جەرلەستەرى مۇحيت تۇرسىنوۆقا ءۇش بولمەلى پاتەر مەن «كيا ريو» اۆتوكولىگىن سىيعا تارتتى
ميلليونداعان كورەرمەندى تەلەديدارعا تەلمىرتىپ, بارشا قازاقستاندىقتاردى باۋراعان, ەلباسى نۇرسۇلتان نازارباەۆتىڭ جۇلدەسىنە ارنالعان «قازاقستان بارىسى» ءتۋرنيرىنىڭ جەڭىمپازى مۇحيت تۇرسىنوۆتى شىعىسقازاقستاندىقتار اۋەجايدان زور قوشەمەتپەن قارسى الدى. ءوسكەمەننىڭ حالىقارالىق اۋەجايى الدىندا جيىلعان جۇرتتا قيساپ جوق.
تەرمينالدان شىعا بەرىستە مۇحيت باستاعان سايىپقىران ۇلداردى ءوڭىر باسشىسى بەردىبەك ساپارباەۆ باستاعان قالىڭ قاۋىم ىستىق ىقىلاسپەن قۇتتىقتاپ جاتسا, ءنازيرا قىزدار گۇل شوقتارىن سىيلاپ, اق كيمەشەكتى اجەلەر شاشۋلارىن شاشتى. «قازاقتىڭ قانىنان بولىنبەگەن ءۇش ونەرى بار: الامان بايگە, ايتىس جانە قازاق كۇرەسى» دەپ زاڭعار جازۋشى مۇحتار اۋەزوۆ ايتقانداي, توپىراعىندا بالۋاندىقتىڭ قۇنارى بار, جەرگە قاراتپاس بالۋان ۇلانى بار شىعىس – ەجەلدەن بالۋاندارعا باي ولكە. سوندىقتان ءجانادىل اتاەۆ, توقان بازارحانوۆ, سامات رامازانوۆ, داۋلەت تۇرلىحانوۆ سىندى داڭقتى بالۋاندار تاربيەلەگەن ءوڭىردىڭ بيىل ەكىنشى مارتە «قازاقستان بارىسى» اتاعىن جەڭىپ الۋى زاڭدىلىق.
سپورت ارداگەرى, ەركىن كۇرەستەن كسرو سپورت شەبەرى, كسرو ەڭبەك سىڭىرگەن جاتتىقتىرۋشىسى توقان بازارحانوۆ ءدۇبىرلى دودادا ەل مەرەيىن تاسىتقان مۇحيتتى قۇشاعىنا قىستى.
دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆ شىعىسقازاقستاندىقتاردى جەڭىسىمەن قۇتتىقتاي وتىرىپ, قازاق كۇرەسىنىڭ قاناتىن كەڭگە جايىپ كەلە جاتقانىن جەتكىزدى.
بۇدان سوڭ «قازاقستان بارىسى – 2014» جەڭىمپازىن ورتاعا العان قاۋىم وبلىس ورتالىعىنداعى حاكىم ابايدىڭ ەسكەرتكىشىنە تاعزىم ەتىپ, گۇل شوقتارىن قويدى. بالۋانعا قۇرمەت كورسەتۋ شاراسى ودان ءارى ەرتىس وزەنىنىڭ جاعاسىنداعى امفيتەاتردا جالعاستى.
– بالۋان شولاق, ءيمانجۇسىپ, قاجىمۇقان اتالارىمىز سالعان سارا جولدى شالقار جولامانوۆ, ايبەك نۇعىماروۆ سىندى باۋىرلارىمىز جالعاستىرىپ, ەل مەرەيىن ۇستەم ەتتى. مىنە, ەندى مۇحيت تۇرسىنوۆ شىعىستىڭ داڭقىن قازاقستانعا, تەلەديدار ارقىلى تاماشالاعان جۇزگە جۋىق ەلدەرگە پاش ەتتى. پرەزيدەنت جۇلدەسى ءۇشىن ءتورتىنشى رەت وتكەن «قازاقستان بارىسى» تۋرنيرىنە تاڭداۋلى دەگەن 28 بالۋان قاتىستى. مۇحيت باۋىرىمىز اباي مەن شاكارىمنىڭ, مۇحتاردىڭ, قاسىمنىڭ تۋعان جەرىنىڭ ابىرويىن اسقاقتاتتى. بۇل – ءوڭىرىمىز ءۇشىن ەكىنشى جەڭىس! بىلتىر ايبەك جەڭىسپەن ورالسا, ونىڭ الدىندا ايبەك – كۇمىس, شالقار – قولا بەلبەۋ يەگەرى اتانعانى ەسىمىزدە. ياعني, شىعىس ەلىنىڭ قاسيەتتى جەر ەكەنىن, وڭىردەن شىققان ازاماتتاردى ءار ۋاقىتتا اتا-بابالاردىڭ ارۋاقتارى قولداپ جۇرەتىنىن كورەمىز, – دەدى ايماق باسشىسى بەردىبەك ساپارباەۆ.
ايماق باسشىسى «قازاقستان بارىسى» ءتۋرنيرىنىڭ جەڭىمپازى مۇحيت تۇرسىنوۆقا سەمەي قالاسىنان ءۇش ءبولمەلى پاتەر مەن سۋ جاڭا وتاندىق «كيا ريو» اۆتوكولىگىنىڭ كىلتىن سىيلادى.
فيلا حالىقارالىق كۇرەس تۇرلەرى قاۋىمداستىعىنىڭ كوميتەت توراعاسى گينتاۋتاس ۆيلەيتا دا اقجارما تىلەگىن اقتاردى.
– سپورتشىلارىڭىز بيىك ونەر كورسەتتى. كەزدەيسوق ەشتەڭە جوق. بۇل – زاڭدىلىق. جارىستان سوڭ تەلەديداردى قوسسام, پرەزيدەنتتىڭ شىعىس قازاقستانعا جاساعان جۇمىس ساپارىن كورسەتىپ جاتىر ەكەن. ەلباسى وڭىردەگى جۇمىستاردى وڭ باعالادى. اسىرەسە, سپورتقا ۇلكەن كوڭىل بولىنگەنىن بايقادىم. شىعىس – باتىرلاردىڭ ولكەسى. بۇل جىگىتتەردى كورگەن ۇرپاق بۇگىن-اق سپورت سەكتسيالارىنا جازىلا باستايدى. مەن كەلەشەكتە قازاقستاندى دامىعان 30 ەلدىڭ ساپىندا سپورتى دا جولعا قويىلعان ەل رەتىندە ەلەستەتەمىن, – دەگەن گ.ۆيلەيتا 2017 جىلى جەكپە-جەك ونەرىنەن بۇكىلالەمدىك ويىندار وتەتىنىن, وندا سپورتتىڭ 20 تۇرىنەن سايىس بولاتىنىن, ونىڭ ىشىندە قازاق كۇرەسى دە بار ەكەنىن جەتكىزدى. وسى جارىستىڭ الدىندا, ياعني 2016 جىلى قۇرلىقتىق جانە الەمدىك چەمپيوناتقا ىرىكتەۋ ويىندارىن وسكەمەندە وتكىزۋدى ۇسىندى.
بالۋاننىڭ اكەسى ءارى باپكەرى شىڭعىس تۇرسىنوۆ مۇحيتتىڭ 11 جاسىنان باستاپ كىلەمگە شىققانىن, 14 جىل بويى كۇرەسپەن اينالىسىپ كەلە جاتقانىن, جەڭىمپاز بولعانىنا ەرەكشە قۋانىشتى ەكەندىگىن اتاپ ءوتتى.
ال تەمىر بىلەكتى, قايسار جۇرەكتى مۇحيت تۇرسىنوۆ وزىنە ۇلكەن قولداۋ كورسەتكەن جەرلەستەرىنە, ءوڭىر باسشىسى بەردىبەك ساپارباەۆقا, دەنەشىنىقتىرۋ جانە سپورت باسقارماسىنىڭ باسشىسى ءابىل ءدوڭبايعا, سەمەي مەملەكەتتىك مەديتسينا ۋنيۆەرسيتەتىنىڭ رەكتورى تولەباي راحىپبەكوۆكە جانە جاتتىقتىرۋشىلارعا ريزاشىلىعىن ءبىلدىردى.
– ايبەك پەن شالقار اعالارىمنىڭ جەڭىستى جولىن جالعاستىرۋ وڭايعا تۇسكەن جوق. قارسىلاستارىمنىڭ بارلىعى ءبىر-ءبىر ءوڭىردىڭ تۋىن كوتەرىپ كەلگەن بىرەگەي بالۋاندار. وتكەن جىلى سەمەي, بيىل زايسان قالاسىندا وتكەن حالىقتىق سپورت ويىندارىندا «قازاقستان بارىسى» تۋرنيرىنە جولداما العان بالۋاندارعا زور قۇرمەت كورسەتىلىپ, ەل-جۇرت اق باتاسىن بەرىپ شىعارىپ سالدى. تۋعان ەلىمنىڭ تىلەگىنىڭ ارقاسىندا جەڭىسكە جەتتىم. ەندى «ەۋرازيا بارىسى», ازيا چەمپيوناتى سىندى جارىستارعا ازىرلەنەمىن, – دەدى مۇحيت تۇرسىنوۆ.
بالۋانىن ارداقتاعان كەش سوڭى مەرەكەلىك كونتسەرتپەن جالعاستى. مۇحيتتىڭ بوز كىلەمدەگى جەڭىستى ساتتەرى كورىنىس تاپقان فوتوسۋرەتتەردى قۇشاقتاعان ءجاسوسپىرىم بالالاردىڭ قولتاڭباعا تالاسىپ جاتۋى قازاق كۇرەسىنىڭ جاڭا تۇرپاتقا يە بولعانىن تاعى دا ايشىقتاي تۇسكەندەي!
دۋمان اناش,
«ەگەمەن قازاقستان».
وسكەمەن.
سۋرەتتەردى تۇسىرگەن
ەسىمحان ورىنباەۆ.
