قازاقستان مەن ازەربايجاننىڭ حالىقارالىق جانە ايماقتىق ساياساتتا, گەوەكونوميكاداعى وزەكتى ماسەلەلەردەگى ۇستانىمدارى ۇقساس. سوندىقتان ەكىجاقتى فورماتتا دا, ءارتۇرلى كوپجاقتى قۇرىلىمدار (تمۇ, اوسشك, شىۇ) اياسىندا دا ءوزارا جەمىستى ارەكەتتەر جاسايدى.
ايماقتاعى تۇراقتىلىق پەن قاۋىپسىزدىكتى نىعايتۋ – ءبىزدىڭ ورتاق باسىمدىعىمىز. ايتا كەتۋ كەرەك, ساراپشىلار بۇگىندە ازەربايجان مەن ورتالىق ازيانى ءبىرتۇتاس ماكرووڭىر رەتىندە قاراستىرۋدى ۇسىنىپ وتىر.
ينستيتۋتسيونالدىق تۇرعىدا قازاق پەن ازەربايجان بايلانىسى بىرتىندەپ دامىپ كەلەدى. بىلتىر ستراتەگيالىق قاتىناستاردى نىعايتۋ جانە وداقتاستىق ىقپالداسۋدى تەرەڭدەتۋ تۋرالى دەكلاراتسياعا, سونداي-اق ىنتىماقتاستىقتى دامىتۋدى كوزدەيتىن 2026 جىلعا دەيىنگى كەشەندى باعدارلاماسىنا قول قويىلدى.
بۇل جولى دا ەكى ەل باسشىلارى بىرنەشە كەلىسسوزدەرگە قاتىسىپ, عىلىم, اقپارات, بيزنەستى دامىتۋ, مادەني ىنتىماقتاستىق, دياسپورالارمەن جۇمىس سالاسىنداعى ىنتىماقتاستىق ماسەلەلەرى بويىنشا ماڭىزدى قۇجاتتارعا قول قويدى. ەندى ەلدەر اراسىندا جوعارى مەملەكەتارالىق كەڭەس قۇرىلماق.
ازەربايجان پرەزيدەنتى ءوزىنىڭ ءىس-ساپارى بارىسىندا ەكى تۋىسقان ەلدىڭ جاقىنداسۋى گۋمانيتارلىق سالانىڭ, ساۋدا-ەكونوميكالىق جانە ينۆەستيتسيالىق جوبالاردىڭ, سونداي-اق كولىك جانە لوگيستيكالىق ينفراقۇرىلىم ماسەلەلەرىندەگى باسىمدىعىن اتاپ ءوتتى.
تۇركى اكادەمياسىنىڭ باسشىسى رەتىندە ازەربايجان پرەزيدەنتىنىڭ ءدال وسىنداي جان-جاقتى ىنتىماقتاستىقتىڭ قاجەت ەكەنىن نۇسقاۋى ءبىزدىڭ اكادەميا الەمىنىڭ عىلىمي ينتەگراتسياسىنىڭ ۇيلەستىرۋ ورتالىعى رەتىندەگى ۇستانىمىنا تولىق سايكەس كەلەتىنىن ايتقىم كەلەدى.
باۋىرلاس ەلدەر اراسىنداعى مادەني بايلانىس كۇشىمەن باستاپقىدا گۋمانيتارلىق سالاداعى ىنتىماقتاستىق تابيعي قالىپتى ەدى, الايدا ۋاقىت تالابىنا ساي مەملەكەتتەردىڭ تابىستى دامۋى ءۇشىن جاراتىلىستانۋ عىلىمدارى, جوعارى تەحنولوگيالار, ەكونوميكالىق ىنتىماقتاستىقتى كۇشەيتۋدىڭ ماڭىزدىلىعى ارتا ءتۇستى.
ازەربايجاننىڭ وكىلى رەتىندە استانادا ازەربايجاننىڭ جالپىۇلتتىق كوشباسشىسى گەيدار اليەۆ كوشەسىنىڭ سالتاناتتى اشىلۋىن ايتپاسا بولماس. بۇل ىقىلاستى ازەربايجان حالقى تولىق سەزىندى. تاريحتاعى ورتاق ەستەلىكتەر مەملەكەتتەردى عانا ەمەس, قوعامدى دا ءوزارا جاقىنداستىرۋدىڭ تاعى ءبىر تەتىگى.
ءبىز ءبىر-بىرىمىزگە مۇقتاجبىز, تۇركى ەلدەرىنىڭ جاقىنداسۋى – ۋاقىت ەنشىسىندە. كوشباسشىلارىمىزدىڭ دانالىعى مەن حالىقتىڭ قولداۋى ەڭ باتىل باستامالاردى جۇزەگە اسىرۋعا مۇمكىندىك بەرەدى دەگەن سەنىمدەمىن.
شاھين مۋستافاەۆ,
تۇركى اكادەمياسىنىڭ پرەزيدەنتى, اكادەميك
