قازاقستان حالىق پارتياسىنىڭ ورتالىق كەڭسەسىندە پارتيا توراعاسى ەرمۇحامەت ەرتىسباەۆتىڭ باسشىلىعىمەن ساياسي بيۋرونىڭ كەزەكتەن تىس وتىرىسى ءوتتى.
جيىن بارىسىندا پارتيالىق ءتىزىم بويىنشا VIII شاقىرىلىمداعى قر پارلامەنتى ءماجىلىسىنىڭ دەپۋتاتتىعىنا سايلانعان كانديداتتارعا دەپۋتاتتىق ماندات ءبولىندى.
– كانديداتۋرالار القا تالداۋىنا ءتۇسىپ, ۇزاق تالقىلاندى, – دەدى قحپ توراعاسى.
ساياسي بيۋرو مۇشەلەرى دەپۋتاتتىق توپ قۇرامىن جاساقتاۋعا قاتىستى شەشىم قابىلداعان كەزدە ايەلدەر مەن جاستارعا جانە مۇمكىندىگى شەكتەۋلى جاندارعا بولىنگەن مىندەتتى كۆوتانى ەرەكشە نازاردا ۇستادى.
ناتيجەسىندە ءماجىلىس سايلاۋىنا پارتيالىق تىزىممەن ۇسىنىلعان تاجىريبەلى ساياساتكەرلەر ماگەررام ماگەرراموۆ پەن يرينا سميرنوۆا, كوپبالالى انالار بىرلەستىگىنىڭ جەتەكشىسى گاۋحار تاناشەۆا, پاراوليمپيادا ويىندارىنىڭ قاتىسۋشىسى, مۇگەدەك ادامداردىڭ قۇقىعىن قورعاۋشى كەنجەعۇل سەيiتجان جانە جاستار كۆوتاسى بويىنشا يسلام سۇڭقار سىندى كانديداتتار مانداتقا يە بولدى.
قر ورتالىق سايلاۋ كوميسسياسى جاريالاعان سايلاۋ قورىتىندىسىنا سايكەس, قازاقستان حالىق پارتياسى 5 پايىزدىق مەجەنى ويداعىداي ەڭسەرىپ, قر پارلامەنتى ماجىلىسىنە ءوتتى. سايلاۋشىلاردىڭ داۋىسى حالىق پارتياسىن 5 پارلامەنتتىك مانداتپەن قامتاماسىز ەتتى.
