– بۇل قازاقتىڭ سالت-ءداستۇرىن عانا ەمەس, جالپى ورتالىق ازيا مادەنيەتىن تانىتاتىن شىعارما. قۇندى ەڭبەكتەن قازاقستاننىڭ كوركەم تابيعاتى مەن كوشپەلىلەردىڭ بايىرعى تۇرمىس-تىرشىلىگىن تانىپ بىلۋگە بولادى, – دەيدى, وعان پىكىر جازعان حوككايدو ۋنيۆەرسيتەتىنىڭ قۇرمەتتى پروفەسسورى تاكەدا ماساناو.
جيناقتىڭ العىسوزىندە قازاق فولكلورى مەن جىرشى-جىراۋلار جايىندا مالىمەت بەرىلىپ, «قىز جىبەك» ەپوسىنىڭ جيناقتاپ, زەرتتەلۋ تاريحى باياندالعان. سونىمەن بىرگە جامبىل اتامىزدىڭ شىعارماشىلىعى مەن قازاقتىڭ جىراۋلىق ءداستۇرىنىڭ ەرەكشەلىكتەرى, ەپوستاردىڭ ءتول مادەنيەتىمىزدەگى ورنى جانە كونە جىردا كەزدەسەتىن ەتنوگرافيالىق تەرميندەردىڭ تۇسىنىكتەمەسى بەرىلگەن. ايتۋلى ەڭبەك مەملەكەتتىك سىيلىقتىڭ لاۋرەاتى, قىلقالام شەبەرى اعىمسالى دۇزەلحانوۆتىڭ «قىز جىبەك» توپتاماسىنداعى كارتينالارىمەن بەزەندىرىلگەن. ايتا كەتەيىك, ليرو-ەپوستىق داستاننىڭ تۇپنۇسقاسى جامبىل جاباەۆتىڭ ادەبي-مەموريالدى مۋزەيىندە ساقتالعان.
