جەر ابدەن قارايمايىنشا, ارقانى كەڭگە سالۋعا ەرتەرەك. سوندىقتان دا جەرگىلىكتى اتقارۋشى بيلىك قاۋىپ توندىرگەن ايماقتاردى باقىلاۋدا ۇستاپ وتىر. بۇعان دەيىن ءمالىم بولعانىنداي, وڭىردە قىزىل سۋ ءجۇرۋى مۇمكىن دەگەن 146 ەلدى مەكەن بار. بىراق بۇگىنگى تاڭعا دەيىن ولاردىڭ ەشقايسىنان جامانات حابار تۇسپەدى.
وبلىس اكىمى ەرماعانبەت بولەكپاەۆ توتەنشە جاعدايلار دەپارتامەنتىنىڭ باستىعى مۇرات قاتپانوۆپەن سۋ تاسۋى مۇمكىن ۋچاسكەلەردى جاقىندا ارنايى ارالاپ كورىپ, قاداعالاۋدى ودان ءارى كۇشەيتتى. ول ۋچاسكەلەر – نۇرا جانە شەرۋباي-نۇرا وزەندەرىنىڭ ارناسىنداعى اۋماق. اتاپ ايتقاندا, قارقارالى, بۇقار جىراۋ, شەت جانە اباي اۋداندارىنىڭ قاۋىپتى ۋچاسكەلەرى باقىلاۋدا. سونىمەن قاتار ەلدى مەكەندەر ماڭىنداعى گيدروتەحنيكالىق قۇرىلىمدار دا قاتاڭ قاداعالاۋدا. سۋ ارناسىنان اسقان تۇستا سەپتىگى تيەر توپىراق ۇيىندىلەرى مەن بوگەتتەر دە نازاردان تىس قالمادى.
مۇرات قاتپانوۆتىڭ ايتۋىنشا, قاردىڭ كۇرت ەرىپ, ابىگەرگە سالعانى ازىرگە بايقالمايدى.
– اقتوعاي جانە شەت اۋداندارىنىڭ سولتۇستىك اۋماقتارى, بۇقار جىراۋ اۋدانىنىڭ وڭتۇستىك-باتىس بولىگى, وساكاروۆ اۋدانىنىڭ باتىس بولىگى جانە نۇرا وزەنىنىڭ ارناسى بويىنشا نۇرا اۋدانىنىڭ سولتۇستىك-شىعىسىنىڭ از بولىگى ءالى دە قار استىندا.
قاردىڭ جىلدام ەرۋىنە ناۋرىزدىڭ باسىنداعى جىلى كۇندەر, جاۋىن-شاشىن, كۇزگى جاۋىن-شاشىننىڭ ادەتتەگى قالىپتان تومەن تۇسكەندىگى دە اسەر ەتتى. وزەندەردىڭ ارناسىنان اسۋى مەن سۋ مولشەرىنىڭ ارتۋى تىركەلگەن جوق, – دەدى مۇرات قاتپانوۆ.
وزەندەردە مۇزدى ۇساقتاۋ, بۇرعىلاۋ جانە كەسۋ ۇنەمى جۇرگىزىلىپ كەلدى. بۇل ورايدا بۇقار جىراۋ, وساكاروۆ, قارقارالى جانە اقتوعاي اۋداندارىندا جالپى اۋدانى 7000 شارشى مەتر بولاتىن 17 ۋچاسكە قامتىلدى.
4845 سۋ وتكىزۋ قۇبىر, 187 شاقىرىم كانال مەن ارىق, 463 كوپىر قاردان ارشىلدى. 143 شاقىرىم سۋ وتەتىن ترانشەيا جاسالدى. قازىرگى ۋاقىتتا دا سۋ تاسقىنىنا قارسى جۇمىستار سايابىرسىعان جوق.
قاراعاندى
