– قالانىڭ جەو جۇمىسىندا ۇلكەن كەمشىلىكتەر بار, جاڭا مەنشىك يەسى قاڭتاردان باستاپ ماسەلەنى شەشە قويايىن دەپ ق ۇلىق تانىتپادى. 3 ملرد تەڭگەدەن اسا قارىزدارى جانە بار. مازۋت, كومىر جەتكىزۋ دە ۇلكەن پروبلەما بولىپ وتىر. ەلەكتر ەنەرگياسى جاعىنان دا سۇراق كوپ. قاراشا ايىنداعى شۇعىل جوندەۋ, قالپىنا كەلتىرۋ جۇمىستارىن جۇرگىزگەن كومپانيالاردىڭ ەڭبەكاقىسى دا تولەنبەگەن كورىنەدى. ەندى مىنە, تاعى دا ءورت شىقتى, جارىلىس بولدى, – دەيدى وبلىس اكىمى دانيال احمەتوۆ.
قىستاي جىلۋعا جارىماعان ريددەر قالاسىنىڭ تۇرعىندارى بۇل ماسەلەدەن ابدەن زارەزاپ بولعان. پاتەرلەردىڭ سۋىقتىعىنا ۇيرەنىسىپ تە كەتكەن سەكىلدى. ۇيرەنىسىپ دەيمىن, امالدىڭ جوقتىعى عوي. اتويلاپ اكىمدىكتىڭ ەسىگىندە جۇرسەڭ دە, بۇل ماسەلەنىڭ ءتۇيىنى جۋىق ارادا شەشىلە قويادى دەگەنگە سەنۋ قيىن.
– ريددەردە ءالى قىس. كۇن كوزى شىققانمەن, ءتۇن سۋىق. قىستاي جىلۋ قۇبىرلارى قانجىلىم عانا بولىپ تۇردى. سوڭعى ءبىر اپتا ءۇي ءىشى, تىپتەن سۋىپ كەتتى. قازاندىققا جاڭا قوجايىن كەلدى دەگەندى ەستىپ, ماسەلە شەشىلەر دەپ ويلاپ ەدىك, بەكەر ەكەن. بيىل اۋپىرىمدەپ, جازعا ىلىنەرمىز. ەندى كەلەر قىسقا دەيىن ءبارىن جوندەپ قويسا عوي, – دەيدى ريددەردىڭ تۇرعىنى ءماۋليا دونەنباەۆا.
بۇل, البەتتە, بارلىق قالا تۇرعىنىنىڭ تىلەگى. ەندىگى كەزەكتەگى كۇرمەۋى قيىن پروبلەمانى شەشۋدىڭ جالقى جولى جىلۋ ورتالىعىن كوممۋنالدىق مەنشىككە بەرۋ دەسەدى وبلىس باسشىلىعى. قازىر وبلىس اكىمىنىڭ ايتۋىنشا, وتىن مەن قاجەتتى جابدىقتى جەتكىزۋ ماسەلەلەرى تولىعىمەن شەشىلدى. الايدا مەكەمەنىڭ قارىزى 3 ملرد تەڭگەدەن اسىپ كەتتى.
سونىمەن قاتار شقو پروكۋراتۋراسى ماماندارىن تارتا وتىرىپ, كاسىپورىن قىزمەتىنە تەكسەرۋ جۇمىستارى جۇرگىزىلدى. ناتيجەسىندە, «ريددەر جەو» اق-نىڭ تەحنيكالىق جاي-كۇيى تالاپقا تولىق ساي ەمەس ەكەنى انىقتالدى. رەسمي مالىمەتكە سەنسەك, 240-تان اسا زاڭ بۇزۋشىلىقتار انىقتالعان.
پروكۋراتۋرانىڭ قاداعالاۋ اكتىلەرى بويىنشا ۋاكىلەتتى ورگاندار جەو باسشىلىعىنا قاتىستى 11 ملن تەڭگەدەن اسا سوما مولشەرىندە اكىمشىلىك جازا قولدانىپ, بۇزۋشىلىقتاردى جويۋ تۋرالى نۇسقاما شىعاردى. ونىمەن قويماي, پروكۋرورلىق تەكسەرۋ كەزىندە تابيعي مونوپوليالار تۋرالى زاڭنامانى بۇزۋ, ياعني 548 ملن تەڭگە سوماسىنا تاريفتىك سمەتا مەن ينۆەستيتسيالىق باعدارلاما قاراجاتىن ماقساتسىز جۇمساۋ انىقتالدى.
وبلىس اكىمى دە جاڭا ينۆەستوردىڭ جابدىقتاردى جوندەۋگە قاراجات جۇمساماعانىن ايتادى. ناتيجەسىندە, ەكىنشى قايتارا توتەنشە جاعداي جاريالانىپ, قازاندىق جۇمىستارىن جۇرگىزۋدى وبلىس باسشىلىعى ۋاقىتشا ءوز قولىنا الدى.
– ءبىز ريددەر جەو-نىڭ جاڭا يەسىنەن ءۇمىت جوق ەكەنىن كورىپ وتىرمىز. سوندىقتان, مەنىڭ ويىمشا, جىلۋ كوزىن كوممۋنالدىق مەنشىككە بەرۋ كەرەك, – دەدى د.احمەتوۆ.
ريددەر قالاسى
