تۇركىستان وبلىسى مادەنيەت جانە تۋريزم باسقارماسىنىڭ ءبولىم باسشىسى مۇقاعالي كەنجەتاي ۇلى مالىمدەگەندەي, «ونەرلى ولكە» وبلىستىق ونەر فەستيۆالىنىڭ اشىلۋ سالتاناتى بۇگىن, ياعني 7 ءساۋىر كۇنى تۇركىستانداعى «كەرۋەن ساراي» كەشەنىنىڭ اۋماعى مەن ەتنواۋىلدا وتەدى. «اۋدان-قالالاردىڭ ونەر ۇجىمدارى الدىن الا بەكىتىلگەن كەستەگە سايكەس كەزەكپەن كەلىپ, ونەر كورسەتەدى. العاش بولىپ فەستيۆال شىمىلدىعىن سايرام اۋدانىنىڭ كوركەمونەرپازدارى اشادى. فەستيۆال ءتورت ايعا جوسپارلانىپ وتىر. وندا اۋدان-قالالار ەتنواۋىلدا سۋرەتشىلەر مەن قولونەر شەبەرلەرىنىڭ جانە اۋدان, قالانىڭ جەتىستىكتەرى تۋرالى كورمەلەر ۇيىمداستىرادى. قىلقالام, قولونەر شەبەرلەرىن قاتىستىرا وتىرىپ سۋرەت سالۋ, قولونەر بۇيىمدارىن دايىنداۋ جۇمىستارىن كورسەتەدى. سونىمەن قاتار ۇلتتىق سالت-ءداستۇر, ءان-جىر, ادەت-عۇرىپقا بايلانىستى كورىنىستەر دە ساحنالانادى», دەيدى وبلىستىق مادەنيەت جانە حالىق شىعارماشىلىعى ورتالىعىنىڭ ديرەكتورى مەيىرجان نۇرعالي ۇلى.
ال اپتانىڭ جەكسەنبى كۇنى «كەرۋەن ساراي» تۋريستىك كەشەنى اۋماعىندا ءار اۋدان, قالا مەرەكەلىك كونتسەرت دايىنداپ, كورەرمەندەرگە ۇسىنادى. فەستيۆال قورىتىندىسى بويىنشا ۇزدىك دەپ تانىلعان كوركەمونەرپاز ۇجىمدارى جانە انشىلەردىڭ قاتىسۋىمەن گالا-كونتسەرت ۇيىمداستىرىلىپ, جەڭىمپازدار ماراپاتتالادى.
تۇركىستان
