سوندىقتان بۇل – قازىرگى جانە بولاشاقتا جۇمىس پەن كاسىبي ءوسۋدىڭ ماڭىزدى مۇمكىندىكتەرىن ۇسىناتىن سالا. بىراق ادامداردىڭ ءومىر ءسۇرۋ ساپاسىن جاقسارتاتىن جاڭا تۇجىرىمداردىڭ اشىلۋى, كوپ جاعدايدا, جوعارى بىلىكتى جانە دايىندالعان ماماندار جۇرگىزەتىن زەرتتەۋ جۇمىستارىنا بايلانىستى.
سول سەبەپتى مەن 2015 جىلدان بەرى نانوقۇرىلىمدى تەمىرى بار ماتەريالداردى سۋ ورتاسىن تازارتۋ جانە بيومەديتسينادا كاتاليزاتورلاردىڭ نەگىزى رەتىندە قولدانۋدى زەرتتەۋمەن اينالىسامىن.
زەرتتەۋدىڭ نەگىزىنەن سۋ ورتاسىن ورگانيكالىق بوياعىشتاردان نەمەسە اۋىر مەتالداردان تازارتۋ ءۇشىن كاتاليزاتور رەتىندە پايدالانىلاتىن ماگنيتتىك نانوبولشەكتەردى الۋدىڭ تەحنولوگيالىق شەشىمدەرىنە باعىتتالعان. ولاردى زيانسىز كومپونەنتتەرگە ىدىراتۋ نەمەسە ءسىڭىرۋ جولدارى قاراستىرىلىپ وتىر.
قازىرگى ۋاقىتتا ديسسەرتاتسيالىق جۇمىسىما مىقتاپ كىرىستىم. ناقتىراق ايتسام, پراكتيكالىق قولدانۋ ءۇشىن قۇرامىندا مەتالى بار نانوبولشەكتەردىڭ ZnO لەگيرلەۋىنىڭ اسەرى تۋرالى زەرتتەۋ جۇرگىزۋ ۇستىندەمىن. تەحنولوگيا قۇرامىندا تەمىرى بار نانوبولشەكتەردى سۋ ورتاسىن ورگانيكالىق بوياعىشتاردان نەمەسە ولاردىڭ ماگنيتتىك قاسيەتتەرىن پايدالانا وتىرىپ, اۋىر مەتالداردان تازارتۋدىڭ مۇمكىندىكتەرىن قاراستىرۋدامىن. ياعني مارگانەتس نانوبولشەكتەردىڭ بەتىنە ادسوربتسيالانادى, سودان كەيىن بۇل نانوبولشەكتەردى كەيىنىرەك جارتىلاي ونەركاسىپتىك نەمەسە ونەركاسىپتىك ماسشتابتا قولدانۋعا بولاتىن ماگنيتتەر تۇزىلەدى. بيومەديتسينادا بۇل نانوبولشەكتەر ماگنيتتىك گيپەرتەرميادا جانە مرت-دا كونتراست اگەنتى رەتىندە قولدانىلادى. سونىمەن قاتار قۇرامىندا تەمىرى بار نانوبولشەكتەردىڭ ماگنيتتىك قاسيەتتەرى ءدارىنى ماقساتتى تۇردە جەتكىزۋدە دە پايدالانادى.
بۇعان قوسا تازارتۋ سالاسىندا جوعارى تيىمدىلىگى بار شپينەل ءتارىزدى قۇرىلىمى بار تسەري مەن گادوليني قوسىلعان تەمىرى بار نانوبولشەكتەردى الۋ ءادىسىن ويلاپ تاپقانىمدى ايتا كەتەيىن. سونداي-اق سينتەز جاعدايلارىنا بايلانىستى سينتەزدەلگەن نانوبولشەكتەردەگى قۇرىلىمدىق ەرەكشەلىكتەر مەن فازالىق وزگەرىستەرگە ىرگەلى زەرتتەۋلەر جۇرگىزەمىن. سونىمەن قاتار 2021 جىلى ەلىمىزدىڭ عىلىمي ۋنيۆەرسيتەتتەرى اراسىندا ستۋدەنتتەردىڭ ۇزدىك عىلىمي-زەرتتەۋ جۇمىسى ءۇشىن I دارەجەلى ديپلومىمەن ماراپاتتالىمدى ماقتانىش سانايمىن.
كاميلا ەگىزبەك,
مەملەكەتتىك «دارىن» جاستار سىيلىعىنىڭ لاۋرەاتى, ماگيسترانت
