ون ويىنشىمەن الدىن ورادى

سەنبى كۇنى الەم چەمپيوناتىنىڭ پلەي-وفف كەزەڭىنىڭ ويىندارى باستالدى. وسى كۇنى برازيليا قۇراماسى چيلي كومانداسىمەن, كولۋمبيا ۋرۋگۆاي قۇراماسىمەن كەزدەستى. الدىمەن برازيليا – چيلي ماتچى تۋرالى ايتساق, كەزدەسۋ بەلۋ-وريزونتي قالاسىندا اسا قىزىقتى جانە تارتىستى ءوتتى. بۇل ماتچتىڭ تاعدىرىن قوسىمشا ۋاقىتتان كەيىن ويىننىڭ سوڭىندا بەرىلەتىن 11 مەترلىك دوپ سەرياسى شەشتى. ال ويىننىڭ ءوزى 1:1 ەسەبىمەن تەڭ اياقتالعان بولاتىن. كەزدەسۋدە ءبىرىنشى بولىپ ەسەپتى 11-مينۋتتا داۆيد لۋيس اشقان. سودان كەيىن برازي­ليالىقتار تاعى دوپ سوعۋ ءۇشىن شابۋىلدارعا شىعىپ, چيلي قاقپاسىنا قاۋىپ توندىرۋمەن بولدى. الايدا, بەس دۇركىن الەم چەمپيوندارى – «پەنتاكامپەوندار» ماتچتىڭ سوڭىنا دەيىن قانشاما رەت شابۋىلداپ, قاۋىپتى جاعدايدار جاساسا دا ەكىنشى دوپتارىن سوعا الماي كەتتى. بۇل كەزدەسۋدە چيلي قۇراماسى وتە ساۋاتتى ويىن ورنەگىن كورسەتتى. ولار ماتچ بويى جاقسى تاقتيكا ۇستانىپ, ياعني قورعانا ءجۇرىپ دەر كەزىندە شابۋىلدار ۇيىمداستىرا ءبىلدى. سونىڭ ناتيجەسىندە ويىننىڭ 32-مينۋتىندا ەسەپتى تەڭەستىرىپ كەتتى. بۇل گولدى سانچەس سوقتى. وسى ەسەپتى كەزدەسۋدىڭ سوڭىنا دەيىن ەشكىم وزگەرتە المادى. وسىدان كەيىن 15 مينۋتتان ەكى تايمعا بولىنگەن قوسىمشا ۋاقىت بەرىلىپ, وندا دا قارسىلاستار ءبىر-ءبىرىنىڭ وسال جەرلەرىن تابا المادى. ال 11 مەترلىك پەنالتي سەرياسىندا برازيليانىڭ باعى جاندى. بۇل سىندا «پەنتاكامپەوندار» تاراپى­نان حالك پەن ۆيلليان قاتەلەسسە, چيلي كومانداسىندا ءۇش بىردەي ويىنشى قاقپانى ءدال كوزدەي المادى. جالپى, بۇل ويىندا كوپ­شى­لىك تورەشىنىڭ برازيلياعا بولىسۋى ءمۇم­كىن ەكەنىن ايتقان. بىراق, اعىلشىن گوۆارد ۋەبب ەشقاشان ەشكىمنىڭ ىعىندا كەت­پەي­تىنىن كورسەتىپ, ماتچتا ءادىل تورەلىك جاسادى. كەلەسى ويىندا كولۋمبيا مەن ۋرۋگۆاي كوماندالارى كەزدەستى. شىنىن ايتۋ كەرەك, بۇل كەزدەسۋدە كولۋمبيا قارسىلاسىنان بارلىق جاعىنان باسىم بولدى. ءسويتىپ, 2:0 ەسەبىمەن جەڭىسكە جەتتى. ولار بۇكىل ويىن بويى الاڭنىڭ بارلىق جەرىنە يەلىك ەتىپ, ۋرۋگۆايدىڭ ەسەپتى تەڭەستىرۋدى بىلاي قويىڭىز, ءتىپتى, ءبىر گول سالۋىنا دا ەشقانداي مۇمكىندىك بەرمەدى. بۇل جەردە كوماندانىڭ ماتچقا دايىندىعى ءوز الدىنا, ويىنشىلارىنىڭ جەڭىسكە دەگەن جىگەرىنىڭ ءوزى كوزگە ۇرىپ تۇردى. ماتچتا ۋرۋگۆاي قۇراماسى كەشەگى يتاليامەن وتكىزگەن ويى­نىندا لۋيس سۋارەستىڭ قورعاۋشىنىڭ سول جاق يىعىن قىرشىپ الىپ, سونىڭ شۋى ءالى باسىلماعان سوڭ با, ماتچقا وتە ناشار دايىندالعاندارىن بايقاتىپ الدى. ماسەلەن, ولار ەكىنشى تايمنىڭ سوڭىندا بولماسا بۇكىل ۋاقىت كولۋمبيانىڭ ەكى گولىنا ماردىمدى جاۋاپ قايتارا المادى. قىسقاسى, ولار كولۋمبيادان ءادىل تۇردە جەڭىلدى. ەندى كولۋمبيا شيرەك فينالدا  برازي­ليا­مەن كەزدەسەدى. بۇل ماتچ 4 شىلدە كۇنى كاستەلان قالاسىندا وتەدى. كەزدەسۋدە قاي كوماندانىڭ جەڭەتىنىن الدىن الا بول­جاماي-اق قويايىق. سوندا دا برازيليانىڭ كولۋم­بيانى جەڭۋى قيىنعا سوعاتىنى ايداي انىق. بۇل ويىندا دا بارلىق ماسەلە 11 مەترلىك پەنالتي سەرياسىندا شەشىلۋى ىقتيمال. كەلەسى كۇنى, جەكسەنبىدە 1/8 فينالدىڭ تاعى ەكى كەزدەسۋى ءوتتى. وندا گوللانديا مەن مەكسيكا جانە كوستا-ريكا مەن گرەكيا قۇرامالارى كەزدەستى. بۇل ماتچتار دا وتە قىزىقتى جانە تارتىستى ءوتتى. اسىرەسە, گوللانديانىڭ مەكسيكالىقتاردان 1:0 ەسەبى­مەن جەڭىلىپ بارا جاتىپ, ويىننىڭ ءبىتۋى­­نە ەكى مينۋت قالعاندا ەكى دوپ سوعىپ, جەڭىس­تى سۋىرىپ اكەتۋى تاڭ-تاماشا قالدىردى. وسى ويىندا «قىزعالداقتار» كومان­دا­سى­­نىڭ شابۋىلشىسى ارەن روببەن ءوزى­نىڭ ناعىز ليدەر ەكەنىن كورسەتتى. ول 1:0 بو­لىپ جەڭىلىپ جاتقاننىڭ وزىندە كومان­دا­لاس­تارىنىڭ رۋحىن كوتەرىپ, قايتا-قايتا شابۋىل ۇيىمداستىرىپ وتىردى. سونداي ءبىر كەزدە سنەيدەرگە الىستان گول سوعۋعا, ال  ەكىنشىسىندە مەكسيكانىڭ ايىپ دوبى الا­ڭىنا قۇلاپ, 11 مەترلىك پەنالتيدەن حيۋن­­تە­­لاردىڭ دوپ سوعۋىنا مۇمكىندىك جاسا­دى. بۇل كەزدەسۋدە گوللانديانىڭ باس جات­تىقتىرۋشىسى لۋي ۆان گاال دا ويىنشىلاردى كەرەك كەزىندە اۋىستىرا ءبىلدى. ماسەلەن, مەكسيكانىڭ قاقپاسىنا ەكىنشى گولدى سوققان دا ۆان پەرسيدىڭ ورنىنا شىققان حيۋن­تەلار بولدى. جالپى, گوللانديانىڭ بيىل­عى الەم چەمپيوناتىنا دايىندىعىن باس بار­ماقپەن باعالاۋعا بولادى. قازىر ولار ءوت­كەن عاسىردىڭ 70-80-جىلدارىندا بەل­گ­ى­لى جات­تىقتىرۋشى رينۋس ميحەلستىڭ ۇستان­عان تاك­تيكاسى بويىنشا ويناپ جاتىر. بۇل تاك­تيكا گوللانديانىڭ 1974, 1978 جىل­دارى الەم چەمپيوناتىنىڭ فينالىنا شىعۋى­نا جانە 1988 جىلى ەۋروپا چەمپيوناتىن جە­ڭىپ الۋىنا مۇمكىندىك بەرگەن. بۇل – رينۋس ميحەلم­نىڭ توتالدى فۋتبول دەگەن ويىن ءادىسى. وندا ويىنشىلار قىسقا پاس بەرىپ وي­نا­ماي, كوبىنە قورعانىستا ويناي ءجۇرىپ, الىس­تان شابۋىلشىلارعا پاس بەرىپ, ولاردىڭ اشى­لىپ الىستان سوققى جاساۋىنا جاعداي تۋعىزادى. وسى كۇنى 1/8 فينالدىڭ تاعى ءبىر كەزدەسۋى دە وتە قىزىقتى ءوتتى. قازىر كوپ ادام الەم چەمپيوناتىنىڭ سەنساتسياسىنا بالاپ جاتقان كوستا-ريكا گرەكيانى 11 مەترلىك پەنالتي سەرياسىندا ۇتىپ, ءوز تاريحىندا العاش رەت الەمدىك دودانىڭ شيرەك فينالىنا شىقتى. بۇل كەزدەسۋدىڭ ءبىرىنشى جارتىسىندا قوس كوماندا جارىتىپ ويناماسا دا ەكىنشى تايمدا جانكۇيەرلەرگە جاقسى ويىن ورنەگىن كورسەتتى. 15 مينۋتتىق ۇزىلىستەن تىنىعىپ شىققان قارسىلاستار ءبىر-ءبىرىنىڭ  قاقپاسىنا ءبىر-بىردەن دوپ سوقتى. ءبىرىنشى بولىپ كوستا-ريكا مۇمكىندىكتى جىبەرمەدى. سودان كەيىن كوستا-ريكانىڭ ويىنشىسى الاڭنان قۋىلىپ, گرەكيا ماتچتىڭ اياقتالۋىنا ءبىر مينۋت قالعاندا ەسەپتى تەڭەستىرىپ كەتتى. وسىلايشا, ويىننىڭ نەگىزگى جانە قوسىمشا ۋاقىتى بىتكەن سوڭ پەنالتي سەرياسى بولىپ, وندا كوستا-ريكا شيرەك  فينالعا جولداما الدى. ەندى كوستا-ريكا 5 شىلدە كۇنى گوللانديا قۇراماسىمەن كەزدەستى. ماتچ فونتە-نوۆا قالاسىندا وتەدى. كەشە كەشكىسىن فرانتسيا مەن نيگەريا جانە گەرمانيا مەن الجير كوماندالارى كەزدەستى.