«ساحنادان سالەم»

ورتالىق كوممۋنيكاتسيالار قىزمەتىندە وتكەن كەزەكتى بريفينگ استانا كۇنىنە ارنالعان مەرەكەلىك مادەني شارالاردىڭ ءبىرى – حالىقارالىق تەاتر فەستيۆالىنىڭ باستالعانىنا قاتىستى بولدى. بۇل جونىندە ق.قۋانىشباەۆ اتىنداعى قازاق مۋزىكالىق دراما تەاترىنىڭ كوركەمدىك جەتەكشىسى بولات ۇزاقوۆ, تەاترتانۋشى امانگەلدى مۇقانوۆ جانە ارمەنيالىق تەاتر جانە كينو رەجيسسەرى ەگيشە گەۆوركيان ايتىپ بەردى. بولات ۇزاقوۆتىڭ حاباردار ەتكە­نىندەي, «ساحنادان سالەم» اتتى حالىق­ارالىق تەاتر فەستيۆالى 1 شىلدە كۇنى وسىمەن ەكىنشى رەت ءوزىنىڭ شىمىلدىعىن اشقان. «بيىلعى فەستي­­­ۆالدىڭ ءبىر ەرەك­شەلىگى فەستيۆالدى حالىقارالىق دەڭ­گەيگە كوتەرۋ ماقسا­­تىندا وعان شەتەلدەردەن دە تەاتر ۇجىمدارىنىڭ قاتى­سىپ جاتقاندىعى, – دەدى ول وسى جونىندە. – سونداي-اق, وسى مادەني شاراعا شەتەل­دىك تەاتر سىنشىلارى مەن ساراپشىلارى دا شاقىرىلدى. ونداعى ەڭ باستى ماقسات فەستيۆالدىڭ اياسىن جىلدان-جىلعا كەڭەيتۋ بولىپ تابىلادى». ال فەستيۆالعا 13 تەاتر قاتىسادى ەكەن. ونىڭ ەكەۋى شەتەلدەن, ياعني تۇركيا مەن رەسەيدىڭ داعىستان رەسپۋبليكاسىنان كەلىپ وتىر. بولات ۇزاقوۆتىڭ اتاپ وتۋىنشە, فەستيۆالعا, سونداي-اق, استانا قالاسىنان ءتورت تەاتر قاتىسادى. سونىڭ ءبىرى – قۋىرشاق تەاترى. قالعاندارى ەلىمىزدىڭ وبلىستارىنان كەلمەك. استانا­­لىقتار مەن ەلوردا مەيماندارى 1-6 شىلدە ارالىعىندا شەتەلدىك جانە قازاق­ستاندىق تەاتر ۇجىمدارىنىڭ قويعان سپەكتاكلدەرىن تاماشالايتىن بولادى. قۋىرشاق تەاترلارىنىڭ قويىلىمدارى ساعات 11.00-دە, ال دراما تەاترلارىنىڭ سپەكتاكلدەرى ساعات 16.00-دە جانە 19.00-دە باستالادى. تەاتر فەستيۆالىنىڭ جابىلۋى 6 شىلدەگە جوسپارلانىپتى. «ەلىمىزدە 60-تان استام تەاتر بار. سول تەاترلاردىڭ حالىقارالىق, رەس­پۋبليكالىق جانە ايماقتىق دەڭگەيدەگى فەستيۆالدەرى ءجيى ءوتىپ تۇرادى, – دەدى كەلەسى كەزەكتە ءسوز العان تەاترتانۋشى امانگەلدى مۇقانوۆ. – ال بيىل ەكىنشى مارتە شىمىلدىعىن اشقان «ساحنادان سالەم» فەستيۆالىنىڭ ورنى ەرەكشە بولەك بولادى عوي دەگەن ويدامىز. وسىنداي شارالار ءبىزدىڭ تەاترلار ءۇشىن ازدىق ەتپەيدى. سەبەبى, فەستيۆال تىڭ ونەر تۋىندىلارىن كورەرمەندەر نازارىنا ۇسىنۋ, كاسىبي ماماندار اراسىندا پىكىر الىسىپ, تاجىريبە الماسۋ فۋنكتسياسىن اتقارادى». امانگەلدى مۇقانوۆ فەستيۆال­­­دىڭ حالىقارالىق دەڭگەيدەگى ماڭىز­دىلىعىنا دا توقتالىپ ءوتتى. ونىڭ ايتۋىنشا, سپەكتاكلدەردى تەلەديداردان كورۋ ءبىر باسقا, تەاترعا بارىپ تاماشالاۋ مۇلدە بولەك. ويتكەنى, ەرەكشە اسەر الاسىز, دەمالىپ قايتاسىز. ەكىنشى جاعىنان, وسىنداي فەستيۆالدار ارقىلى ەلىمىزدىڭ اكتەرلارى مەن رەجيسسەرلارى شەتەلدىك تەاتر ۇجىمدارىمەن ءوزارا پىكىر الماسا وتىرىپ, تاجىريبە جيناقتايدى. بىرىنەن ءبىرى ۇيرەنەدى. ال ارمەنيالىق رەجيسسەر ەگيشە گەۆوركيان قازاقستاننىڭ جاڭا استاناسىندا ءوتىپ وتىرعان حالىقارالىق تەاتر­ فەستيۆالىنىڭ بولاشاعى زور ەكەنىنە توقتالدى. «مەن استانا قالاسى قازىردىڭ وزىندە ۇلكەن ونەر ورداسىنا اينالعانىنا كۋا بولىپ وتىرمىن, – دەدى ول. – قالادا اسا اۋقىمدى بەس-التى ونەر شاڭىراقتارى جاڭادان سالىنىپتى. قىزىقتىردى, قايران قالدىردى. ال مۇنداي فەستيۆالدار شەتەلدىك تەاتر ۇجىمدارىنىڭ قازاقستاندىق ارىپتەستەرىمەن قارىم-قاتىناس جاساۋىنا تىكەلەي ىقپال ەتەدى. «ساحنادان سالەمنىڭ» حالىقارالىق دەڭگەيگە كوتەرىلەتىنىنە سەنىمدىمىن». ءاليسۇلتان قۇلانباي, «ەگەمەن قازاقستان».