وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ ءبولىم باسشىسى ايناگۇل سارسەنعاليەۆانىڭ ايتۋىنشا, قازىر كوپتەگەن الەم ەلدەرىندە قىزىلشانىڭ تارالۋ قاۋپى ارتقان. ويتكەنى بۇعان COVID-19 پاندەمياسىنان كەيىن قىزىلشاعا قارسى ۆاكتسينالاۋ, وسى ينفەكتسياعا ەپيدەميالىق قاداعالاۋدىڭ تومەندەگەنى سەبەپ بولىپ وتىر.
– اتىراۋ وبلىسىندا قىزىلشا اۋرۋى سوڭعى رەت 2019 جىلى تىركەلگەن ەدى. ءتورت جىلدان كەيىن بيىلعى ناۋرىز ايىندا اتالعان اۋرۋدىڭ ءتورت جاعدايى تىركەلدى. العاشقى جاعداي بىزگە شەتەلدەن كەلگەن جاسوسپىرىمنەن انىقتالدى. تۇركيا ەلىنەن كەلگەن ازاماتتىڭ بالاسى ۆيرۋستى سول جاقتان جۇقتىرىپ كەلگەن. قازىر قىزىلشا جۇقتىرعان 4 جاعدايدىڭ بىرەۋى زەرتحانالىق تالداۋمەن دالەلدەندى. قالعان 3 جاعدايدىڭ زەرتحانالىق ناتيجەسىن كۇتىپ وتىرمىز, – دەيدى ا.سارسەنعاليەۆا.
ونىڭ ايتۋىنا قاراعاندا, قىزىلشا ينفەكتسياسىنىڭ الدىن الۋعا باعىتتالعان كۇرەستىڭ جالعىز جانە ءتيىمدى شاراسى – ۆاكتسينا سالدىرۋ. اتىراۋ وبلىسىندا بالالاردى قىزىلشاعا قارسى قىزامىق جانە ەپيدەميالىق پاروتيتكە قارسى بىرىكتىرىلگەن ۆاكتسينا ەگۋ كوزدەلگەن.
– بۇل ۆاكتسيناعا دۇنيەجۇزىلىك دەنساۋلىق ساقتاۋ ۇيىمى جاعىنان سەرتيفيكات بەرىلگەن. سەرتيفيكات – ۆاكتسينانى الۋدىڭ ءتيىمدى ءارى قاۋىپسىز ەكەنىنىڭ كەپىلى. قىزىلشاعا قارسى ۆاكتسينالاۋ ەلىمىزدىڭ ۇلتتىق ەگۋ كۇنتىزبەسىنە سايكەس 1 جاستان 6 جاسقا دەيىنگى بالالارعا جۇرگىزىلەدى, – دەپ مالىمدەدى ا.سارسەنعاليەۆا.
دەپارتامەنتتىڭ ءباسپاسوز قىزمەتى تاراتقان اقپاراتقا سۇيەنسەك, ءجىتى رەسپيراتورلىق ۆيرۋستىق ينفەكتسيالار مەن تۇماۋدىڭ ەپيدەميالىق ماۋسىمى جەلتوقساننان مامىرعا دەيىن سوزىلادى. اتىراۋ وبلىسىندا بىلتىرعى 1 جەلتوقساننان بەرگى ەپيدەميالىق ماۋسىمدا ءجىتى رەسپيراتورلىق ۆيرۋستىق ينفەكتسيالاردىڭ 41 661 جاعدايى تىركەلىپ وتىر. بۇل ينفەكتسيامەن 14 جاسقا دەيىنگى 26 186 بالا, 3 210 جۇكتى ايەل اۋىرعان.
ال تۇماۋ ۆيرۋسىنىڭ العاشقى جاعدايى 2022 جىلدىڭ 30 قىركۇيەگىندە تىركەلگەن. وسىعان بايلانىستى ناۋقاستاردان الىنعان 489 ۇلگىنىڭ 65-ىنەن تۇماۋ اۋرۋىنىڭ قوزدىرعىشى بولعانى دالەلدەنىپتى. ونىڭ ىشىندە 37 ۇلگىدەن تۇماۋ ۆيرۋسىنىڭ ۆ ءتيپى, 28 ۇلگىدەن تۇماۋ ۆيرۋسىنىڭ ا ءتيپى بار.
اتىراۋ وبلىسى
