قوعام • 26 ناۋرىز، 2023

كوپبالالى اناعا قۇرمەت

98 رەت كورسەتىلدى

جاقىندا ۇلتتىق اسكەري-پاتريوتتىق ورتالىعىندا مەملەكەتتىك قۇپيالاردى قورعاۋ قىزمەتىنىڭ ماماندارى كۇنىنە ارنالعان سالتاناتتى ءىس-شارا ءوتتى.

ۇلتتىق قورعانىس ۋنيۆەرسيتەتى مەملەكەتتىك قۇپيالاردى قورعاۋ كافەدراسىنىڭ مەڭگەرۋشىسى، بۇرىن وسى سالادا ۇزاق جىل دەپارتامەنت باسشىسى بولعان پولكوۆنيك قايناربەك قوجاحمەتوۆ اتالعان قىزمەتتىڭ قالىپتاسۋى مەن دامۋىنا ەلەۋلى ۇلەس قوسىپ كەلەدى. كاسىبي مەرەكە قۇرمەتىنە قايناربەك بالتاباي ۇلى «ەل قورعانى» ۆەدومستۆولىق مەدالىمەن ماراپاتتالدى. ال ونىڭ اناسىنا، «التىن القا» جانە «ەلەۋلى ەڭبەگى ءۇشىن» مەدالىنىڭ يەگەرى قىزىلكۇل قوجاحمەتوۆاعا قورعانىس ءمينيسترىنىڭ العىسحاتى تابىستالدى. كوپبالالى انا بۇگىندە التى ۇل، ءتورت قىزدى تاربيەلەپ ءوسىرىپ، 41 نەمەرە جانە 51 شوبەرە ءسۇيىپ وتىر.

– وتان قورعاۋشى بولىپ، ابىرويلى ماماندىقتى تاڭداعان بالالارىمدى قولدايمىن. بالالىق شاعىم سوعىس كەزىمەن تۇسپا-تۇس كەلدى، اكەلەرىمىز بەن اتالارىمىز سوعىستىڭ قاتال سىناعىنان ءوتتى. ولار تاباندىلىق پەن باتىلدىقتىڭ ارقاسىندا جەڭىسكە جەتتى. مەنىڭ باقىتىم – بالالارىم. ولاردىڭ بابالارىنىڭ جاۋىنگەرلىك ءداستۇرىن قۇرمەتتەيتىنىن ماقتان ەتەمىن، – دەپ اتاپ ءوتتى باتىر انا.

قىزىلكۇل قوجاحمەتوۆانىڭ بەس بالاسى مەن ون ءبىر نەمەرەسى قازىر قارۋلى كۇشتەر قاتارىندا قىزمەت ەتىپ جۇرگەنىن ايتا كەتكەن ءجون. ولاردىڭ قاتارىندا مەملەكەتتىك قۇپيالاردى قورعاۋ ماماندارى، اسكەري دارىگەرلەر، پوليتسەيلەر مەن بايلانىسشىلار بار.

 

ۇقساس جاڭالىقتار