سۋرەتتى تۇسىرگەن ەرلان ومار, «EQ»
اگرارلى ءوڭىردىڭ بىردەن ءبىر جەتىستىگى – ەگىن سالاسى. حالقى دا سوعان بەيىمدەلگەن. بيىل فەرمەرلەر جىلداعىداي ەمەس, ىسكە بەلسەنە كىرىستى. وبلىستىق اۋىل شارۋاشىلىعى باسقارماسى باسشىسىنىڭ ورىنباسارى باقتيار شامپيكوۆتىڭ سوزىنە سۇيەنسەك, شارۋالارعا بەرىلگەن كومەك تە بىلتىرعىعا قاراعاندا ەداۋىر كوبىرەكتەۋ. دەمەك ەڭبەك ەتەم دەگەن ادامعا ەش كەدەرگى جوق.
«وسى جىلى ەگىس القاپتارىن ءارتاراپتاندىرۋ اياسىندا قانت داقىلدارىنىڭ القابى ەكى ەسەگە جۋىق ۇلعايتىلىپ, 8,1 مىڭ گەكتار بولدى. مەملەكەت باسشىسىنىڭ تاپسىرماسىمەن, سونداي-اق قانت قىزىلشاسىن دامىتۋدىڭ كەشەندى جوسپارلارىن ورىنداۋ ءۇشىن اۋىل شارۋاشىلىعى تاۋارىن وندىرۋشىلەردى قولداۋ شارالارى جۇرگىزىلەدى. اتاپ ايتساق, ولارعا تۇقىم ماسەلەسىمەن, مينەرالدى تىڭايتقىشتارمەن جانە قارجىلىق قولداۋ كورسەتۋ بويىنشا قامتاماسىز ەتۋ جاعى قاراستىرىلعان. بيىل بىزگە قاجەتتى ەگىس بىرلىگى 11,4 مىڭ بولسا, ونىڭ 10 مىڭىن كوكسۋ قانت زاۋىتى قامتاماسىز ەتىپ وتىر. قازىردىڭ وزىندە شارۋا قوجالىقتارى 4 مىڭعا جۋىق ەگىس اگرەگاتىن تاڭداپ العان», دەيدى ب.شامپيكوۆ.
ونىڭ ايتۋىنشا, كوكتەمگى دالا جۇمىستارىنا كوكسۋ قانت زاۋىتى 700 ملن تەڭگە كولەمىندە قارجىلاي قولداۋ كورسەتپەك. شارۋالار ديزەل وتىنىمەن قامتاماسىز ەتىلدى, بيىلعا جوسپارلانعان 10 مىڭ توننا ديزەل وتىنىنىڭ 3,2 مىڭ تونناسى مۇناي بازالارىنا جەتكىزىلدى. باعاسى ليترىنە –212 تەڭگە.
جالپى, كوكتەمگى ەگىن ەگۋ ۇدەرىسى تۇراقتى ءجۇرىپ جاتىر. تەحنيكا اۋىل شارۋاشىلىعى جۇمىستارىن جۇرگىزۋگە تولىقتاي دايىن.
قاراڭىز, 2022 جىلى 9,1 ملرد تەڭگەگە 546 بىرلىك تەحنيكا ساتىپ الىنعان. بيىل تاعى 650 تەحنيكا ساتىپ الۋ جوسپارلانعان. قازىرگى تاڭدا اۋىل شارۋاشىلىعى قۇرىلىمدارىندا 9,7 مىڭ تراكتور, 1,5 مىڭ تۇقىم سەپكىش جانە 11,9 مىڭ توپىراق وڭدەيتىن تەحنيكا بار. كوكتەمگى دالا جۇمىستارىنا جالپى دايىندىق 97 پايىزدى قۇراپ وتىر.
تاعى ءبىر ايتا كەتەرلىك جايت, بۇگىندە نەسيەلەر قارجى ينستيتۋتتارى ارقىلى بەرىلىپ جاتىر. جالپى, كوكتەمگى دالا جۇمىستارىنا «كەڭ دالا» جانە «اگروبيزنەس» باعدارلامالارى اياسىندا 5 ملرد تەڭگە ءبولۋ جوسپارلانۋدا. قازىردىڭ وزىندە 585 ملن تەڭگە نەسيە بەرىلگەن. جالپى, كوكتەمگى دالا جۇمىستارىنىڭ دايىندىعى مەن جۇرگىزىلۋى ءجىتى باقىلانىپ وتىر.
جەتىسۋ وبلىسى
