باقىتتى بالالىقتىڭ جايناعان جازى الاتاۋ اياسىندا, الماتى كوشەلەرىندە جالاۋىن جەلبىرەتتى

بالالاردى قورعاۋ كۇنىنىڭ تاماشا مەرەكەسى اۋەلى ورتالىق مادەنيەت جانە دەمالىس ساياباعىندا شات-شادىمان بالالار شەرۋىمەن باستالدى. كوپتەگەن كونتسەرتتەردى, فەستيۆالدەردى, كونكۋرستار مەن جارىستاردى ءبىر ارناعا توعىستىرعان اۋقىمدى اكتسيا ء“بىز سەنىڭ بالالارىڭبىز, قازاقستان! ءبىز جاڭا الەمدە ءومىر سۇرەمىز” ۇرانىن تۋ ەتىپ, قازاقستاننىڭ ازاماتتىق اليانسىنىڭ “بىرلىگىمىز جاراسقان” اتتى اقپاراتتىق-الەۋمەتتىك ناۋقانى اياسىندا ءوتتى. مەرەكەگە ۇيىتقى بولعان قالا اكىمدىگى, مەملەكەتتىك جانە كوممەرتسيالىق قۇرىلىمدار جاس جەتكىنشەكتەردىڭ ۇمىتىلماس جارقىن سالتاناتىن ءبىر جەڭنەن قول, ءبىر جاعادان باس شىعارعان ءبىراۋىزدى ۇيىمشىلدىقپەن وتكىزدى. ساياباقتىڭ جازعى الاڭىندا تاڭ سارىدەن ءان قانات قاقتى. مۇندا بالالار شىعارماشىلىعىنىڭ “بالعىن بالالىق شاق” ءداستۇرلى فەستيۆالى اشىلدى. ودان سوڭ جيىلعان جاس قاۋىم “مەيىرىم” فەستيۆالىنىڭ قورىتىندى گالا-كونتسەرتىن تاماشالادى. جاس كورەرمەندەر الدىندا بالالار ۇيلەرىنىڭ جانە دەنساۋلىعى كەمىس بالالاردى ەمدەۋ مەكەمەلەرىنىڭ جاس جەتكىنشەكتەرىمەن بىرىگىپ رەسپۋبليكالىق جانە حالىقارالىق كونكۋرستاردىڭ لاۋرەاتى ماقسات جاۋتىكوۆ تاسپاعا تۇسىرگەن فەستيۆال گيمنى العاش رەت ورىندالدى. جەڭىمپازداردىڭ گالا-كونتسەرتى الماتى بالالار قۇقىعىن قورعاۋ دەپارتامەنتىنىڭ, مارات وسپانوۆ اتىنداعى قوعامدىق قوردىڭ جانە “بوزتورعاي” مق قوعامدىق قورىنىڭ قولداۋىمەن ءوتتى. البەتتە, بۇل يگىلىكتى ىسكە قالا اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا دا مۇددەلىلىكپەن اتسالىستى. جاس ورىنداۋشى دارىندار فەستيۆال دەمەۋشىلەرىنەن گراموتالار, ديپلومدار, ەستەلىك جۇلدەلەر مەن سىيلىقتار الدى. ال ۇيىمداستىرۋشىلار گيمن جازىلعان ديسكىلەردى سىيعا تارتتى. مارات وسپانوۆ اتىنداعى قور پرەزيدەنتى باقىت وسپانوۆانىڭ ايتۋىنا قاراعاندا, بيىل بۇل شاراعا دەمەۋشىلەر ىقىلاسى مول بولىپ, مۇنىڭ ءوزى ينتەرنات مەكەمەلەرىن جاقسى ىنتالاندىرعان. بيىلعى مەرەكەنىڭ ءبىر ەرەكشەلىگى, ول ءوزىنىڭ جالعاسىن تاپپاق. جەڭىمپاز بالالار ءۇشىن ترەنينگتەر ۇيىمداستىرىلاتىن بولىپ شەشىلدى. دەمەك, ولاردىڭ ومىردەن ءوز ورىندارىن تابۋىنا مۇمكىندىك تە مول بولماق. بۇلدىرشىندەر الدىندا مەملەكەتتىك قۋىرشاق تەاترىنىڭ ارتىستەرى ونەر كورسەتتى. بالالار سۋرەتىنىڭ كونكۋرسىنا قاتىسۋشىلار اسفالت ۇستىندە وزدەرىنىڭ ازيادا تۋرالى تانىم-تۇسىنىكتەرىن بەينەلەدى. سپورت الاڭدارىندا وتباسىلىق ەستافەتالار, سپارتاكيادالار جانە مەكتەپكە دەيىنگى بۇلدىرشىندەردىڭ ونەر سايىستارى وتكىزىلدى. بۇل كۇن الاتاۋ اياسىنداعى باقىتتى بالالىقتىڭ جارقىن كورىنىسىندەي بولدى. بالمۇزداق تا, ءتاتتى ليموناد تا, قوعامدىق كولىكتە ءجۇرۋ دە تەگىن. بالاعا باقىتتى بولۋ ءۇشىن قامسىز-مۇڭسىز شۋاق كۇلكىدەن ارتىق نە كەرەك. قورعانبەك امانجول, “ەگەمەن قازاقستان”.