قازاقستان – ءبىز ءۇشىن ءوزارا ىنتىماقتاستىقتىڭ باسىم باعىتى - ما سينجۋي

اڭگىمەلەسۋ بارىسىندا وڭىرارالىق ىنتىماقتاستىقتى دامىتۋ ماسەلەسىنە ەرەكشە نازار اۋدارىلدى. قازاقستان شىڭجاڭ ولكەسىمەن ونەركاسىپ، كولىك، لوگيستيكا، اۋىل شارۋاشىلىعى جانە تۋريزم سەكىلدى كوپتەگەن باعىت بويىنشا تابىستى قارىم-قاتىناس جاساپ وتىر.

كەزدەسۋدە قاسىم-جومارت توقاەۆ قازاقستان قىتايمەن ستراتەگيالىق سەرىكتەستىك پەن ماڭگىلىك دوستىق رۋحىندا جان-جاقتى ىنتىماقتاستىقتى تەرەڭدەتۋگە باسا ءمان بەرەتىنىن ايتتى. مەملەكەت باسشىسى ەكى ەل اراسىندا بارلىق دەڭگەيدە بەلسەندى ءارى سەنىمدى ساياسي ديالوگ قالىپتاسقانىنا توقتالىپ، قحر-دى قازاقستاننىڭ باستى ساۋدا سەرىكتەستەرىنىڭ ءبىرى رەتىندە اتاپ ءوتتى.

«قىتاي حالىق رەسپۋبليكاسىنىڭ توراعاسى سي تسزينپين مىرزانىڭ بىلتىر قازان ايىندا قازاقستانعا جاساعان ساپارى وتە ءساتتى بولعانىن ايتقىم كەلەدى. بۇل سOVID پاندەمياسى سالدارىنان بولعان ۇزاق ۇزىلىستەن كەيىنگى ءبىرىنشى ساپار ەكەنىن اتاپ وتتىك. ءبىز وتە ماڭىزدى كەلىسىمدەرگە قول جەتكىزدىك. ەكى ەلدىڭ ۇكىمەتتەرى مەن ءتيىستى ايماق باسشىلارىنا ەڭ جوعارى دەڭگەيدە قول جەتكىزگەن ۋاعدالاستىقتاردى تابىستى جۇزەگە اسىرۋ مىندەتى جۇكتەلدى»، دەدى پرەزيدەنت.

ءوز كەزەگىندە ما سينجۋي قوناقجايلىق كورسەتكەنى ءۇشىن قاسىم-جومارت توقاەۆقا العىس ايتىپ، قحر توراعاسى سي ءتسزينپيننىڭ سالەمىن جەتكىزدى.

«مەنىڭ ساپارىمنىڭ نەگىزگى ماقساتى – قحر توراعاسى سي تسزينپين مەن ءسىزدىڭ اراڭىزداعى ماڭىزدى ستراتەگيالىق كەلىسىمدەردى جۇزەگە اسىرۋ. ءبىز قىتايدىڭ ءبىر ولكەسى رەتىندە ەلىمىزدىڭ باتىسىنداعى مەملەكەتتەرمەن قارىم-قاتىناستاردى نىعايتۋعا جاۋاپتىمىز. قازاقستان – ءبىز ءۇشىن ءوزارا ىنتىماقتاستىقتىڭ باسىم باعىتى. جالپى، قىتاي مەن قازاقستاننىڭ ىنتىماقتاستىعى شىڭجاڭ ارقىلى جۇزەگە اسىرىلادى»، دەدى ما سينجۋي.

كەزدەسۋ سوڭىندا  پرەزيدەنت شىڭجاڭ باسشىسىنىڭ قازاقستانعا ساپارى وڭىرارالىق بايلانىستى تەرەڭدەتىپ، ونىڭ باعىت-باعدارىن ناقتىلاي تۇسۋگە تىڭ سەرپىن بەرەتىنىنە نازار اۋداردى.

سونداي-اق قاسىم-جومارت توقاەۆ سي ءتسزينپيننىڭ قحر توراعاسى بولىپ قايتا سايلانۋىنا بايلانىستى وعان ىزگى تىلەگىن جولداپ، ساتتىلىك تىلەدى.