الماتى قالاسى ساڭىراۋلار قوعامىنىڭ ونەرپازدارىنان قۇرالعان «ورلەۋ» شىعارماشىلىق ۇجىمى قازاق ساحناسىندا العاش رەت ءوز ونەرلەرىن پاش ەتتى. وندا دا كوڭىل كوتەرەتىن جەڭىل قويىلىمدى ەمەس, بەلگىلى جازۋشى شىڭعىس ايتماتوۆتىڭ «عاسىردان دا ۇزاق كۇن» شىعارماسى جەلىسىمەن «ماڭگۇرت» قويىلىمىن ساحنالادى. ءوز جادىن جوعالتىپ, شىققان تەگىن, تۋعان ءتىلىن, تاريحىن ۇمىتۋدىڭ قانشالىق اۋىر تراگەديا ەكەنىن جاس ۇرپاققا, ادامزاتقا ەسكەرتىپ وتىرۋ – بۇگىنگى جاھاندانۋ زامانىندا ەڭ وزەكتى ماسەلە دەسەك, ارتىق ايتقانىمىز ەمەس.
يدەيا اۆتورى جانە قويۋشى رەجيسسەرى – الماتى قالاسىنداعى ەستۋ جانە كورۋ مۇمكىندىگى شەكتەۋلى جانداردىڭ مادەني دەمالىسىن ۇيىمداستىرۋمەن اينالىساتىن «دەمالىس» ءبولىمىنىڭ باسشىسى, كينورەجيسسەر, قازاقستاننىڭ مادەنيەت قايراتكەرى عازيزحان ءادىلحانوۆ جانە يشارا جاعىنان دايىنداعان جانار قادىرقىزى بەكتۇرعانوۆا.
ال رولدەردى سومداعان ءالىم مەڭدىباەۆ (جۋان-جۋاندار قوجايىنى), ءبىرجان ءابدىراشيتوۆ (قوجايىن كومەكشىسى), لاۋرا كورولەۆا (نايمان-انا), ەلدوس مارات ۇلى (جولامان), قۇلداردى بەينەلەگەن اناستاسيا سامويلوۆا, الەنا ريازانوۆا, نۇرسۇلتان ورازاليندەردىڭ ساحنادا نانىمدى بەينە شىعارۋ ءۇشىن بار ىقىلاستارىن سالىپ ەڭبەكتەنگەنى كورىنىپ تۇردى. بۇلار – تاعدىردىڭ جازۋىمەن ەستۋ قابىلەتىنەن ايىرىلسا دا, تۋمىسىنان ونەر دەسە ىشكەن اسىن جەرگە قوياتىن, اسا سەزىمتال, ومىرگە ەرەكشە عاشىق جاندار.
ايتا كەتەيىك, وتكەن جىلدىڭ 7-13 قاراشاسىندا بۇل ۇجىم ماسكەۋ قالاسىنا ارنايى بارىپ, «يشارا اۋماعى» V حالىقارالىق فەستيۆالىنە قاتىسىپ قايتقان. «ورلەۋ» شىعارماشىلىق ۇجىمى رەسەيدىڭ تۇكپىر-تۇكپىرىنەن كەلگەن 17 ونەر ۇجىمىمەن قاتار فەستيۆالدىڭ العاشقى كۇنى-اق ماسكەۋ جۇرتشىلىعىن مۇڭدى دا استارلى «ماڭگۇرت» قويىلىمىمەن ءدۇر سىلكىندىرسە, تاشكەنتتەن كەلگەن «شىعىس ازيا» ۇجىمى كوز قارىقتىرار سۇلۋ كوستيۋمدەرىمەن, سازدى اۋەندەرىمەن «الاددين» ەرتەگىسىن قويدى. ءسويتىپ, فەستيۆالدىڭ «ەڭ ۇزدىك ساحنالىق كوستيۋم» اتالىمىن جەڭىپ العان الا تاقيالى اعايىندار وسى جولى الماتىعا كەلىپ, جارق-جۇرق ەتكەن ونەرىن تاعى ءبىر تاماشالاتتى. كورشىلەردىڭ بۇل گاسترولدىك ساپارى تۋىسقاندارىن قولداپ-قولپاشتاۋى دەپ باعالادىق. «ورلەۋ» ونەرپازدارىنا الداعى ونەر دودالارىندا ساتتىلىك تىلەيمىز.
گۇلجانات تاۋبايقىزى,
ستۋديا جەتەكشىسى
