ورتالىق ازيا تەحنولوگيالىق فورۋمى اياسىندا وتكەن بايقاۋعا بارلىعى 114 ءوتىنىم تۇسكەن, ونىڭ 39-ى قازاقستاننان بەرىلگەن. بايقاۋدا جەڭىسكە جەتكەن وتاندىق ستارتاپتار – Astana Hub مۇشەلەرى. ماسەلەن, Networks Energy ستارتاپى تەمىرجول كولىگىن وڭدەۋ جانە تەمىرجول سالاسىنداعى بيزنەس-ۇدەرىستەردى اۆتوماتتاندىرۋعا ارنالعان IT-پلاتفورما جاساۋ ارقىلى كۇللى ايماقتىڭ تەحنولوگيالىق سەكتورىنا ايتارلىقتاي اسەر ەتكەنى ءۇشىن «ورتالىق ازياداعى جىل سەرپىنى» اتاعىنا يە بولدى. اتالعان كومپانيانىڭ ارقاسىندا ەلىمىز تەمىرجول تاسىمالى ۇدەرىستەرىن اۆتوماتتاندىرۋعا جول اشاتىن بىرەگەي ونىمگە قول جەتكىزىپ, IBM نەمەسە SAP تەحنولوگيالىق الپاۋىتتارىنىڭ ليتسەنزياسى مەن شەشىمدەرىنسىز جۇمىس ىستەۋگە مۇمكىندىك الدى.
– ورتالىق ازيا ايماعىنداعى IT-تەحنوپاركتەردىڭ كوڭىلىنەن شىعۋ – ءبىز ءۇشىن ۇلكەن مارتەبە. بۇل ماراپات كومپانيانىڭ قازاقستاندى ايماقتاعى كولىكتىك جانە تسيفرلىق حابقا اينالدىرۋداعى ۇزدىكسىز كۇش-جىگەرىنىڭ ماڭىزدىلىعىن كورسەتەدى. ءبىزدىڭ كوماندا وڭىردەگى لوگيستيكالىق سالادا وزىق تەحنولوگيالاردى ازىرلەۋ جانە ەنگىزۋ بويىنشا ءوز ميسسياسىن جالعاستىرادى, – دەدى Networks Energy باس ديرەكتورى باقىت ەرجانوۆ.
وتاندىق ونەرتاپقىش ءارى پەداگوگ رۇستەم ەرمەكوۆ «ورتالىق ازياداعى جىلدىڭ IT-پەداگوگى» اتالىمىندا ۇزدىك دەپ تانىلدى. ول 2021 جىلى «30-عا دەيىنگى Forbes»-ءتىڭ تىزىمىنە ەندى, سونىمەن قاتار QBit – روبوتتەحنيكاعا ارنالعان قازاقستاندىق جيناقتى جاساعانى ءۇشىن Saby قورىنىڭ گرانتىن جەڭىپ الدى.
– ءبىلىم سالاسىندا جۇرگەنىمە 6 جىلداي بولدى. جۇمىسىم تازا ەنتۋزيازمعا نەگىزدەلگەن. سەبەبى دۇرىس ءبىلىم بەرۋ جانە سىني تۇرعىدان ويلاۋدى دامىتۋ ارقىلى الەمدەگى قوردالانعان ماسەلەلەردى شەشۋگە بولاتىنىنا سەنىمدىمىن. قازىرگى ۋاقىتتا ءارتۇرلى ءبىلىم بەرۋ شەشىمدەرىن ازىرلەپ جاتىرمىز. نەگىزگى ونىمدەرىمىزدىڭ ءبىرى – QBit, بالالارعا STEM ينجەنەرياسىن, روبوتتەحنيكانى جانە باعدارلامالاۋدى ۇيرەتۋگە ارنالعان جيناق. جاقىندا micro:lab شاعىن تسيفرلىق زەرتحانامىزدى دا ىسكە قوسامىز, – دەپ جوسپارىمەن ءبولىستى رۇستەم ەرمەكوۆ.
قازاقستان اتىنان قاتىسقان تاعى ءبىر جوبا – Red_mad_robot central asia «ەڭ جىلدام دامىپ كەلە جاتقان IT-كومپانيا – ەكسپورت – شەتەلدە اقپاراتتىق-كوممۋنيكاتسيالىق تەحنولوگيا قىزمەتتەرىنىڭ اۋتسورسينگى» اتالىمىندا جەڭىسكە جەتتى. كومپانيا شاعىن جانە ورتا كاسىپكەرلىككە بيزنەس باعىتتارى بار امبەباپ بانكتەر ءۇشىن قارجىلىق جانە قارجىلىق ەمەس قىزمەتتەرگە ارنالعان تسيفرلىق پلاتفورمالار ازىرلەيدى.
«Central Asian Tech Awards – 2023» بايقاۋىنا قىرعىزستاننىڭ جوعارى تەحنولوگيالىق پاركى, Astana Hub, IT Park Uzbekistan جەتەكشىلەرى جانە ورتالىق ازيانىڭ IT-يندۋسترياسىنىڭ باسقا دا ساراپشىلارى قازىلىق ەتتى. ورتالىق ازيا تەحنولوگيالىق فورۋمى ورتالىق ازيا, جاپونيا, گەرمانيا, وڭتۇستىك كورەيا جانە اقش-تان كەلگەن 50-دەن اسا IT-كومپانيا مەن 600 قاتىسۋشىنىڭ باسىن قوستى.
