مۇنىڭ ءبىر سەبەبى – كورشىلەس ەلدەردىڭ كوپتەگەن ءتۋريسى كۋرورتتى ايماقتارىمىزعا ساپارلايتىن اۆتوموبيل جولدارىنىڭ جاي-كۇيى سىن كوتەرمەيتىندىگىندە. ماسەلەن, قازاقستانداعى ءتۋريزمدى دامىتۋدا توپ-10-عا ەنگىزىلگەن كەلەشەگى كەمەل تۋريستىك باعىتتار سانالاتىن كوكشە وڭىرىندەگى ايگىلى بۋراباي جانە سولتۇستىك قازاقستان وبلىسىنىڭ ايىرتاۋ اۋدانىنداعى يمانتاۋ-شالقار كۋرورتتىق ايماقتارىنا جازعىتۇرىم رەسەي فەدەراتسياسىنان اعىلاتىن تۋريستەر سانىن كوبەيتۋ ءۇشىن رەسپۋبليكالىق ماڭىزداعى ومبى – كوكشەتاۋ تاس جولىنىڭ ءداۋىت ستانساسى مەن بيدايىق اۋىلى ارالىعىنداعى ابدەن توزعان شۇرق-تەسىك ۋچاسكەسىن قالپىنا كەلتىرمەي بولمايدى.
جۋىردا سولتۇستىك قازاقستان وبلىسى ءۋاليحانوۆ اۋدانىنىڭ ورتالىعى – كىشكەنەكول اۋىلىنىڭ ارداگەرلەرىمەن كەزدەسكەنىمىزدە, ولاردىڭ كوتەرگەن باستى ماسەلەسى دە وسى جول ۋچاسكەسىنىڭ «جىرى» بولدى.
«ەلىمىزدىڭ شەكاراسىندا ورنالاسقان بيدايىق اۋىلىنان ءداۋىت ستانساسىنا دەيىنگى 105 شاقىرىم اسفالت جول ويدىم-ويدىم بولعاندىقتان, جولاۋشىلاردىڭ زىقىسىن شىعارادى ءارى كولىكتىڭ دوڭعالاقتارىن دا ءبۇلدىرىپ تاستايدى. وگىزاياڭمەن قىرۋار ۋاقىتىڭ دا تەككە كەتەدى. ال بيدايىقتان ءارى رەسەي فەدەراتسياسىنىڭ ومبى وبلىسى باستالادى. جولى تاقتايداي تەگىس. سول جاقتان جازدا اتاقتى بۋراباي كۋرورتىنا جانە سۋى ءمولدىر شالقار مەن يمانتاۋ كولدەرىنە دەمالۋعا باراتىن ورىس-قازاق اعايىنداردىڭ سانىندا ەسەپ جوق. تەك وسى 105 شاقىرىم جول ولاردىڭ جۇيكەسىن توزدىرىپ, «الەمدەگى وزىق 30 ەلدىڭ قاتارىنا قوسىلۋدى ماقسات تۇتقان قازاقستان وسى ما؟» دەپ سىناپ جاتادى. ولاردىڭ الدىندا ءوز مەملەكەتىمىز ءۇشىن ۇيالىپ, كوزىمىزبەن جەر شۇقيمىز. وسى ماسەلە حاقىندا ون شاقتى جىلدان بەرى وبلىس باسشىلارىنا دا, پارلامەنت سەناتى مەن ءماجىلىسىنىڭ دەپۋتاتتارىنا دا تالاي مارتە شاعىندىق. تەك بيىل عانا داۋىتتەن كىشكەنەكولگە دەيىنگى جول ۋچاسكەسىن جوندەۋگە قارجى ءبولىنىپتى دەپ ەستىدىك. بۇل جۇمىستىڭ ءوزى 27 ايعا سوزىلماقشى ەكەن. ال بيدايىققا دەيىنگى 55 شاقىرىم جولدىڭ قاشان قالپىنا كەلتىرىلەتىنى بەلگىسىز. ويتكەنى ونىڭ جوبالىق-سمەتالىق قۇجاتتاماسى ءالى كۇنگە جاسالماپتى. ۇكىمەتىمىز ءتۋريزمدى دامىتامىز دەپ جالاڭ ۇرانداتقانشا, كۋرورتتارعا باراتىن جولداردى تۇزەمەي مە؟!» دەستى كىشكەنەكولدىك اقساقالدار.
ءيا, رەسەيلىك تۋريستەر الدىندا تاۋەلسىز مەملەكەتىمىزدىڭ بەدەلىن ءتۇسىرىپ ءارى سولتۇستىك قازاقستان وبلىسى ءۋاليحانوۆ جانە اقجار اۋداندارى تۇرعىندارىنىڭ بارىس-كەلىسىن قيىنداتىپ, تيتىقتارىنا ءتيىپ تۇرعان رەسپۋبليكالىق ماڭىزداعى ا-13 كوكشەتاۋ – ومبى اۆتوموبيل جولىنىڭ جاي-كۇيىن يندۋستريا جانە ينفراقۇرىلىمدىق دامۋ مينيسترلىگىنىڭ جوعارى لاۋازىمدى شەنەۋنىكتەرى ادەيىلەپ بارىپ ءوز كوزدەرىمەن كورمەسە, ونى قالپىنا كەلتىرۋ ءىسى تاعى دا سوزباققا سالىنۋى مۇمكىن. سونداي-اق الاكول مەن بالقاش كولدەرىنىڭ جاعاسىنداعى تۋريستىك ورىندارعا باراتىن اۆتوموبيل جولدارىنىڭ جاعدايى دا جەتىسىپ تۇرعان جوق. ونىڭ ۇستىنە, جولاۋشىلاردىڭ جۇيكەسىنە تيەتىن جۇزدەگەن شاقىرىم ساپاسىز جولداردىڭ بويىندا جايلى دارەتحانالار مەن زاماناۋي سەرۆيس وبەكتىلەرىنىڭ جوقتىعى دا تۋريستەردى كوپتەپ تارتۋعا كەدەرگى كەلتىرەتىنى انىق.
قازاقستان رەسپۋبليكاسىنىڭ تۋريستىك سالاسىن دامىتۋدىڭ 2026 جىلعا دەيىنگى تۇجىرىمداماسىندا ءتۋريزمنىڭ ەلىمىزدىڭ ىشكى جالپى ونىمىندەگى ۇلەسىن 8,2 پايىزعا جەتكىزۋ مىندەتى قويىلعان. ونى جۇزەگە اسىرۋعا اتالعان تۇجىرىمدامانى ازىرلەگەن مادەنيەت جانە سپورت مينيسترلىگى عانا ەمەس, ورتالىق جانە جەرگىلىكتى اتقارۋشى ورگانداردىڭ بارلىعى جاۋاپتى. تەك ولار «اققۋ – كوككە, شورتان – كولگە, شايان – شولگە تارتقان» ايگىلى مىسالداعىداي بىلەك بىرىكتىرە الماي جاتسا, كوزدەگەن ماقساتتىڭ ورىندالۋى ەكىتالاي. بۇل رەتتە جاڭا ۇكىمەت تۋريزم سالاسىنا كەشەندى كوزقاراسپەن قاراپ, ءوزىنىڭ ۇيلەستىرۋشىلىك فۋنكتسياسىن پارمەندىلىكپەن قولدانسا, قۇبا-قۇپ.
