«شاحمات – بۇل, ارينە, جەكەلەي سپورت ءتۇرى. بىراق جەكە تۇلعا بولۋ مەن پىكىرلەس بولۋ – ەكى بولەك نارسە. «اركىم ءوزى ءۇشىن» دەگەن تۇسىنىكتى كەيبىرەۋلەر «بارىنە تۇكىرگەنىم بار» دەگەن ماعىنادا كورگىسى كەلەدى. ولاردان ءوز قاتەسىن ءتۇسىنىپ, سىپايىلىقپەن كەشىرىم سۇراۋدى ەشقاشان كۇتۋدىڭ قاجەتى جوق. ەگەر مۇنداي ادامدار اينالاسىنا وتىرىكتى جاۋدىرسا, سىپايىلىق تۋرالى اڭگىمە ايتۋ قيىن. ءسىرا, شىندىقتى بۇركەمەلەۋ – ءبىرىنشى كەزەكتە شاحماتشى ەكەندىگىن ۇمىتقان الماتى ءماسليحاتىنىڭ بۇرىنعى دەپۋتاتى جانسايا ابدىمالىكتىڭ كاسىبي قاسيەتى شىعار. الايدا كەز كەلگەن كاسىبي سپورتشى ءۇشىن كەشىرىلمەيتىن نارسەلەر بار. ول ءتىپتى كىم بولسا دا», دەپ جازدى ب.اساۋباەۆا.
ونىڭ ايتۋىنشا, كەشە جانسايامەن بىرگە ءوزىن قوسقاندا, تاعى ون ءبىر شاحماتشى دەليدە ماڭىزدى گران-پري تۋرنيرىنە كەلگەن. بىراق جانسايا ۇيىمداستىرۋشىلار دۇرىس كۇتىپ المادى دەگەن جەلەۋمەن جارىستان اياقاستى كەتىپ قالۋدى ءجون كورگەن. مۇنى ءتۋرنيردىڭ اشىلۋىنا ءبىر ساعات قالعاندا, ارىپتەسىنە تەلەفون ارقىلى حابارلاپ, اۋەجايدا ەكەندىگىن, ۇشقالى وتىرعانىن جەتكىزگەن.
«ال ءوزى ءبىز شۇعىل جينالىس جاساپ, نە ىستەرىمىزدى بىلمەي جاتقان كەزدە وتەلدە قىدىرىپ جۇرگەن. جانسايا وزىنەن ءبىر ەلى قالماي, بىرگە جۇرگەن ەر اداممەن ۇشىپ كەلدى. ال باسقالار جالعىز بولسا دا, وتەلگە ەشقانداي كەدەرگىسىز جەتتى. كەيبىر شاحماتشىلار گران-پريگە قاتىسۋ ءۇشىن وزگە جارىستاردان باس تارقان ەدى, ەندى ولار ىڭعايسىز جاعدايدا قالىپ وتىر. وتىرىك ارالاسقان اسىعىس شەشىمنىڭ سالدارىنان تۋرنير بولماي قالۋى مۇمكىن. سوڭعى ساتتە ءوزى ويلاپ تاپقان سەبەپتەن ءبارىن تاس-تالقان قىلعىسى كەلگەن ءبىر ادامنىڭ كەسىرىنەن وسىلاي بولىپ وتىر. ارينە, جەرگىلىكتى ۇيىمداستىرۋشىلارعا قاتىستى سۇراق كوپ. بىراق كوپ ماسەلە جانساياعا, ونىڭ سپورتشىعا ءتان ەمەس ارەكەتىنە قاتىستى. اياق استىنان ەموتسياعا جول بەرگەندىگىنە, ارىپتەستەرىنە, تۇتاستاي العاندا, ومىرگە دەگەن كوزقاراسىنا, كاسىبيلىگىنە قاتىستى. سپورتشىلار كەز كەلگەن كۇتپەگەن جاعدايعا بەرىلە سالماي, بارىنە دايىن بولۋى ءتيىس. كەز كەلگەن ۇساق-تۇيەككە جانسايا سەكىلدى قاراساق, وندا سپورتپەن قوش ايتىسىپ, كۇيەۋگە شىعىپ, تاماق دايىنداۋ كەرەك. بارىنە ساتتىلىك تىلەيمىن», دەلىنگەن جازبادا.
