بۇل بانك ءوز سالىمشىلارىنا تۇرعىن ءۇيدى 30 پايىزدىق باستاپقى جارنامەن ساتىپ الۋعا مۇمكىندىك جاساپ وتىر. بانكتىڭ اتىراۋ وبلىستىق فيليالى ديرەكتورىنىڭ مىندەتىن اتقارۋشى نۇربولات باتىردىڭ ايتۋىنشا, نەسيەلەۋ تەتىگىنىڭ جىلدىق مولشەرى – 7 پايىز (جتسم 7,2%-دان باستاپ). نەسيەنىڭ ەڭ كوپ سوماسى 100 ملن تەڭگەگە دەيىن 25 جىلعا بەرىلەدى.
وسى كەزگە دەيىن «وتباسى بانك» ارقىلى ەكىنشى نارىقتاعى تۇرعىن ءۇيدى ساتىپ الۋشىلار العاشقى جارنانى 50 پايىزعا دەيىن جيناۋى قاجەت ەدى. بۇل – بانكتىڭ ىسكە اسىرىپ جاتقان تۇرعىن ءۇي قۇرىلىسى جيناقتارى جۇيەسىنىڭ تالابى. ەندى اتىراۋلىقتار ءۇشىن «MBS Capital» جشس-مەن جاسالعان كەلىسىمشارتتىڭ ناتيجەسىندە سالىمشىلار ءۇشىن باستاپقى جارنانىڭ سوماسى 30 پايىزعا دەيىن تومەندەيتىن بولدى.
– جىل سايىن «وتباسى بانك» ارقىلى تۇرعىن ءۇي نەسيەسىن الاتىن قازاقستاندىقتار قاتارى كوبەيىپ كەلەدى. ماسەلەن, جىل باسىنان بەرى 10 200 نەسيە بەرىلدى. ال اتىراۋدا ءبىزدىڭ بانكتەن تۇرعىن ءۇي نەسيەسىن العان 700-دەن استام ادام جەكە باسپاناعا يە بولدى. ءوڭىر تۇرعىندارى تۇرعىن ءۇي جارناسىن جيناقتاۋ جانە باسپانا ساتىپ الۋ ءۇشىن كۇن سايىن شامامەن جاڭادان 90-100 دەپوزيت اشادى. ءبىزدىڭ ينۆەستورلارىمىزدىڭ كوپشىلىگى تۇرعىن ءۇيدى كوممەرتسيالىق قۇرىلىمداردان ساتىپ الادى. الايدا ولاردىڭ بارلىعى مەملەكەتتىك باعدارلامالاردىڭ شارتتارىنا سايكەس كەلە بەرمەيدى. سول سەبەپتى ءبىز ولار ءۇشىن نەسيەلەۋدىڭ جاڭا تەتىگىن ازىرلەدىك. مۇنداعى نەگىزگى ماقسات – جارنانى 50-دەن 30 پايىزعا دەيىن تومەندەتۋ. تۇرعىن ءۇي قۇرىلىسىن جۇرگىزەتىن كومپانيا بولگەن سۋبسيديا ونى ازايتۋعا مۇمكىندىك بەرىپ وتىر, – دەيدى نۇربولات باتىر.
قازىر اتالعان كومپانيا اتىراۋ قالاسىنداعى «نۇرسايا» شاعىن اۋدانىندا «Elorda Residence» تۇرعىن ءۇي كەشەنىنىڭ قۇرىلىسىن جۇرگىزىپ جاتىر. قۇرىلىس كومپانياسى ديرەكتورىنىڭ ورىنباسارى عازيزا كەرەشتىڭ مالىمەتىنە قاراعاندا, جاڭا ءداۋىر تالابىنا ساي بوي كوتەرىپ جاتقان تۇرعىن ءۇي كەشەنى ءۇشىن 1,6 گەكتار جەر تەلىمى بەرىلگەن. مۇندا 9 قاباتتى 4 تۇرعىن ءۇيدىڭ قۇرىلىسى قولعا الىنعان. جاڭا تۇرعىن ۇيلەردە 198 پاتەر بولادى.
تۇرعىن ءۇي كەشەنى الابىندا بىرنەشە ماسەلە وڭ شەشىمىن تابادى. ناقتى ايتساق, دەمالىس اللەياسى جاسالىپ, لاندشافتى كوگالداندىرۋ قولعا الىنادى, بالالار جانە سپورت الاڭدارى, جابىق كولىك تۇراعى اشىلادى. بالالار جانە سالاماتتى ءومىر سالتىن ۇستانۋشىلار ءۇشىن فيتنەس ورتالىقتارى بولادى. پاتەر يەلەرىنىڭ بارىنە ارنايى كومپانيا سەرۆيستىك قىزمەت كورسەتپەكشى.
– ءبىزدىڭ كومپانيا الدىمەن قۇرىلىس ماتەريالدارىنىڭ ساپاسىنا باسا ءمان بەرەدى. ەڭ باستىسى, كومپانيامىزعا «قازاقستان تۇرعىن ءۇي كومپانياسى» اق-نىڭ مەملەكەتتىك كەپىلدەمەسى بەرىلگەن. بۇل قۇرىلىسى ءجۇرىپ جاتقان تۇرعىن ءۇي كەشەنىنەن پاتەر ساتىپ الۋدىڭ قاۋىپسىز ەكەنىن بىلدىرەدى. ءبىز مەملەكەتتىك كەپىلدىك ارقىلى تۇرعىنجاي ساتىپ الۋشىلارمەن ۇلەسكەرلىك كەلىسىمشارت جاساي الامىز. العاشقى جارناسى 20 پايىزدان باستالادى. ال ساتىپ الۋشىلار پاتەر قۇنىن تولىق تولەسە, باعا جەڭىلدىگى بار. پاتەردى قوسىمشا كەپىلدىكسىز يپوتەكاعا ساتىپ الۋعا بولادى, – دەپ ءتۇسىندىردى عازيزا كەرەش.
بانك فيليالى بىلتىر «اتىراۋ جاستارى» تۇرعىن ءۇي باعدارلاماسىن ىسكە قوستى. وبلىس اكىمدىگى مەن «وتباسى بانك» اق-نىڭ بىرلەسكەن جوباسى 35 جاسقا دەيىنگى جاستارعا ارنالعان. بۇل جوباعا وبلىس اكىمدىگى 1 ملرد تەڭگە, ال اتالعان بانك 600 ملن تەڭگە بولەدى. ماقسات – جاستاردىڭ بارىنشا ءتيىمدى شارتتارمەن باسپانا ساتىپ الۋىنا جول اشۋ. بۇل باعدارلاماعا دارىگەرلەر, مۇعالىمدەر, مادەنيەت جانە سپورت سالالارىنىڭ وكىلدەرى, جوعارى وقۋ ورىندارىنىڭ پروفەسسورلارى, عىلىمي-زەرتتەۋ ينستيتۋتتارىنىڭ عىلىمي قىزمەتكەرلەرى, جۋرناليستەر, الەۋمەتتىك سالا مەن كوممۋنالدىق كاسىپورىنداردا جۇمىس ىستەيتىندەر, سونداي-اق تۇرعىن ءۇي كەزەگىندە تۇرعان جەتىم بالالار قاتىسا الادى.
اتىراۋ قالالىق تۇرعىن ءۇي-كوممۋنالدىق شارۋاشىلىق, كولىك جانە اۆتوكولىك جولدارى ءبولىمى تۇرعىن ءۇي سەكتورىنىڭ مەڭگەرۋشىسى رافحات جولديەۆتىڭ مالىمەتىنە سۇيەنسەك, 1-20 اقپان ارالىعىندا «اتىراۋ جاستارى» تۇرعىن ءۇي باعدارلاماسىنا قۇجات قابىلداۋ جۇرگىزىلگەن. جاڭا باعدارلاما ارقىلى باسپانا ساتىپ الۋ ءۇشىن 860 جاس ءوتىنىش بەرگەن. ونىڭ ىشىندە 830 جاستىڭ ءوتىنىشى ماقۇلدانعان.
«اتىراۋ جاستارى» باعدارلاماسى بويىنشا قۇجات تاپسىرعانداردىڭ اراسىنان 100 ادامعا باسپانا بەرىلەدى. ونىڭ ىشىندە اتىراۋ قالاسىنان – 55, اۋدانداردان 45 جاس بار. باسپانا الۋ مۇمكىندىگى بار قالالىق جاستاردىڭ ءتىزىمى جاساقتالىپ جاتىر. بۇل ءتىزىم بانككە جولدانادى. ءارى قاراي نەسيەنى راسىمدەۋ, تۇرعىن ءۇي ساتىپ الۋ باستالادى», دەيدى ر.جولديەۆ.
باعدارلاماعا قاتىسۋشىلار وزدەرىنىڭ تولەم قابىلەتتىلىگىن راستاعاننان كەيىن جىلدىق 5 پايىزبەن تۇرعىن ءۇي زاەمىن الادى. ونىڭ العاشقى جارناسى – 10 پايىز. بەرىلەتىن نەسيەنىڭ ەڭ كوپ سوماسى 18 ملن تەڭگەنى قۇرايدى. بۇل قارجى اتىراۋ قالاسىنان ءۇي ساتىپ الۋشىلارعا بەرىلەدى. ال ءوڭىردىڭ اۋداندارىنان باسپانا ساتىپ الۋ ءۇشىن 13 ملن تەڭگەگە دەيىن نەسيە بەرۋ كوزدەلگەن. نەسيە مەرزىمى – 25 جىل.
اتىراۋ وبلىسى
