مەرەكەلىك شارا بارىسىندا ۇلتتىق سپورت تۇرلەرىنەن جارىستار ۇيىمداستىرىلدى. جاستار اسىق اتىپ, ارقان تارتتى. ارىس قالاسىنىڭ تۇرعىنى ازامات ماقۇلبەكوۆ 55 كيلو قوشقاردى 303 رەت كوتەرىپ, كوپشىلىكتىڭ ىقىلاسىنا بولەندى. ءبىرىنشى ورىندى يەلەنگەن وعان ءوزى كوتەرگەن قوشقار سىيعا بەرىلدى. سونداي-اق ەسترادا جۇلدىزدارى اسەم اندەر ورىنداپ, كوپشىلىككە مەرەكەلىك كوڭىل كۇي سىيلادى.
تۇركىستان وبلىسىنىڭ اكىمى دارحان ساتىبالدى تۇرعىنداردى ناۋرىز مەرەكەسىمەن قۇتتىقتادى. ال وبلىستىق «فاراب» امبەباپ عىلىمي كىتاپحاناسىندا وتكەن «نۇر – ناۋرىز, ناۋرىز – دۋمان» مەرەكەلىك شاراسىندا قىزدى وڭ جاققا شىعارۋ داستۇرىنەن كورىنىس قويىلىپ, ۇلكەندەر باتا بەردى. كىتاپحاناشىلار قوناقتارعا ناۋرىزدىڭ ءداستۇرلى تاعامى – ناۋرىز كوجە ۇسىنىپ, مەرەكەلىك داستارحان جايدى. ناۋرىزعا ورايلاستىرىلىپ ءوڭىردىڭ الەۋمەتتىك-ەكونوميكالىق دامۋىنا ىقپال ەتەر ءىس-شارالار دا وتكىزىلدى. مىسالى, تۇركىستاندا «KazAgro/KazFood Turkistan 2023» I حالىقارالىق ساۋدا كورمەسى ۇيىمداستىرىلىپ, «AgroForum Turkistan 2023» حالىقارالىق فورۋمى ءوتتى. وبلىس اكىمى فورۋمعا ارنايى كەلگەن قىرعىز رەسپۋبليكاسىنىڭ دەلەگاتسياسىمەن كەزدەسىپ, ناۋرىز مەرەكەسىمەن قۇتتىقتادى. بىرلەسە جۇمىس ىستەۋگە شاقىردى.
– ەل پرەزيدەنتى قاسىم-جومارت توقاەۆ قىرعىز رەسپۋبليكاسىنا جۇمىس ساپارىندا بىرقاتار قۇجاتقا قول قويعانى بەلگىلى. سونىڭ ىشىندە تۇركىستان وبلىسىنىڭ اكىمدىگى مەن وش وبلىسى وكىلەتتى وكىلىنىڭ اپپاراتى اراسىنداعى ىنتىماقتاستىق تۋرالى مەموراندۋم جاسالعان بولاتىن. تۇركىستانداعى حالىقارالىق فورۋمدا وسى ەكى وبلىس اراسىنداعى بايلانىستاردى نىعايتۋ ءىس-شارالارى بويىنشا جول كارتاسىنا قول قويىلدى. ەندى ناقتى ىسكە كىرىسۋ كەرەك. اۋىل شارۋاشىلىعى, ءوندىرىستى دامىتۋ جانە وزگە دە سالالار بويىنشا بىرلەسە جۇمىس اتقارۋعا مۇمكىندىك بار. ىرگەدەگى باۋىرلاس ءارى كورشى ەلمەن ارىپتەستىك ورناتۋ ەكى جاققا دا ءتيىمدى, – دەدى دارحان ساتىبالدى.
ال قىرعىز پرەزيدەنتىنىڭ وش وبلىسىنداعى ۋاكىلەتتى وكىلىنىڭ ءبىرىنشى ورىنباسارى دانيار جانىقۇلوۆ باۋىرلاس ەلدەردىڭ تىلەگى ءبىر ەكەنىن جەتكىزدى. «تۇركىستان قالاسى ايرىقشا جاڭارىپ, قاتتى وزگەرگەنىن كورىپ قۋاندىم. ەڭ جاقىن مەملەكەتپىز. سوندىقتان سىزدەرمەن ارىپتەستىك ورناتۋ ماڭىزدى. وش وبلىسىندا تۋريزم, اۋىل شارۋاشىلىعى, بالىق شارۋاشىلىعى, بال شارۋاشىلىعى جاقسى دامىعان. قىتايمەن شەكارالاس ايماق لوگيستيكالىق ورتالىق رەتىندە دە ءتيىمدى بايلانىس ورناتا الادى», دەدى د.جانىقۇلوۆ.
اگروفورۋمدا تۇركىستان وبلىسى اكىمدىگى مەن وتاندىق جانە شەتەلدىك ينۆەستورلارمەن اگروونەركاسىپتىك كەشەن سالاسىندا جالپى قۇنى 257 ملرد تەڭگە بولاتىن 10 كەلىسىمگە قول قويىلدى.
تۇركىستان
