قىزىلوردا وبلىسى جاڭاقورعان اۋداندىق پروكۋراتۋراسىنىڭ ۇجىمى ازاماتتاردىڭ كونستيتۋتسيالىق قۇقىعىن قورعاۋ ماقساتىندا ولاردىڭ تيەسىلى ايلىق جالاقىلارىن دەر كەزىندە الىپ وتىرۋلارى باعىتىندا ايتارلىقتاي پارمەندى جۇمىستار جۇرگىزىپ كەلەدى. مۇنىڭ ناقتى دالەلىن تاياۋدا عانا اققورعان اۋىلدىق وكرۋگىندەگى «تۇگىسكەن» تش» جشس-نىڭ ءوز جۇمىسشىلارىنا جالاقى تولەۋىن تەكسەرۋ بارىسىندا انىقتالعان دەرەكتەر دە كەلتىرە الادى.
پروكۋراتۋرا قىزمەتكەرلەرى اتالعان مەكەمەنىڭ ءبىر توپ جۇمىسشىلارىنىڭ ارىزىن قاراۋ كەزىندە سەرىكتەستىكتىڭ ولارعا 2013 جىلدىڭ جەلتوقسان ايىنان 2014 جىلدىڭ ءساۋىر ايىنا دەيىنگى جالاقىلارى مەن جىل سايىنعى اقىلى ەڭبەك دەمالىستارىنا وتەماقىلارىن تولەمەگەنىنە كوز جەتكىزدى. ال قازاقستان رەسپۋبليكاسىنىڭ كونستيتۋتسياسىنىڭ 24-بابى 2-بولىگىنە سايكەس, اركىمنىڭ قاۋىپسىزدىك پەن تازالىق تالاپتارىنا ساي ەڭبەك ەتۋ جاعدايىنا, ەڭبەگى ءۇشىن نەندەي ءبىر كەمسىتۋسىز سىياقى الۋىنا, سونداي-اق جۇمىسسىزدىقتان الەۋمەتتىك قورعالۋعا قۇقىعى بار. سول سياقتى قازاقستان رەسپۋبليكاسىنىڭ ەڭبەك كودەكسى 134-بابى 1-بولىگىندە جالاقى قازاقستان رەسپۋبليكاسىنىڭ ۇلتتىق ۆاليۋتاسىنداعى اقشالاي نىساندا ايىنا كەمىندە ءبىر رەت, كەلەسى ايدىڭ ءبىرىنشى ونكۇندىگىنەن كەشىكتىرىلمەي تولەنۋى ءتيىس جانە جالاقى تولەنەتىن كۇن ەڭبەك شارتىندا, ۇجىمدىق شارتتا كوزدەلۋى قاجەت ەكەنى اتاپ كورسەتىلگەن.
بۇعان قوساتىنىمىز, جوعارىداعى كودەكستىڭ 23-بابى 2-بولىگى 5-تارماعىندا جۇمىس بەرۋشى قىزمەتكەرگە قازاقستان رەسپۋبليكاسىنىڭ نورماتيۆتىك قۇقىقتىق اكتىلەرىندە, ەڭبەك شارتىندا, ۇجىمدىق شارتتا, جۇمىس بەرۋشىنىڭ اكتىلەرىندە كوزدەلگەن جالاقى مەن وزگە دە تولەمدەردى ۋاقىتىلى جانە تولىق مولشەردە تولەۋگە مىندەتتى ەكەنى ايتىلعان. كودەكستىڭ 24-بابىندا ەڭبەك شارتى بويىنشا قىزمەتكەر سىياقى ءۇشىن ءتيىستى بىلىكتىلىگى بويىنشا جۇمىستى (ەڭبەك فۋنكتسياسىن) اتقارادى جانە ەڭبەك تارتىپتەمەسىن ساقتايدى, ال جۇمىس بەرۋشى ەڭبەك جاعدايلارىن قامتاماسىز ەتەدى, قىزمەتكەرگە قازاقستان رەسپۋبليكاسىنىڭ ەڭبەك زاڭناماسىندا, ەڭبەك شارتىندا, ۇجىمدىق شارتتا, تاراپتاردىڭ كەلىسىمىندە كوزدەلگەن جالاقىنى ۋاقىتىلى جانە تولىق كولەمدە تولەيدى جانە وزگە دە تولەمدەردى جۇزەگە اسىرادى دەلىنگەن.
الايدا, سەرىكتەستىكتە 261 جۇمىسشىعا 2013 جىلدىڭ جەلتوقسان ايىنان بۇگىنگى كۇنگە دەيىن جالپى 15 794 853 تەڭگە جالاقىدان قارىزى قالىپتاسقان. بۇل تۇرعىدا ونداعى 261 جۇمىسشىنىڭ قازاقستان رەسپۋبليكاسى كونستيتۋتسياسىندا كەپىلدىك بەرىلگەن قۇقىقتارىنا نۇقسان كەلتىرىلىپ, قولدانىستاعى ەڭبەك كودەكسىنىڭ 23, 24-باپتارى مەن 134-بابى 1 جانە 5-بولىكتەرىنىڭ تالاپتارى ورەسكەل بۇزىلعان.
سوندىقتان, سەرىكتەستىكتە جۇمىس ىستەيتىن جۇمىسشىلاردىڭ تيەسىلى جالاقىلارىنىڭ بەرىلۋىن قامتاماسىز ەتىپ, زاڭدى بۇزۋشىلىقتى تۇبەگەيلى جويۋعا باعىتتالعان شارالاردى قولدانۋ ءۇشىن اۋداندىق پروكۋراتۋرا زاڭدىلىقتى بۇزۋشىلىقتى دەرەۋ جويۋعا ۇيعارىم ەنگىزىلدى. سونىڭ ناتيجەسىندە قالىپتاسقان ەڭبەك اقى تولىق تولەندى. وسىنىڭ ءوزى جالاقى جونىندەگى قارىزداردى جابا توقۋعا بولمايتىنىن كورسەتەدى.
رۋسلان ءپىرنازار,
جاڭاقورعان اۋدانى پروكۋرورىنىڭ كومەكشىسى.
قىزىلوردا وبلىسى.
