ورال قالالىق كىتاپحانالار جۇيەسى ۇيىمداستىرعان كەزدەسۋگە قالالىق ءبىلىم بەرۋ باسقارماسىنا قاراستى مەكتەپ ديرەكتورلارى مەن تاربيە ءىسى جونىندەگى ورىنباسارلارى, جەرگىلىكتى زيالى قاۋىم وكىلدەرى, وقىرماندار قاتىستى. جاڭا شىعارمانىڭ ەرەكشەلىگى بار, وتباسىنداعى 30 ساباق ەكى بولىكتەن – اتا-اناعا ارنالعان ادىستەمەلىك كىتاپتان جانە بالاعا ارنالعان جۇمىس داپتەرىنەن تۇرادى.
– بالالارمەن كۇن سايىن كەزدەسىپ ءجۇرىپ تۇسىنگەنىم – ەڭ الدىمەن اتا-انامەن اڭگىمەلەسىپ, اتا-اناسىن دايىنداۋ قاجەت ەكەن. بالانىڭ دۇنيەتانىمىن قالىپتاستىرۋ, سوزدىك قورىن دامىتۋ, بالا بويىنا ادامگەرشىلىك قۇندىلىقتارىن دارىتۋ – الدىمەن اتا-انانىڭ مىندەتى. سوندىقتان قۇندىلىقتى ءارى ميدى دامىتاتىن قۇرالدى جاساپ شىقتىق, – دەيدى ايگەرىم قالدىبەكقىزى.
جاڭا كىتاپتىڭ تۇساۋىن اقىن ءارى ۇستاز, جازۋشىلار وداعىنىڭ مۇشەسى داريعا عازەزقىزى, ارداگەر ۇستازدار تىلەكتەس بايقادام مەن مارجان اقمەتقاليقىزى كەستى. ورال قالاسى مادەنيەت جانە تىلدەردى دامىتۋ ءبولىمىنىڭ باسشىسى سەرىك ەربولات ۇلى جاس ۇرپاقتىڭ دامۋىنا ىقپال ەتەتىن دۇنيەلەردى ءاردايىم قولدايتىنىن ايتتى.
اتالعان ەڭبەكتە قازاق حالقىنىڭ ۇلتتىق ونەرىنە ەرەكشە ورىن بەرىلگەن ەكەن. سونىڭ ىشىندە حالىق اندەرى مەن كۇيلەرى تۋرالى ايتىلىپ, ولاردىڭ تاريحى باياندالعان. وسى كىتاپتىڭ تانىستىرىلىمىنا ورال قالالىق ارداگەرلەر كلۋبىنىڭ «بابالار ءۇنى» دومبىرا ءانسامبلى مەن «اسىل اجە» ۆوكال توبى جانە د.نۇرپەيىسوۆا اتىنداعى بالالار ساز مەكتەبىنىڭ وقۋشىلارى ارنايى كەلىپ, كىتاپقا جازىلعان بىرنەشە ءان مەن كۇيدىڭ تاريحىن اڭگىمەلەي وتىرىپ, ورىنداعانى ەرەكشە كورىنىس بولدى.
– كورىپ ءجۇرمىز, XXI عاسىردىڭ باسىندا وتباسى ينستيتۋتى السىرەپ كەتتى. كونەكوز قاريالار ازايعان سوڭ داستارقان باسىندا ونەگەلى اڭگىمە ايتىپ, ءسوز ۇستايتىن جان سيرەدى. اتا-انا بالاسىنا نە اڭگىمە ايتىپ بەرەرىن بىلمەي تاۋسىلدى. بۇگىنگى بالانىڭ كوكىرەگىن سمارتفونداعى ارزان ءازىل-قالجىڭ تولتىرىپ ءجۇر. وسى تۇستا «وتباسى حرەستوماتياسى» قوعامدىق قورى شىعارعان بۇل قۇرالدىڭ ماڭىزى ەرەكشە, – دەيدى وسى ءىس-شارانىڭ جۇرگىزۋشىسى, جاس عالىم جاندوس حامزا.
باتىس قازاقستان وبلىسى
