قاسيەتتى اتا قونىستى لەۆ تولستويدىڭ «ياسنايا پولياناسىنداي» قىلماساق تا, ادامدار ىزدەپ كەلەتىن كورىكتى مەكەنگە اينالدىرساق دەگەن وي ءماشھۇر ۇرپاقتارىنا مازا بەرمەيتىن. ونىڭ ۇستىنە بۇل ءماشھۇر اتا ارۋاعىنا تاعزىم ەتە كەلۋشىلەردىڭ دە ارمان-تىلەگى ەدى. ءماشھۇر اتانىڭ ءىزى قالعان, شيپالى بۇلاعى اعىپ جاتقان قاسيەتتى قونىستى جاڭعىرتۋ, جاڭالاۋ, قالپىنا كەلتىرۋدىڭ ءساتى 2021 جىلدىڭ 19 مامىرىندا اتا شوبەرەسى اباي شاراپيەۆ قۇرعان ء«ماشھۇر ءجۇسىپ» قوعامدىق قورى ارقىلى باستاۋ الدى. 2020 جىلدىڭ 6 ماۋسىمىندا قور توراعاسى اباي شاراپيەۆ ەكەۋمىز اتا قونىسىن كورىكتەندىرۋدىڭ سىزباسىن سىزىپ, جوباسىن جاسادىق. ەسەپشوتتا ءبىر تيىن جوق. ويىمىز – 1 گەكتار اۋماقتى قورشاۋ, سول جەرگە اعاش وتىرعىزۋ, بۇلاق كوزىن اشۋ, باياناۋىلدان سامارقانعا, ەدىل بويىنا دەيىن مىنگەن ارباسىن قالپىنا كەلتىرۋ.
قۇدايدىڭ قۇدىرەتى, ءدال وسىلاي باستالعان جۇمىسىمىزعا قولداۋ بىلدىرۋشىلەر كوبەيە بەردى. ا.شاراپيەۆپەن قىزمەتتەس بولعان بەرىك ساعىندىقوۆ قورشاۋ جابدىقتارىن تاۋىپ بەردى. كەرەكۋلىك داۋلەت ەسىمدى كاسىپكەر تامىز-جەلتوقسان ارالىعىندا اۋماقتى قورشاپ شىقتى. كەسەنەگە ءتاۋ ەتۋگە كەلگەن ب.نۇرجانوۆ اتىنداعى گرەس-1 ستانساسىنىڭ جىگىتتەرى بۇلاق پەن ءۇيدىڭ ارالىعىنا 20 ءتۇپ قايىڭ, 20 ءتۇپ تەرەك وتىرعىزدى. سونداي-اق قاراعاندى, كوكشەتاۋ, استانا, ەكىباستۇز قالالارىنان كەلگەن جاندار دا جيىنى 40-تان اسا شيە, شىرشا, قاراعاش سەكىلدى اعاشتاردىڭ كوشەتىن سىيلادى. قورشالاتىن اۋماقتاعى وي-شۇڭقىردى تەگىستەۋ جۇمىستارىن ەكىباستۇز قالاسىن كوگالداندىرۋمەن اينالىساتىن «فلورا» سەرىكتەستىگىنىڭ باسشىسى الەكسەي گوربۋنوۆ ءوز موينىنا الدى.
رەسپۋبليكاعا بەلگىلى ونەرتاپقىش, استانالىق عالىم نۇرماعابەت نۇرپەيىسوۆ بۇلاق كوزىنە ساراپتاما جاسادى. بۇلاق كوزى بىلعانباس ءۇشىن ب.نۇرجانوۆ اتىنداعى گرەس-1 ستانساسىنىڭ قارجى ديرەكتورى نۇرلان جاركەنوۆ باستاعان ازاماتتار بۇلاقتىڭ ءۇستىن كۇركەلەپ جاۋىپ بەردى. وسىلايشا, بۇلاق توبەسى, اينالاسى جابىلىپ, ونىڭ سۋىن قۇبىر ارقىلى سىرتقا شىعارىپ, سۋ تۇندىرعىش شىعىر قۇدىق جاساپ, بورەنە اعاشپەن شەگەندەدىك. شىعىر قۇدىقتى اعاش شەبەرى قانات ابلەشەۆ قونا جاتىپ رەتتەپ بەردى. بۇلاق اينالاسىن قاجەتتى ماتەريالدارمەن كومكەرۋگە, قوسىمشا قۇدىق قازۋعا, بۇلاق پەن ءۇي اراسىنا دەمالاتىن سامالجاي جاساۋعا تالعات ماسىعۇتوۆ دەمەۋشىلىك كورسەتتى. وتكەن جىلدىڭ قىركۇيەك ايىندا ەكسكاۆاتوردىڭ كومەگىمەن بۇلاق بويىنىڭ 60 مەتر جەرى بەلۋاردان قازىلىپ, ەنى دە كەڭىدى. ماقساتىمىز – سۋى جەرگە ءسىڭىپ, قورىسقا اينالىپ جاتقان بۇلاق ءىشىن, جىلعاسىن تاسپەن كومكەرۋ.
جازۋشى ديحان ابىلەۆ پەن ءماشھۇردىڭ نەمەرەسى تولەۋباي شاراپيەۆتىڭ سيپاتتاۋى بويىنشا, ءماشۇر اتا مىنگەن تراشپەنكە اربانىڭ نوباي سۋرەتىن سالىپ, اۋىلدىق جەردەن دايىن اربا دوڭعالاقتارىن ىزدەستىردىك. شۇعا اۋىلىنىڭ ازاماتى قاۋاش شىلتىباەۆ 4 دوڭعالاق اكەلىپ بەردى. ەكىباستۇزدىق ۇستا تەمەش تايجامالوۆ ءبىر اي مەرزىمدە تراشپەنكەنى قۇراستىردى.
جاز بويى ەلىمىزدىڭ تۇكپىر-تۇكپىرىنەن, رەسەيدىڭ تۇمەن, ءنوۆوسىبىر ولكەلەرىنەن كەلۋشىلەر سانى تولاستامادى. وسى ورايدا ەكىباستۇز قالاسىنىڭ №36, 18, 22 جانە «زەردە» مەكتەپتەرىنىڭ وقۋشىلارى مەن مۇعالىمدەرى, «قاينار» مادەني ورتالىعىنىڭ بالالارى, پاۆلودار قالاسىنداعى مەكتەپتەردىڭ وقۋشىلارى اعاش وتىرعىزۋعا, سۋارۋعا قولعابىس جاساعانىن ايتا كەتكەن ءجون. قارجىلاي كومەك كورسەتكەندەر دە كوپ بولدى. ەكىباستۇز قالاسىنداعى №36 مەكتەپتىڭ ديرەكتورى گۇلنار كەڭەسقىزى, №22 گيمنازيانىڭ ۇستازى گۇلبارشىن ارقالىققىزى باستاعان جاندار اتا قونىستا ءماشھۇر وقۋلارىن وتكىزدى. جاز بويى اتا وسيەتىن, حيكمەتىن تىڭداۋعا, بىلۋگە, تاعزىم ەتۋگە مىڭنان اسا ادام كەلدى. ءماشھۇر شوبەرەسى ا.شاراپيەۆ كەلۋشىلەرگە وتباسىمەن قىزمەت كورسەتتى. بىلتىر بۇل قونىسىنا ەلىمىزدىڭ بەلگىلى تۇلعالارى دا ءتاۋ ەتە كەلگەنىن اتاپ وتەيىك.
ءماشھۇر ءجۇسىپ قونىسىن كورىكتەندىرۋ, جاڭعىرتۋ, اشىق مۋزەي جاساۋ, مۇراسىن ناسيحاتتاۋ, رۋحاني ورتالىق قۇرۋ جۇمىسى جالعاسا بەرەدى. اتا تۇرعان ءۇيدى مۋزەي ەتىپ جاساپ, قونىس ءۇيدى جەكە سالساق دەگەن دە ويىمىز بار.
جۇماعالي قوعاباي,
ء«ماشھۇر ءجۇسىپ» قوعامدىق قورىنىڭ قۇرىلتايشىسى
پاۆلودار وبلىسى
