جەزقازعاندى جاڭارتۋ جوباسى

– جەزقازعاندى ارالاپ كور­دىڭ بە؟ قانداي قالا ەكەن ءوزى؟ – دەدى جولاي مىنگەن جولاۋشى. شاماسى, جەزقازعاندا بولىپ كورمەگەن كىسى سەكىلدى. ايتپەسە, مۇنداي سۇراق قويماسا كەرەك-ءتى.

– اپا-اۋ, نەسىن سۇرايسىز؟ كەشەگى كەڭەس وكىمەتى كەزىندەگى قى­زىلوردا ەسىڭىزدە مە, قازىرگى جەزقازعان تاپ سونداي, دەگەن جاۋاپتى ەستىگەن اپامىز: – الدا وبالداعى-اي, تۇك وسپەي قالعان جەر ەكەن عوي, – دەپ كۇرسىنگەندەي بولعان ەدى.

كەڭەس كەزىندە دە جارقىراپ كەتە قويعانى شامالى جەزقازعان 1997 جىلى وبلىس ورتالىعى مار­تە­بەسىنەن ايرىلعان سوڭ قۇل­دى­را­عان ۇستىنە قۇلدىراي تۇسكەنى راس.

ۇلىتاۋ وبلىسى قۇرىلىپ, ورتالىعى جەزقازعان قالاسى بولىپ بەكىتىلگەلى دە جىلدان اسىپ بارادى.

سارسەنبىدە وبلىس اكىمى بەرىك ابدىعالي ۇلى قالا اكتيۆى قاتىس­قان جەزقازعان قالاسىن دامىتۋ جونىندە ارنايى جيىن وتكىزدى. جيىندى اشقان اكىم قا­لانىڭ قازىرگى جاي-كۇيى وبلىس ورتالىعى مارتەبەسىنە مۇلدەم ساي كەلمەيتىنىن اشىق ايتتى.

– ۇكىمەتتە بەكىتىلگەن وبلىس ورتالىعى دەگەن نورماتيۆ بار. ءبىز سول نورماتيۆكە لايىق بولۋىمىز كەرەك. بىلتىردان بەرى جوبالار قاراستىردىق, جوسپارلار جاسادىق. ەندى ىسكە كىرەسەتىن ءسات تۋدى, – دەگەن ب.ابدىعالي ۇلى جەزقازعان قالاسىن دامىتۋ جوس­پارىمەن تانىستىردى. مۇندا كوپتەگەن ءىس-شارالار كوزدەلگەن ەكەن. ايتالىق, قالاىشىلىك جولداردى جوندەۋ, جاقسارتۋعا 3,1 ملرد تەڭگە قاراستىرىلعان. ال 1 ملرد 744 ملن تەڭگەگە بالالار­دىڭ ويىن الاڭدارى سالىنادى. قالانى كوگالداندىرۋعا 300 ملن تەڭگەدەن استام قارجى قاراس­تى­رىلعان. تۇرعىن ۇيلەردىڭ قاس­بەتتەرىن جاڭارتىپ, توبەلەرىن جوندەۋ جۇمىستارى ءۇشىن 1,1 ملرد تەڭگە, 26 سپورت الاڭىن جون­دەۋدەن وتكىزۋ ماقساتىندا 660 ملن تەڭگە بولىنەدى. 29 جاڭا زاماناۋي ايالداما ورناتۋ دا قاجەت. بۇلاردىڭ سىرتىن­دا جا­ڭا­دان تۇرعىن ۇي­لەر, اكىم­شىلىك عيماراتتار سالۋ دا قولعا الىنادى. جيىندا «قازاقمىس» كورپوراتسيانىڭ ەل پرەزي­دەن­تىنىڭ تاپسىرماسى بويىن­شا سپورت كەشەنىن سالۋدى باستاپ كەتكەنى دە ايتىلدى. بۇدان دا باسقا بىرنەشە ءىرى جوبالار جوس­پارلانۋدا. «قازاقمىس» كورپوراتسياسى تاراپىنان ءبىرشاما جۇمىستار اتقارىلماقشى ەكەن. جيىن قورىتىندىسىندا وبلىس اكىمى كورپوراتسيا باسشىلىعىنا العىسىن ءبىلدىردى.

قالاي بولعاندا دا ويعا ال­عان­­نىڭ ورىندالعانى جاقسى. جەز­قاز­عاندى جاڭارتۋ جوباسى جۇرت­شىلىقتىڭ كوڭىلىنەن شىعادى دەپ سەنەمىز!

ابدوللا داستانوۆ,

جۋرناليست

جەزقازعان قالاسى