جاس ۇرپاقتى تاربيەلەۋ مەن ولاردىڭ جان-جاقتى دامۋىنا جاعداي جاساپ, بوس ۋاقىتىن پايدالى جانە قىزىقتى وتكىزۋگە ىقپالداسۋ مەكتەپتە بەرىلەتىن بىلىممەن قاتار ماڭىزدى سانالادى.
پرەزيدەنتتىڭ تاپسىرماسىنا سايكەس, رەسپۋبليكادا وقۋشىلاردىڭ شىعارماشىلىق جانە زياتكەرلىك دامۋىنا, ءبىلىم الىپ, جاقسى دەمالۋىنا, بوس ۋاقىتىن پايدالى وتكىزۋىنە ارنالعان نىساندار تۇرعىزۋ نەمەسە ەسكىلەرىن رەكونسترۋكتسيالاۋ بويىنشا جۇمىستار جاندانىپ جاتىر.
وقۋ-اعارتۋ مينيسترلىگىنىڭ مالىمەتىنشە, بۇگىندە ەلىمىزدە بالالارعا ارنالعان 218 ساۋىقتىرۋ ورتالىعى جۇمىس ىستەيدى, ولاردىڭ 120-سى – مەملەكەتتىك, 98-ءى – جەكە مەنشىك.
2027 جىلعا دەيىن بارلىق وبلىستا زاماناۋي وقۋ-ساۋىقتىرۋ ورتالىقتارى اشىلماق. ولاردىڭ اشىلۋى بالالاردى قامتۋ كورسەتكىشىن ايتارلىقتاي ۇلعايتادى. جازعى ورتالىقتارداعى كورسەتكىش جىل سايىن 25%-عا وسەدى دەپ كۇتىلەدى (2022 جىلى اتالعان ورتالىقتاردا 178 مىڭ بالا دەمالدى). ال جىل بويى جۇمىس ىستەيتىن ورتالىقتارداعى قامتۋ كورسەتكىشى 2 ەسە وسەدى (2022 جىلى 77 مىڭ بالا قامتىلماق).
قاراجات جەرگىلىكتى اتقارۋشى ورگانداردىڭ بيۋدجەتىنەن جان باسىنا شاققانداعى قارجىلاندىرۋ جۇيەسى ارقىلى بولىنەدى جانە بۇل سالاعا ينۆەستورلاردى تارتۋ دا كوزدەلىپ وتىر. بالالاردىڭ شىعارماشىلىق جانە زياتكەرلىك دامۋىنا ارنالعان 100 نىساننىڭ (وقۋشىلار سارايى) قۇرىلىسى رەسپۋبليكالىق بيۋدجەت ەسەبىنەن ىسكە اسىرىلادى.
بالالار قوسىمشا بىلىممەن 100% قامتىلادى. بۇل كورسەتكىشكە ءىرى قوسىمشا ءبىلىم بەرۋ نىساندارىن سالۋ ارقىلى عانا ەمەس, وسى ماقساتتارعا مەملەكەتتىك تاپسىرىستى كەزەڭ-كەزەڭمەن ۇلعايتۋ ارقىلى قول جەتكىزىلمەك. سونىمەن قاتار اۋىل مەكتەپتەرىندە كوميۋنيتي-ورتالىقتار اشۋ جانە ەسكى مەكتەپتەن تىس ۇيىمداردى جاڭعىرتۋ جوسپارلانىپ وتىر.
ورتالىق جانە جەرگىلىكتى اتقارۋشى ورگانداردىڭ قاتىسۋىمەن وتكەن كەڭەستىڭ قورىتىندىسى بويىنشا وسى ماقساتتا جول كارتاسىن بەكىتىپ, جەر ۋچاسكەلەرىن ءبولۋ شارالارىن قابىلداۋ تۋرالى تاپسىرما بەرىلدى. سونداي-اق قىسقا مەرزىمدە بالالار ساۋىقتىرۋ ورتالىقتارى مەن ءىرى قوسىمشا ءبىلىم بەرۋ وبەكتىلەرىن سالۋ, ەسكى وبەكتىلەردى رەكونسترۋكتسيالاۋ نەمەسە قايتا فورماتتاۋ ءۇشىن جوبالاۋ-سمەتالىق قۇجاتتامانى ازىرلەۋ مىندەتتەلدى.
