ۇلتتىق ونەردى جاڭعىرتۋ مەن وركەندەتۋ ماقساتىندا «التىن ادام» جەتىسۋ شەبەرلەرى ورتالىعى كوپ جۇمىس اتقاردى. بۇعان دەيىن تەكەلى قالاسى مەن پانفيلوۆ, كەربۇلاق, اقسۋ اۋداندارىنان فيليالىن اشقان ورتالىق, بىلتىر تەكەلى قالاسىنان مۇمكىندىگى شەكتەۋلى جانداردىڭ قولونەرىن دامىتاتىن «مامانيا» مەكتەبىنىڭ شەبەرلىك ورتالىعىن قۇرعان ەدى. ەندى, مىنە, كەزەك سارقان قالاسىنا دا كەلىپ جەتتى.
– قاشاندا جاڭا يدەيالار مەن باستامالارعا اۋدان اكىمدىگى تاراپىنان قولداۋ تانىتىپ كەلەمىز. اسىرەسە قوعامنىڭ ءالسىز توبى ەسەپتەلەتىن كوپبالالى انالار, مۇمكىندىگى شەكتەۋلى جانداردى جىگەرلەندىرەتىن باستامالار بولسا, قۋانا قۇپتايمىز. «التىن ادام» جەتىسۋ شەبەرلەرى ورتالىعى «اۋدان ورتالىعىنان مۇمكىندىگى شەكتەۋلى جاندارعا ۇلتتىق ونەردى ۇيرەتىپ, ولاردىڭ جاساعان, تىككەن بۇيىمدارىن جۇرتقا كورسەتىپ, ەلگە قىزمەت, قامكوڭىل جاندارعا دەمەۋ بەرسەك» دەگەن ءوتىنىش تۇسكەن سوڭ, اۋدان اكىمىمەن بىرگە مۇقيات قاراپ, بۇل ۇسىنىسقا كومەكتەسۋدى ءجون كوردىك. سونىمەن اۋداندىق مادەنيەت ۇيىنەن كەڭ دە جارىق ءارى جۇمىس ىستەۋگە قولايلى ورىن دايىنداپ بەردىك. ەندى وسى جەردە اۋدانداعى قولونەرگە قىزىعاتىن جاستار شەبەرلەردەن ءتالىم الىپ, وزدەرىنىڭ ونەرىن شىڭداپ, جۇرتقا قىزمەت ەتەتىن بولادى, – دەدى سارقان اۋدانى اكىمىنىڭ ورىنباسارى الماس اجارحان ۇلى.
ۇسىنىستارىنىڭ وسىلاي تەز شەشىلگەنىنە ريزاشىلىعىن بىلدىرگەن «التىن ادام» جەتىسۋ شەبەرلەرى ورتالىعىنىڭ ءتورايىمى دينارا باكىروۆا اۋدان باسشىلارىنا العىسىن ءبىلدىرىپ, ورتالىق قۇرىلعاننان بەرگى 2 جىلدا اتقارعان جۇمىسىنا ەسەپ بەرىپ, الداعى جوسپارلارىمەن تانىستىردى.
وسى رەتتە «التىن ادام» جەتىسۋ شەبەرلەر ورتالىعىنىڭ سارقان اۋداندىق فيليالىنىڭ ءتورايىمى كەنجەتاي تازابەكوۆا جەرگىلىكتى قولونەرشىلەردىڭ قازىرگى كۇننىڭ باسەكەلەستىگىنە توتەپ, رەسپۋبليكالىق, وبلىستىق بايقاۋلار دا توپ جارىپ جۇرگەنىن تىلگە تيەك ەتتى. سول قاتاردا كوپبالالى انا, جاس قولونەرشى نازيگۇل باتىرحانقىزىنىڭ شەبەرلىگىن ايرىقشا اتاپ كەتتى.
جەتىسۋ وبلىسى
