رەسەي مەن بەلارۋس بۇل تالاپقا كونە مە, الدە جوق پا, ول جاعى ازىرگە بەلگىسىز. كونسە, وسى ەكى مەملەكەتتىڭ سپورتشىلارى جەڭىسكە جەتكەن جاعدايدا ولاردىڭ ءانۇرانى شىرقالىپ, بايراقتارى كوكتە جەلبىرەمەيدى. ول كەزدە ءبىز تەك حوك-تىڭ تۋىن عانا كورەمىز. بىرقاتار مەملەكەت بۇل تالاپتى ورىندى دەپ ەسەپتەپ, تولىقتاي قولداپ وتىر. كەيبىرەۋلەرى, تىپتەن, رەسەيلىك جانە بەلارۋسسيالىق سپورتشىلاردى تورتجىلدىقتىڭ باستى دوداسىنان مۇلدە شەتتەتۋدى تالاپ ەتۋدە. وسى كۇردەلى ماسەلەنىڭ قالاي شەشىلەتىنىن الداعى ۋاقىتتا بىلەتىن بولامىز.
ءيا, «سپورت – ساياساتتان تىس» دەگەنىمىزبەن, ساياساتتىڭ بۇل سالاعا تىكەلەي ىقپالى بارىنا جوعارىداعى جاعداي ايقىن دالەل. رەسەي مەن بەلارۋستەن بولەك, اتالعان ۇيىم اۋعانستان, يران, گۆاتەمالا جانە ۇندىستانعا دا قاتتى شۇيلىگىپ وتىر. ونىڭ دا وزىندىك سەبەبى بار. ماسەلەن, حوك اۋعان بيلىگىن ايەلدەر قۇقىعىن شەكتەگەنى ءۇشىن ايىپتايدى. 2021 جىلعا دەيىن ولار سپورتپەن ەش الاڭسىز اينالىسىپ كەلگەن ەدى. بىراق «تاليبان» قوزعالىسى قايتا بيلىككە كەلگەننەن كەيىن قاتاڭ شەكتەۋ قويىلدى. ەگەر بۇل تالاپ ورىندالماسا, نازىك جاندىلار عانا ەمەس, ولاردىڭ باپكەرلەرى مەن وتباسى مۇشەلەرى دە قۋعىن-سۇرگىنگە ۇشىراپ, تۇرمەگە توعىتىلادى.
يرانداعى جاعداي دا شامامەن سونداي. ءيا, پارسى ەلىنىڭ قىزدارىنا سپورتپەن شۇعىلدانىپ, ءتۇرلى جارىسقا قاتىسۋعا رۇقسات بەرىلگەنى راس. بىراق شەكتەۋ كوپ. اتاپ ايتساق, ايەلدەر باسەكەگە تەك حيدجابپەن شىعۋلارى كەرەك. جارىس كەزىندە دە, ودان كەيىن دە ونى شەشۋگە بولمايدى. فۋتبول ماتچتارىن كورۋ ءۇشىن بۇرىمدىلار ستاديونعا كەلسە, تاياققا جىعىلىپ, زورلىق-زومبىلىققا ۇشىرايدى. ول از دەسەڭىزدەر, بالۋاندارعا ءيزرايلدىڭ وكىلدەرىمەن كۇش سىناسۋعا استە بولمايدى. ەگەر جارىس جولىندا قوس مەملەكەت وكىلدەرىنىڭ جولدارى قيىسسا, يراندىقتار كۇرەسپەي-اق جەڭىستى قارسىلاسىنا بەرە سالادى. ارينە, بۇل – ناعىز ابسۋرد! سونىمەن قاتار يرانداعى ءدۇمپۋ كەزىندە بىرنەشە تانىمال سپورتشى ناقاقتان ناقاق تەمىر تورعا قامالسا, كەيبىرەۋى ءولىم جازاسىنا كەسىلدى. وسىنداي وقيعالاردىڭ سالدارىنان پارسى ەلىنىڭ ازاماتتارى وتانىنان قاشىپ, جات مەملەكەتتەردەن پانا تاپتى. قازىرگى كەزدە كەيبىر سپورتشىلار باسقا ەلدەردىڭ تۋى استىندا تابىستى ونەر كورسەتىپ جاتىر.
حوك گۆاتەمالانى «ۇلتتىق وليمپيادا كوميتەتىنىڭ (ۇوك) توراعاسىن سايلاۋ بارىسىندا «بارماق باستى, كوز قىستى» ارەكەت ورىن الدى» دەپ ايىپتاپ وتىر. وسىدان ءبىراز ۋاقىت بۇرىن حەراردو رەنە اگيررە وستمانن اتالعان ۇيىمنىڭ باسشىسى بولىپ سايلانعان ەدى. الايدا ونىڭ باستى باسەكەلەسى, كەزىندەگى تانىمال فۋتبولشى حورحە الەكساندر روداس بۇل شەشىممەن كەلىسپەي, قۇزىرلى ورگاندارعا شاعىم ايتتى. اربيتراجدىق سوت روداستىڭ سايلاۋدا جەڭىسكە جەتكەنىن جاريا ەتتى. بىراق وستماننىڭ جىلى ورنىن بوساتقىسى جوق. وسى ەكى شەنەۋنىكتىڭ تەكەتىرەسىنىڭ كەسىرىنەن گۆاتەمالا سپورتى زارداپ شەگىپ وتىر. بۇل كۇندەرى ولار جارىستارعا تۋسىز شىعىپ ءجۇر. ەگەر الداعى ۋاقىتتا وسى ماسەلە وڭ شەشىلمەسە, وندا جازا بۇدان دا قاتاڭ بولاتىنى انىق.
«داۋدىڭ باسى دايرابايدىڭ كوك سيىرى» دەمەكشى, بىلتىر ءۇندىستاندا جاڭا سپورت كودەكسى قابىلداندى. بۇل قۇجات حوك-تىڭ حارتياسىنا ساي بولمادى. سونىمەن قاتار جەرگىلىكتى سپورتشىلار مەن وسى سالاعا دەمەۋشىلىك كورسەتىپ جۇرگەن ءىرى كومپانيالاردىڭ دا كوڭىلىنەن شىقپادى. سودان داۋ-داماي تۋىندادى. العاشىندا وعان ۇندىلەر اسا ءمان بەرمەدى. دەرەۋ ىسكە كىرىسكەن حوك بىرقاتار سانكتسيا ەنگىزدى. سول كەزدە عانا سەڭ قوزعالا باستادى. قازىر ازداعان ىلگەرىلەۋ بار. ونىڭ ۇستىنە, بيىل حوك-تىڭ كەزەكتى كونگرەسى مۋمبايدا وتەدى. مىنە, سول كەزدە بارلىق ماسەلە وڭ شەشىلەدى دەگەن ويدامىز.
