استانا. 2 شىلدە. بۇگىن تاڭ الدىندا سالۆادور قالاسىندا بەلگيا مەن اقش قۇرامالارى اراسىنداعى 1/8 فينالدىق ويىن اياقتالدى. ونىڭ نەگىزگى ۋاقىتى 0:0 ەسەبىمەن تەڭ ءبىتتى. ال وۆەرتايمدا بەلگيالىقتار 2:1 ەسەبىمەن جەڭىسكە جەتتى. بۇل تۋرالى egemen.kz حابارلادى.
ماتچ باستان-اياق كەسكىلەسكەن تىرەس ۇستىندە ءوتتى. ونىڭ ونە بويىندا بەلگيالىقتار ايتارلىقتاي باسىمدىق تانىتتى. بۇل كوپتەگەن مۇمكىندىكتەردىڭ جۇزەگە اسىرىلماعان ماتچى بولدى. ولاردىڭ دەنىن ەۋروپالىقتار جاسادى.
بەلگيا – اقش 2:1. نەگىزگى ۋاقىت – 0:0. وۆەرتايم – 2:1.
2 شىلدە. 2 يۋليا. سالۆادور. «فونتە-نوۆا» ستاديونى. تورەشى - دجامەل حايمۋدي (الجير).
بەلگيا: تيبو كۋرتۋا, توبي الدۆەرۆەيرەلد, ۆەنسان كومپاني, يان ۆەرتونگەن, اكسەل ۆيتسەل, كەۆين دە بريۋينە, مارۋان فەللايني, دانيەل ۆان بيۋيتەن, ەدەن ازار (ناسەر شادلي, 112), دريس مەرتەنس (كەۆين ميرالياس, 61), ديۆوك وريگي (رومەلۋ لۋكاكۋ, 91).
اقش: تيم حوۆارد, ومار گونسالەس, مايكل برەدلي, مەتت بەسلەر, داماركۋس بيزلي, كلينت دەمپسي, الەحاندرو بەدويا (دجۋليان گرين, 107), دجەرمەين دجونس, گرەم زۋسي (كريس ۆوندولوۆسكي, 73), دجەفف كەمەرون, فابيان دجونسون (دەاندرە يەدلين, 32).
گول: كەۆين دە بريۋينە (93), رومەلۋ لۋكاكۋ (105), دجۋليان گرين (107).
ەسكەرتۋلەر: ۆەنسان كومپاني (42) - دجەفف كەمەرون (18),
برازيليا الاڭدارىندا ەڭ سوڭعى شيرەك فينالعا قاتىسۋشىنى انىقتاۋعا ارنالعان بۇل ماتچ سالعاننان قىزىقتى باستالدى. ويىننىڭ 1-مينۋتىندا اقش قۇراماسى قاقپاسى الدىندا قاۋىپتى ءسات تۋدى. «قىزىل فۋريا» شابۋىلشىسى ديۆوك وريگي قورعاۋشىنىڭ جانىنان جالت بەرىپ ءوتىپ, ايىپ الاڭىنىڭ ىشىندە ءبىرىنشى سوققىنى جاسادى. قيىس بۇرىشتان ۇرىلعان بۇل دوپتى قاقپاشى تيم حوۆارد اۋتقا جىبەرىپ, العاشقى بۇرىشتاما سوققىسىنىڭ بەرىلۋىنە جول اشتى. بەلگيالىقتار بۇدان كەيىن دە
ويىن تىزگىنىن ءوز ۋىسىنان شىعارا قويعان جوق.
اقش فۋتبولشىلارى وزدەرىنىڭ ءبىرىنشى قاۋىرت شابۋىلدارىن 21-مينۋتتا جاسادى. ونىڭ اقىرى كلينت دەمپسيدىڭ قاقپاعا سوققى جاساۋىمەن اياقتالدى. ونىڭ ۇرعان دوبىن قاقپاشى تيبو كۋرتۋا قۇلاپ جاتىپ قاعىپ الدى.
ال ارادا ەكى مينۋت وتكەندە اقش فۋتبولشىلارى الاڭ ورتاسىندا دوپتان ايرىلىپ قالدى. ونى الا شاپقان بەلگيالىقتار زۋىلداپ قارسى جاققا جەتىپ كەلدى. اۋەلى يان ۆەرتونگەن ايىپ الاڭىنا كىردى دە, سول قاناتتاعى كەۆين دە بريۋينەگە جەتكىزدى. بىراق سوڭعىسىنىڭ سوققىسى ساتسىزدەۋ ورىندالدى.
ەكىنشى تايمدى دا بەلگيا قۇراماسى قارقىندى باستادى. كوماندا, اسىرەسە, 54-60-مينۋتتار ارالىعىندا امەريكالىقتار قاقپاسى الدىندا بىرنەشە قاۋىپتى ساتتەر تۋعىزىپ, ەسەپ اشىپ كەتە جازدادى. بىراق بۇعان سوققىلاردىڭ دالدىگى جەتىسپەي جاتتى. ارا-اراسىندا قارسىلاستارىنىڭ قارسى جورىقتارىنا جول بەرىپ قويىپ تۇرعان «قىزىل فۋريا» بۇدان ارى دا قىسىم جاساۋىن توقتاتپادى. بۇلاردىڭ اراسىندا دا قاقپاعا ءتۇسىپ كەتە جازداعان دوپتار بولدى. سولاردىڭ بىرىندە 72-مينۋتتا ديۆوك وريگي امەريكالىقتار قاقپاشىسىنىڭ قىراعىلىعىن تاعى بايقاپ كوردى. ال تيم حوۆارد وعان دايىن بولىپ شىقتى. وسىنداي ساتتەر 76, 78 جانە 79-مينۋتتاردا دا ورىن الدى. 85-مينۋتتا تاعى قاقپاشى بەلگيالىق فورۆاردتىڭ ۇرعان دوبىن ماڭدايشادان اسىرىپ جىبەردى. بۇل ارالىقتا «قىزىل فۋريا» بەرگەن بۇرىشتامالارىندا دا ەسەپ جوق. ال امەريكالىقتار ەكىنشى تايمدا مۇنداي قۇرمەتكە ءبىر رەت تە يە بولا المادى.
بەلگيا قۇراماسى ءوز قاقپاسىنا جاسالعان شابۋىلدان كەيىن 88-مينۋتتا تاعى جويقىن جورىققا شىقتى. ونىڭ سوڭى قاقپاعا دوپ ۇرۋمەن اياقتالدى. وسى ساتتە تيم حوۆارد تاعى دوپتى قاقپا سىرتىنا جىبەردى. وسىدان كەيىن دە ەۋروپالىقتار ەكى رەت گول سوعۋ مۇمكىندىگىن الدى. الايدا, سوڭعى مەزەتتە ساتتىلىك جەتپەي جاتتى. ال ويىنعا قوسىلعان ەڭ سوڭعى مينۋتتا امەريكالىق كريس ۆوندولوۆسكي قاقپا الدىندا تۇرىپ ۇرعان دوبىن اسپانداتىپ جىبەردى. وسىمەن نەگىزگى ۋاقىت 0:0 بولىپ ءتامامدالدى.
قوسىمشا تايم الدىڭعى كەزەڭدەردەگى قارقىننىڭ باسىلماعانىن كورسەتتى. تاعى دا قۇيىنداي قۇيعىتقان شابۋىلدارعا كەزەك كەلدى. سولاردىڭ ءبىرى 93-مينۋتتا جاسالدى. الدىمەن رومەلۋ لۋكاكۋ وڭ قاپتالدا دوپقا تالاستى جەڭىپ شىقتى. ول سوسىن قاقپا الاڭىنا قاراي زۋىلدادى. بىراق ونىڭ سوققىسى ءدال بولمادى. ال قاقپاشىنىڭ اياعىنان قايتقان دوپ كەۆين دە بريۋينەنىڭ وڭ جامباسىنا كەلە قالدى. سوققى! ونىڭ جەرلەتىپ ۇرعان دوبى باعاننىڭ ءدال جانىنان ءوتىپ, تورعا كۇمپ ەتە ءتۇستى. گول! بۇدان كەيىن اقش فۋتبولشىلارى جاندانا ءتۇستى. ەكى جاقتىڭ الما-كەزەك شابۋىلى اراسىندا مۇحيتتىڭ ارعى جاعالاۋىنان شىققاندار دا بىرنەشە قاۋىپتى سوققىلار جاساي ءبىلدى.
ايتكەنمەن, كەزدەسۋدىڭ سوڭى بەلگيا قۇراماسىنىڭ باسىمدىعىن تاعى ءبىر گولعا اينالدىرىپ شىعا كەلدى. ونى وسىنىڭ الدىنداعى گولعا قاتىسى بولعان, ويىنعا قوسىلعانىنا كوپ بولماعان لۋكاكۋ ءتۇسىردى. بۇدان ءارى ادام تۇسىنبەستەي جاعداي بولىپ كەتتى. الاڭعا ەندى عانا شىققان امەريكالىق دجۋليان گرين 107-مينۋتتا الدىنا كەلگەن دوپتى توقتاتپاستان ۇرىپ, قاقپاعا كۇمپ ەتكىزدى – 1:2. بۇل از بولسا, وسىنىڭ ارتىنشا امەريكالىقتار ەسەپتى تەڭەستىرىپ كەتۋگە ءسال-اق قالدى. ال سونىڭ سوڭىن الا بەلگيا قۇراماسى ەسەپتى ۇلعايتۋدىڭ تاعى ءبىر مۇمكىندىگىن جىبەرىپ الدى. بۇدان كەيىن تاپ وسىنداي مۇمكىندىك اقش قۇراماسىندا دا بولدى.
ويىننىڭ اقىرعى مينۋتتارى ەكى جاقتىڭ كەزەكپە-كەزەك شابۋىلدارى ۇستىندە اياقتالدى.
ەندى بەلگيا قۇراماسى 5 شىلدە كۇنى وتەتىن شيرەك فينالدىق ماتچتا ارگەنتينا قۇراماسىمەن كەزدەسەدى.
دامير قوجامقۇل.
دەرەككوز: egemen.kz.
فوتو: Sportbox.ru.
