سارەسى مەن اۋىزاشاردا ءشاي, كوفە, گازدالعان سۋسىن ىشپەگەن دۇرىس. ولاردا كوفەين مەن حيميالىق قوسپالار بولعاندىقتان ءشول قانۋدىڭ ورنىنا ورگانيزمنىڭ كوپ سۋالۋىنا اكەلىپ سوعادى.
اۋىز بەكىتەردە ءبىر شىمشىم تۇز سالىنعان ءبىر كەسە سۋ ىشسەڭىز, اعزادان سۋ شىعۋ ءۇردىسى تەجەلەدى.
ادامدار سۋ مولشەرىن ءوزىنىڭ قاجەتىنە قاراي ارقالاي قابىلدايدى. وتە بەلسەندى ادام تاۋلىگىنە 2-3 ليتر سۋ ءىشۋى كەرەك ەكەنى بارشاعا بەلگىلى. اۋىزاشار ۋاقىتىندا سۋ, كوك ءشاي جانە ءتۇرلى شوپتەردەن جاسالعان ءشاي ءشولدى جاقسى قاندىرادى.
ورازا كەزىندە وتە اششى, تۇزدى, قۋىرىلعان, مايلى جانە ءتاتتى تاعامداردان مەيلىنشە اۋلاق بولۋعا كەڭەس بەرىلەدى. قۋىرىلعان جانە مايلى تاعام اسقازان مەن ىشەكتى تىتىركەندىرەدى جانە وتە باياۋ قورىتىلادى. ال اششى, تۇزدى جانە ءتاتتى تاعامدار ادامدى شولدەتەدى.
سارەسى ۋاقىتىندا بوتقا جەگەن وتە ءتيىمدى. بوتقانىڭ قورىتىلۋى وڭاي, اعزاعا دا پايدالى ءارى جەڭىل تاعام. سونىمەن قاتار بوتقا جەگەن ادام كۇنى بويى توق بولادى.
قىرىققابات, ءسابىز, كارتوپ, كادى سياقتى كوكونىستەردى كوبىرەك جەگەن ابزال. اۋىز بەكىتكەندە الما, ءجۇزىم, اپەلسين, المۇرت سياقتى جەمىستەردى جەمەگەن دۇرىس. ويتكەنى, ولاردىڭ قۇرامىندا قىشقىل كوپ بولعاندىقتان, كۇندىز ادامدى ءشول قىسۋى مۇمكىن.
