۇنىڭ قۇتتى بولسىن, اياۋلى ەلوردا! تۋعان كۇنىڭىز قۇتتى بولسىن, ارداقتى ەلباسى!
ەلدىكتىڭ ەڭسەلى سيمۆولى
استانا كۇنىنە وراي مەملەكەتتىك تۋدى كوتەرۋ ءراسىمى وتكىزىلدى
كەشە استانا كۇنى قارساڭىندا «اتامەكەن» ەتنو-مەموريالدىق كەشەنى جانىنداعى مەملەكەتتىك تۋ تىگىلگەن الاڭدا تۇڭعىش پرەزيدەنتتىڭ مەملەكەتتىك تۋدى كوتەرۋ, ەلىمىزدىڭ اسكەري وقۋ ورىندارىنىڭ ۇزدىك بىتىرۋشىلەرىنە وفيتسەرلىك پوگون تابىستاۋ جانە مەرەكەلىك شارالاردى ىسكە قوسۋ سالتاناتتى ءراسىمى بولىپ ءوتتى. مەملەكەتتىك تۋدى سالتاناتتى جاعدايدا كوتەرۋ ءراسىمى –تۇراقتى داستۇرگە اينالعان ۇلگىلى ۇدەرىس. ونىڭ ۇستىنە بۇل استانا مەرەكەسىنىڭ رەسمي باستالۋىنىڭ كورىنىسى دە. قالا تۇرعىندارى مەن قوناقتارىن ەلوردا كۇنىن مەرەكەلەۋگە شاقىرعان اتالعان شارا حاتتامالىق-سالتاناتىمەن قاتار, تاۋەلسىزدىك پەن مەملەكەتشىلدىك يدەياسىن ازاماتتار ساناسىنا سىڭىرەتىن تەرەڭ يدەولوگيالىق ءمانى بارلىعىمەن دە ەرەك. سونداي-اق, ءار جىلى استانا كۇنىن اتاپ ءوتۋ ارقىلى ەلىمىز ءوزىنىڭ جەتىستىكتەرىن پاش ەتىپ, قازاقستاننىڭ جاڭا استاناسى تاريحىنىڭ كەزەكتى باسپالداققا قادام باسقاندىعىنا كۋا بولىپ كەلەدى.
مىنە, وسىنداي ءمانى تەرەڭ شارانى تاماشالاۋعا كەلۋشىلەر بيىل دا اسا كوپتىگىمەن ەرەكشەلەندى. شاعىن عانا الاڭعا سىيماعان استانالىقتار مەن قالا قوناقتارىنىڭ كەيبىرى ايتۋلى شارانى الىستان دا تاماشالاپ تۇردى. اسكەري وركەستردىڭ ويناۋى جانە استاناعا ارنالعان اندەردىڭ شىرقالۋى شارانىڭ سالتاناتىنا ەرەكشە رەڭك بەردى. مۇنىڭ ءوزى ونسىز دا مەرەكەلىك كوڭىل-كۇيدى ودان سايىن ءبىر كوتەرىپ تاستادى. جينالعان قاۋىمنىڭ قولدارىنداعى مەرەكەلىك جالاۋشالاردىڭ جەلبىرەۋى وسىنى انىق اڭعارتتى.
استانالىقتار مەن قالا قوناقتارى تاماشالاۋعا كەلگەن سالتاناتتى راسىمگە مەملەكەتتىك كۇزەت قىزمەتىنىڭ قۇرمەت قاراۋىلى روتاسى, قورعانىس مينيسترلىگىنىڭ قۇرمەت قاراۋىلى روتاسى جانە ىشكى ىستەر مينيسترلىگى ىشكى ءاسكەرلەرىنىڭ ۇلتتىق ۇلانى روتاسى دا قاتىستى. ەلباسى – قارۋلى كۇشتەردىڭ جوعارعى باس قولباسشىسى ن.ءا.نازارباەۆ شارانىڭ باستالۋىنا بىرەر مينۋت قالعاندا كەلدى. جينالعان قاۋىمعا بەت العان ەلباسىن اسكەري وركەستر «ەلىم مەنىڭ» انىمەن, ال جينالعان قاۋىم قولدارىنا ۇستاعان جالاۋشالارىن جوعارى كوتەرۋ ارقىلى ەرەكشە قۇرمەتپەن قوشەمەت كورسەتىپ قارسى الدى.
ءبىر مەزەتتە تىنا قالعان وركەستر مەن جينالعانداردىڭ قوشەمەتتى شۋىنان كەيىن: «پرەزيدەنت مىرزا! قازاقستان رەسپۋبليكاسىنىڭ مەملەكەتتىك تۋىن كوتەرۋ جانە جاس تۇلەكتەرگە لەيتەنانت شەنىن سالتاناتتى تاپسىرۋ راسىمىنە دايىنبىز. قازاقستان رەسپۋبليكاسىنىڭ قۇرمەتتى قاراۋىلىنىڭ باستىعى اعا لەيتەنانت قاسەيىن جاسبولات ۇلى», دەدى جاس وفيتسەر. سودان سوڭ مەملەكەتتىك ءانۇران وينالىپ, مەملەكەتتىك تۋ كوتەرىلدى.
پرەزيدەنت قالا تۇرعىندارى مەن قوناقتارىن استانا كۇنىمەن قۇتتىقتاي وتىرىپ, بارشا قازاقستاندىقتارعا ءوز ءسوزىن ارنادى.
– ءبىزدىڭ بايراعىمىز بىرىككەن ۇلتتار ۇيىمى عيماراتىنىڭ جانىندا, بارلىق ەلدەردەگى ەلشىلىكتەرىمىزدىڭ عيماراتتارىندا جەلبىرەپ تۇر. ول قازاقستان سپورتشىلارىنىڭ حالىقارالىق جارىستارداعى جەڭىستەرىنىڭ قۇرمەتى ءۇشىن دە كوككە كوتەرىلەدى. تۋ – پاتريوتيزم مەن وتانىمىزعا دەگەن ادالدىقتىڭ سيمۆولى, – دەدى نۇرسۇلتان نازارباەۆ.
قازاقستان پرەزيدەنتى استانانىڭ جاس بولسا دا, ەلىمىزدىڭ ەلورداسى رەتىندە ايتارلىقتاي تابىستارعا جەتكەنىنە توقتالدى.
– ەلوردامىز نەبارى 16 جىلدا سۇيىكتى قالامىزعا, بۇكىل ەلىمىزدىڭ ورتالىعىنا اينالدى. حالىقارالىق اۋقىمداعى ماڭىزدى ءىس-شارالاردى وتكىزۋ ارقىلى ول ەندى بۇكىل الەمگە تانىلدى. ەقىۇ سەكىلدى بەدەلدى ۇيىم ءوز ءسامميتىن ءبىزدىڭ ەلوردامىزدا وتكىزۋگە بولادى دەپ ۇيعاردى. مۇندا باسقا دا ەلەۋلى ەكونوميكالىق جانە ساياسي سيپاتتاعى شارالار ءوتتى. استانا ەۋرازيا كەڭىستىگىندەگى ىقپالداستىق ۇدەرىستەردىڭ بەسىگىنە اينالدى, – دەدى مەملەكەت باسشىسى.
قازاقستان پرەزيدەنتى استانا كۇنىنە وراي ءاردايىم جاڭا نىساندار ىسكە قوسىلاتىنىن, سولاردىڭ قاتارىندا بيىل ۇلتتىق مۋزەي, تۇڭعىش پرەزيدەنت كىتاپحاناسى بار ەكەنىن ايتتى.
– شاعىن قالا بولعان اقمولا – بۇگىندە 800 مىڭنان استام ادام تۇراتىن مەگاپوليس. استانا تۇرۋعا جايلى ءارى قولايلى قالا بولىپ قالىپتاسىپ كەلەدى. ەل قازىناسىنا ەداۋىر قاراجات اكەلە باستاعان ەلوردامىز بيۋدجەتتىڭ دونورىنا اينالدى. بيزنەس بەلسەندى دامىپ, يننوۆاتسيالار ەنگىزىلۋدە. استانا, سونداي-اق, ءبىلىم بەرۋ, دەنساۋلىق ساقتاۋ جانە مادەنيەت سالالارىنىڭ ماڭىزدى ورتالىعى بولىپ وتىر. سول سەبەپتى دە ءبىز ءوز ەلوردامىزدى جاقسى كورەمىز جانە ونىمەن ماقتانامىز, – دەدى مەملەكەت باسشىسى.
سالتاناتتى ءراسىم بارىسىندا مەملەكەت باسشىسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى ەلىمىزدىڭ جوعارى اسكەري وقۋ ورىندارىنىڭ تۇلەكتەرىنە وفيتسەرلىك پوگوندار تاپسىردى.
– سىزدەر قارۋلى كۇشتەردىڭ, پوليتسيا مەن وزگە دە قۇقىق قورعاۋ ورگاندارىنىڭ قاتارىندا قىزمەت ەتەتىن بولاسىزدار. يىعىنا پوگون تاققان ازاماتتار ىلعي دا ەلدىڭ كوز الدىندا. سىزدەرگە قاراپ جاستار بوي تۇزەيدى. سىزدەر دايىندىقتان ءوتىپ, ءبىلىم الدىڭىزدار, ەندى وزدەرىڭىز جاڭادان قابىلدانۋشىلارعا تالىمگەر بولاسىزدار. ولارعا ءپاتريوتيزمنىڭ, وتانعا ادالدىقتىڭ ۇلگىسىن, ەرلىك پەن ادام رۋحىنىڭ كوركەمدىگىن كورسەتەسىزدەر دەگەن ۇمىتتەمىن, – دەدى نۇرسۇلتان نازارباەۆ.
سوڭىندا مەملەكەت باسشىسى بارشا جاس وفيتسەرلەردى, ءاسكەري وقۋ ورىندارى تۇلەكتەرىن قۇتتىقتاپ, ولارعا تابىس جانە باق-بەرەكە تىلەدى.
مەملەكەت باسشىسىنىڭ قولىنان وفيتسەرلىك پوگوندى قورعانىس مينيسترلىگىنىڭ راديوەلەكترونيكا جانە بايلانىس اسكەري-ينجەنەرلىك ينستيتۋتى مەن قۇرلىق ءاسكەرلەرىنىڭ اسكەري ينستيتۋتى, قر ۇقك شەكارا قىزمەتى اكادەمياسى, توتەنشە جاعدايلار مينيسترلىگىنىڭ كوكشەتاۋ تەحنيكالىق ينستيتۋتى, قر ۇلتتىق ۇلانىنىڭ اسكەري ينستيتۋتى سەكىلدى جوعارى اسكەري وقۋ ورىندارىنىڭ 12 ۇزدىك تۇلەگى الدى.
اسقار تۇراپباي ۇلى,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.
