وبلىستىق ءبىلىم باسقارمالارى باسشىلارىنىڭ, پەداگوگيكالىق جوعارى وقۋ ورىندارى رەكتورلارىنىڭ جانە ۆەدومستۆولىق باعىنىستى ۇيىمداردىڭ باسشىلارىنىڭ قاتىسۋىمەن ەكى مينيسترلىكتىڭ بىرلەسكەن كەڭەسى ءوتتى. ءىس-شاراعا قاتىسقان جۇزدەن استام مامان پەداگوگ كادرلاردى ساپالى دايارلاۋدىڭ وزەكتى ماسەلەلەرىن, نەگىزگى باسىمدىقتار مەن ولاردى شەشۋ جولدارىن تالقىلادى. سونداي-اق بىرلەسكەن ىنتىماقتاستىق, جاس مۇعالىمدەردى دايارلاۋ جانە ولاردىڭ قۇزىرەتتىلىگىن ارتتىرۋ ماسەلەلەرى كوتەرىلدى.
وقۋ-اعارتۋ ءمينيسترىنىڭ مىندەتىن اتقارۋشى عاني بەيسەمباەۆتىڭ ايتۋىنشا, كادر ساپاسى مەن پەداگوگ مارتەبەسىن ارتتىرۋ بويىنشا كەشەندى جۇمىستار جالعاسىپ جاتىر. كەيىنگى ءتورت جىلدا مۇعالىمدەر جالاقىسىنىڭ ەكى ەسە ءوسۋى – سونىڭ دالەلى.
– مينيسترلىكتىڭ باسىم مىندەتتەرىنىڭ ءبىرى – ءبىلىم بەرۋ ۇيىمدارىن جوعارى بىلىكتى كادرلارمەن قامتاماسىز ەتۋ جانە ءبىلىم بەرۋ جۇيەسىندەگى مەنەدجمەنتتى جاقسارتۋ. مىقتى باسشىلاردى ىرىكتەۋ جانە دايارلاۋ باعدارلاماسى ازىرلەنىپ جاتىر. تولىققاندى زەرتتەي وتىرىپ, جوعارى بىلىكتى پەداگوگتەر بازاسىن جانە مەكتەپ ديرەكتورلارىنىڭ كادرلىق رەزەرۆىن قۇرۋ جونىندەگى قاعيدالاردى ازىرلەۋ قاجەت. مەملەكەت باسشىسىنىڭ تاپسىرمالارىن ورىنداۋ ماقساتىندا قازىر پەداگوگيكالىق جوعارى وقۋ ورىندارىنىڭ ى.التىنسارين اتىنداعى ۇلتتىق ءبىلىم اكادەمياسىمەن جانە ءبىلىم باسقارمالارىمەن ءوزارا ءىس-قيمىلىن كۇشەيتۋ وتە ماڭىزدى, – دەيدى عاني بەيسەمباەۆ.
كەڭەستە عىلىم جانە جوعارى ءبىلىم ءمينيسترىنىڭ مىندەتىن اتقارۋشى ساياسات نۇربەك ءسوز الىپ, پەداگوگيكالىق ءبىلىم بەرۋدى دامىتۋ بويىنشا اتقارىلىپ جاتقان ءىس-شارالار تۋرالى ايتتى.
– مەملەكەت باسشىسى ءبىلىم بەرۋ سالاسىنا وزگەرىستەر ەنگىزەتىن 1 مىڭ كوشباسشى دايارلاۋدى تاپسىردى. وسى تاپسىرمانى ورىنداۋ ءۇشىن مينيسترلىك جاڭا فورماتسياداعى مەكتەپتەردىڭ توپ-مەنەدجەرلەرىن دايارلاۋدى جوسپارلاپ وتىر. ول ءۇشىن ەلىمىزدەگى ۇزدىك جوعارى وقۋ ورىندارىنىڭ بازاسىندا جەتەكشى مەكتەپتەردى تارتا وتىرىپ, ماگيستراتۋرانىڭ ارنايى باعدارلامالارى ىسكە اسىرىلادى. پەداگوگيكالىق ءبىلىم بەرۋدى اككرەديتتەۋ «پەداگوگ» كاسىبي ستاندارتىنا نەگىزدەلەدى. «پەداگوگ قۇزىرەتتىلىگىنىڭ شەڭبەرىن» قابىلداۋ ماقساتىندا مينيسترلىك «جوعارى وقۋ ورىندارىنىڭ وقىتۋشىسى» كاسىبي ستاندارتىنىڭ جوباسىن ازىرلەدى. بۇل ستاندارت جوعارى وقۋ ورىندارىنىڭ اكادەميالىق ەركىندىگىن ەسكەرە وتىرىپ نەگىزدەمەلىك سيپاتتا جۇزەگە اسادى. سونداي-اق «جايلى مەكتەپ» جوباسى اياسىندا مۇعالىمدەردى دايارلاۋ ماقساتىندا جىل سايىن پەداگوگيكالىق باعىتتارعا 7 مىڭ گرانت ءبولۋ جوسپارلانىپ وتىر. وقۋ-اعارتۋ مينيسترلىگىمەن بىرلەسىپ, پەداگوگتەرگە ارنالعان بىلىكتىلىك تەستى ازىرلەنەدى, – دەدى ساياسات نۇربەك.
باسقوسۋ قورىتىندىسى بويىنشا زاماناۋي ساپالى پەداگوگتەردى دايارلاۋ ماسەلەلەرى جونىندە ۆەدومستۆوارالىق كەڭەس قۇرۋ تۋرالى شەشىم قابىلداندى. كەڭەس كادرلاردىڭ ساپاسىن ارتتىرۋ جانە ءبىلىم بەرۋ ۇيىمدارىن جوعارى بىلىكتى ماماندارمەن قامتاماسىز ەتۋ جونىندەگى جۇمىستى جالعاستىرادى.
