قازىرگى ۋاقىتتا وتباسىنىڭ تسيفرلىق كارتاسى مەملەكەتتىك قولداۋ ءىس-شارالارىن الۋعا قۇقىعى بار قازاقستاندىقتارعا ءوتىنىش جازباي-اق جاردەماقىلار مەن الەۋمەتتىك تولەمدەردىڭ 9 ءتۇرىن رەسىمدەۋگە مۇمكىندىك بەرەدى. ولار – جۇكتىلىككە جانە بوسانۋعا بايلانىستى تابىسىنان ايىرىلعان جاعدايدا تولەنەتىن الەۋمەتتىك تولەم, بالا كۇتىمىنە بايلانىستى تابىسىنان ايىرىلعان جاعدايدا تولەنەتىن الەۋمەتتىك تولەم, جۇمىسىنان ايىرىلعان جاعدايدا تولەنەتىن الەۋمەتتىك تولەم, اسىراۋشىسىنان ايىرىلىلعاندا بەرىلەتىن الەۋمەتتىك تولەم, مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) ارنالعان جاردەماقى, مۇگەدەكتەرگە بەرىلەتىن جاردەماقى, كوپبالالى وتباسىلارعا بەرىلەتىن جاردەماقى, «التىن القا» جانە «كۇمىس القا» القالارىمەن ماراپاتتالعان كوپبالالى انالارعا بەرىلەتىن جاردەماقى, اتاۋلى الەۋمەتتىك كومەك.
ماسەلەن, ەلوردا تۇرعىنى التىنقىز ەلەۋ اۆتوماتتى تۇردە حابارلاما العاننان كەيىن بالا كۇتىمىنە بايلانىستى تابىسىنان ايىرىلعان جاعدايدا بەرىلەتىن الەۋمەتتىك تولەمدى رەسىمدەگەن. «ارينە, مۇنداي تولەم بەرىلەتىنىن بىلەتىنمىن. ول ءۇشىن ءبىر جەرگە بارىپ ارىز جازۋ كەرەك دەپ ويلادىم. بىراق ماعان حابارلاما كەلدى. وعان ىڭعايلى بانكتى تاڭداۋ ارقىلى جاۋاپ بەردىم جانە ءبىر ايدىڭ ىشىندە اقشا شوتىما ءتۇستى. بۇل وتە ىڭعايلى», دەيدى التىنقىز.
سونداي-اق وتباسىنىڭ تسيفرلىق كارتاسى ارقىلى زەينەتاقى تولەمدەرىن الۋ مۇمكىندىگى تۋرالى اۆتوماتتى حابارلاما ىسكە اسىرىلعان.
مەملەكەتتىك قولداۋ ءىس-شارالارىن الۋعا قۇقىق بەلگىلەنگەن كەزدە الەۋەتتى الۋشىعا 1414 بىرىڭعاي بايلانىس ورتالىعىنان SMS-حابارلاما جىبەرىلەدى. حابارلاما العان ازامات وعان كەلىسىمى تۋرالى جاۋاپ بەرۋى كەرەك. ءوتىنىشتى رەسىمدەۋ جانە الەۋمەتتىك جاردەماقى نەمەسە تولەم تاعايىنداۋ اۆتوماتتى رەجىمدە جۇرگىزىلەدى. سودان كەيىن قاراجات الۋشىنىڭ بانك شوتىنا اۋدارىلادى.
«الاياقتىق تاۋەكەلىن بولدىرماۋ ماقساتىندا 1414 بىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەت. سۇراقتار تۋىنداسا, 1414 ءنومىرى بويىنشا Call-ورتالىققا حابارلاسۋعا بولادى. قوڭىراۋ شالۋ تەگىن», دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگى.
وتباسىنىڭ تسيفرلىق كارتاسى – ءارتۇرلى مەملەكەتتىك ورگانداردىڭ مالىمەتتەرىن جيناقتايتىن, ازاماتتاردىڭ الەۋمەتتىك ءال-اۋقاتىنىڭ دەڭگەيىن انىقتاۋعا جانە ولارعا پرواكتيۆتى فورماتتا كەپىلدەندىرىلگەن مەملەكەتتىك قولداۋ كورسەتۋگە مۇمكىندىك بەرەتىن اقپاراتتىق جۇيە. بۇگىنگى تاڭدا مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى نەگىزىندە وتباسىنىڭ تسيفرلىق كارتاسىندا قازاقستاننىڭ 19,5 ملن ازاماتى نەمەسە 6,3 ملن وتباسى تۋرالى اقپارات جيناقتالعان.
