جاعىمدى جاڭالىق تۋرالى تسيفرلىق دامۋ ءمينيسترى باعدات ءمۋسيننىڭ «Microsoft»-تىڭ ەلىمىزدەگى باس ديرەكتورى سەرگەي لەششەنكومەن ەكىجاقتى كەزدەسۋى بارىسىندا بەلگىلى بولدى.
حاب قىزمەتى ورتالىق ازيا, ازەربايجان, ارمەنيا, گرۋزيا, موڭعوليا, پاكىستان ەلدەرىن قامتيدى دەپ كۇتىلىپ وتىر.
– «Microsoft» قىزمەتىن لوكاليزاتسيالاۋ قازاقستانعا ايماقتىق اۋقىمدا تەحنولوگيالار مەن وزىق شەشىمدەردى تارتۋ ورتالىعىنا اينالۋعا مۇمكىندىك بەرەدى. وسىلايشا, حاب «Microsoft» كورپوراتسياسىنىڭ تەحنولوگيالىق دامۋ جانە يننوۆاتسيالار ورتالىعى بولا وتىرىپ, شيكىزاتتىق ەمەس تەحنولوگيالىق سالالاردىڭ ونىمدەرىن ءوندىرۋ مەن ەكسپورتتاۋدى ىنتالاندىرۋ ارقىلى ادامي كاپيتالدى دامىتۋ جانە ۇلتتىق ەكونوميكانى نىعايتۋدىڭ درايۆەرى بولا الادى, – دەدى باعدات مۋسين.
مينيستر وتكەن جىلى مەملەكەت باسشىسى قاسىم-جومارت توقاەۆ بۇۇ باس اسسامبلەياسىنىڭ 77-سەسسياسى اياسىندا نيۋ-يورككە جاساعان ساپارى اياسىندا «Microsoft» كومپانياسىنىڭ ورتالىق جانە شىعىس ەۋروپا بويىنشا باس ديرەكتورى ميشەل سيممونسپەن كەزدەسۋ وتكىزىپ, وندا قازاقستاندىق وكىلدىكتى ايماقتىق حابقا اينالدىرۋ ماسەلەسى كوتەرىلگەنىن جەتكىزدى. سول كەزدە ەل پرەزيدەنتى ۇكىمەتكە وسى باستامانى جانداندىرىپ, ونى جۇزەگە اسىرۋعا قاجەتتى جاعداي جاساۋ مىندەتىن جۇكتەگەن.
– وسى ۋاقىت ىشىندە سىرتقى ىستەر مينيسترلىگىنىڭ جانە ەلىمىزدىڭ سان-فرانتسيسكوداعى باس كونسۋلدىعىنىڭ, سونداي-اق «Microsoft» كورپوراتسياسىنىڭ قازاقستاندىق وكىلدىگىنىڭ قولداۋىمەن بۇل ماسەلەنى شەشۋ بويىنشا بەلسەندى جۇمىستار جۇرگىزىلدى. كرەمني القابىنا ساپارىم بارىسىندا دا بۇل ماسەلەنى ۇمىت قالدىرعان جوقپىز. ەندى, مىنە, بىزگە قابىلدانعان شەشىم جونىندە رەسمي تۇردە حابارلاندى, – دەدى مينيستر.
«Microsoft» كومپانياسىنىڭ قازاقستان بويىنشا باس ديرەكتورى سەرگەي لەششەنكونىڭ ايتۋىنشا, ەلىمىزدە «Microsoft»-تىڭ ايماقتىق حابىنىڭ قۇرىلۋى ماڭىزعا يە. «قازاقستاندا ءتيىستى ينفراقۇرىلىم بار. ءبىز بىرلەسكەن جوبالاردى ىسكە اسىرۋعا دايىنبىز», دەدى ول.
سونداي-اق كەزدەسۋدە كورپوراتسيانىڭ ChatGPT سياقتى كوپتەگەن سەرۆيستەرىندە قازاق ءتىلىنىڭ قولدانۋ اياسىن كەڭەيتۋ ماسەلەسى تالقىلاندى.
