قازىر ەلىمىزدە ۇلتتىق زەرتتەۋ ۋنيۆەرسيتەتتەرىن قۇرۋعا جول اشىلدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى زەرتتەۋ ۋنيۆەرسيتەتى مارتەبەسىن الدى. ۇلتتىق ۋنيۆەرسيتەت الداعى ۋاقىتتا قالاي دامۋى ءتيىس؟ ارنايى ماقساتتى باعدارلاما بويىنشا دامۋى كەرەك؟ وتە جوعارى دەڭگەيدە عىلىمي-زەرتتەۋ جۇرگىزۋى جانە ولاردىڭ ناتيجەسىن پراكتيكاعا ەنگىزۋدى قامتاماسىز ەتۋى قاجەت.
جوعارى وقۋ ورىندارى جۇمىسىنىڭ تيىمدىلىگى ولاردىڭ تالاپكەر تارتۋىمەن عانا سيپاتتالمايدى, وقۋ ۇدەرىسىنىڭ ساپالىلىعى, ادىستەمەلىك, عىلىمي, حالىقارالىق, جاڭاشىل جانە بيزنەس سالاسىنا قاتىسۋى دا ءبىلىم ورداسىنا سىن. ءبىلىم وردالارىنىڭ يننوۆاتسيالىق دەڭگەيىن ارتتىرۋى, ولاردىڭ وندىرىستىك كاسىپورىندارمەن بايلانىسىن كۇشەيتۋى, ەڭبەك رەسۋرستارىن باسقارۋ ساياساتىن جەتىلدىرۋى ونىڭ مەنەدجمەنتىنە زاماناۋي كوزقاراستى تالاپ ەتەدى. عىلىمدى, يننوۆاتسيانى, كاسىپكەرلىكتى دامىتۋ ەل ەكونوميكاسىن ارتتىرۋدىڭ تەگەرشىگى دەسەك, بۇل بارىستا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ الار ورنى ەرەكشە.
قازاقستانداعى ۇلتتىق زەرتتەۋ ۋنيۆەرسيتەتتەرى قازىر جوعارى وقۋ ورىندارى بازاسىندا قالىپتاستىرىلادى. ستۋدەنتتەردى يننوۆاتسيالىق جوبالاۋعا, اشىلعان عىلىمي جاڭالىقتاردى كوممەرتسيالاندىرۋعا ۇيرەتۋ, العا قويعان ماقساتتارعا سايكەس باسقارۋدى ۇيىمداستىرۋدىڭ جاڭا جۇيەسىن قۇرۋ ءار زەرتتەۋ ۋنيۆەرسيتەتتەرىنىڭ نەگىزگى ماقساتتارى مەن مىندەتتەرىنە جاتادى.
ۇلتتىق زەرتتەۋ ۋنيۆەرسيتەتىنىڭ تۇلەگى تالداۋدى, جوبالاۋدى جانە ونى جۇزەگە اسىرۋدى قاجەت ەتەتىن كاسىبي جاعدايلاردا جۇيەلى ءىس-ارەكەتكە دايىن بولا الاتىن, كرەاتيۆتى, شىعارماشىلىقپەن جۇمىس ىستەۋگە قابىلەتتى, بويىندا ويلاۋ شاپشاڭدىعى بار, قاجەت بولعاندا تەز شەشىم قابىلداۋعا ءتيىس.
حالىقارالىق تاجىريبەلەر كورسەتكەندەي, قازىر زەرتتەۋ قىزمەتتەرىنىڭ كوممەرتسيالىق باعىت الۋى جوعارى وقۋ ورىندارىنىڭ كاسىپكەرلىك قىزمەتتەرىن جۇزەگە اسىرۋدىڭ كەڭ تارالعان تەتىگى. تەحنولوگيالاردىڭ كوممەرتسيالاندىرىلۋى دەپ عىلىمي-زەرتتەۋدىڭ ناتيجەلەرىن پايدالانىپ, تابىس تابۋعا باعىتتالعان كەز كەلگەن قىزمەت ءتۇرى ايتىلادى. بۇگىندە يننوۆاتسيالىق كاسىپكەرلىك قىزمەتتى جوعارى وقۋ ورىندارىنىڭ ۋاقىت اعىمىنا ىلەسۋى عانا ەمەس, ونى ادام رەسۋرستارى – عالىمدار مەن كاسىپكەرلەر دەپ تۇسىنگەنىمىز ابزال.
سونداي-اق قازاقستاندىق جوعارى وقۋ ورىندارىن ينستيتۋتتىق اۆتونوميا الۋىنىڭ بولاشاعى تۇرعىسىنان العاندا, ولاردىڭ يننوۆاتسيالىق كاسىپكەرلىك قىزمەتتى جۇزەگە اسىرۋ, ەنداۋمەنت-قورلار, ورتالىقتار قۇرۋ مەن دامىتۋ ارقىلى تاپقان تابىستى ارتاراپتاندىرۋعا دەگەن قۇلشىنىسى بايقالادى.
ۋنيۆەرسيتەت پەن بيزنەس اراسىندا ناتيجەلى بايلانىستى دامىتۋعا كۇش سالۋ, تەحنولوگيا ترانسفەرىنىڭ دامۋىنا, قوسىمشا ءبىلىم بەرۋگە, جوعارى سۇرانىستى تۇلەكتەردى دايارلاۋعا ەرەكشە نازار اۋدارۋ ۇلتتىق زەرتتەۋ ۋنيۆەرسيتەتتەرىنىڭ ستراتەگيالىق ماقساتى بولۋعا ءتيىس. بولاشاقتا بەلسەندى يننوۆاتسيالىق مامان-زەرتتەۋشىلەردى وقىتىپ, تەوريا مەن پراكتيكانىڭ ءوزارا قارىم-قاتىناسىنا ورتا قالىپتاستىرۋ ۇلتتىق زەرتتەۋ ۋنيۆەرسيتەتتەرىنىڭ باسقا جوعارى وقۋ ورىندارىنان باسىمدىعىن انىقتايدى. ۇلتتىق زەرتتەۋ ۋنيۆەرسيتەتتەرى عىلىمنىڭ كادرلىق الەۋەتىنىڭ, وقۋ ۇدەرىسى مەن عىلىمي قىزمەتتىڭ, جوعارى تەحنولوگيالار مەن كاسىبي ءبىلىم بەرۋدىڭ دامۋى مەن قورعالۋىنا دەگەن جاۋاپكەرشىلىكتى وزىنە الۋعا قابىلەتتى بولادى. بۇل ولاردىڭ قىزمەتىنىڭ بارلىق نەگىزگى پارامەترلەرىنە جوعارى تالاپتار قويۋدى قاجەت ەتەدى .
ەۋرازيا ۇلتتىق ۋنيۆەرسيتەتىندە جاقسى عالىمدار جۇمىس ىستەدى جانە بۇگىن دە ىستەپ كەلە جاتىر. سودان كەيىن بىزدە مىقتى جاستار بار, باكالاۆر, ماگيستر, دوكتورانت دەگەندەي. ولاردى قازاق ەلىنىڭ بولاشاعى, كەلەشەگى دەپ ەسەپتەيمىن.
عاريفوللا ەسىم,
مەملەكەتتىك سىيلىقتىڭ لاۋرەاتى, اكادەميك
