– وسى قالانىڭ تۇرعىنىمىن, اينالايىن. قۇلشىلىق ەتۋ, ءدىني مەرەكەلەر, ءدىني داستۇرلەرگە قاتىستى سەنىم دەگەن ءسوزدى كوبىرەك ايتامىز. مىنا نەمەرەمە ادامعا دا, مىسالى بۇگىنگىدەي سايلاۋدا سەنىم ارتىلاتىنىن ايتىپ كەلە جاتىرمىن, – دەدى قاريا قاسىنداعى بوزبالاعا قاراپ. – سەنىم بولماي, ەل بولۋ قيىن. ەل سەنىمىن اقتاماۋ دا كۇنا دەيمىن. بۇگىنگى سايلاۋدان كۇتەرىم كوپ. سوندىقتان دا كەسەنەدە جەرلەنگەن ۇلى تۇلعالارعا قۇران اياتتارىن باعىشتاپ, بارشاعا جاقسىلىق تىلەدىم. ەل سەنىمىنە سىزات تۇسپەۋىن تىلەدىم. ەندى بارىپ داۋىس بەرەمىن.
تۇركىستان وبلىستىق اۋماقتىق سايلاۋ كوميسسياسىنىڭ توراعاسى اۋەلحان تۇرعىمبەكوۆتىڭ مالىمدەۋىنشە, وڭىردە 1 ملن 168 مىڭ 658 سايلاۋشى بار. ونىڭ ىشىندە 19 ناۋرىز كۇنى 18-گە تولاتىندارى – 91, ال 78 سايلاۋشى 100 جاستان اسقان. داۋىس بەرۋ كەزىندە وبلىستاعى 941 سايلاۋ ۋچاسكەسىندە 8 مىڭنان استام بايقاۋشى جۇمىس ىستەدى. «وڭىردە بارلىق دەڭگەيدەگى بىرمانداتتىق سايلاۋ وكرۋگتەرى بويىنشا ۇسىنىلعان 1 615 كانديداتتىڭ 1 284-ءى تىركەۋدەن ءوتىپ, سايلاۋ الدىنداعى ۇگىت جۇمىستارىن باستاعان بولاتىن. سول تىركەۋدەن وتكەن كانديداتتاردىڭ بۇگىنگى سايلاۋعا 1 131-ءى قاتىسىپ جاتىر, – دەيدى اۋەلحان ەلتاي ۇلى. – مۇمكىندىگى شەكتەۋلى ازاماتتارعا ارناپ سايلاۋ ۋچاسكەلەرىندە ارنايى بۇرىشتار ازىرلەنىپ, كابينالار ورناتىلدى, تاكتيلدى جولاقتار توسەلگەن. ارنايى پاندۋستار مەن ەكى جاقتى بەلدەۋلەر ورناتىلعان. بارلىق سايلاۋ ۋچاسكەلەرى ءبىر تۇراقتى جانە 2 جىلجىمالى سايلاۋ جاشىكتەرىمەن قامتىلعان».
وبلىستىڭ بارلىق اۋدانىندا سايلاۋشىلاردىڭ بەلسەندىلىگى جوعارى. مىسالى, قازىعۇرت اۋدانىندا اجەلەر القاسى جانە ارداگەرلەر كەڭەسىنىڭ مۇشەلەرى بەلسەندىلىك تانىتىپ, سايلاۋ ۋچاسكەسىنە ەرتە كەلسە, تۇلكىباس اۋدانىنىڭ جاس شاباندوزدارى كومانداسىمەن شاقپاق بابا اۋىلىنداعى №792 سايلاۋ ۋچاسكەسىندە داۋىس بەردى. بۇكىل الەمگە تانىمال «شاردارا ارمسپورت» سپورت كلۋبىنىڭ چەمپيوندارى دا العاشقىلاردىڭ ءبىرى بولىپ ءوز تاڭداۋىن جاسادى. ال تۇركىستان وبلىسىنىڭ اكىمى دارحان ساتىبالدى تۇركىستان قالاسىنداعى №133 سايلاۋ ۋچاسكەسىندە داۋىس بەردى. بۇل ۋچاسكەدە 2 مىڭنان استام سايلاۋشى تىركەلگەن. سونداي-اق كەنتاۋ قالاسىنىڭ تۇرعىنى, 18 بالانىڭ اناسى تۇيمەگۇل ەرگەشقىزى ت.رىسقۇلوۆ اتىنداعى 24 مەكتەپتەگى №899 سايلاۋ ۋچاسكەسىنە وتباسىمەن كەلدى. جەتىساي اۋدانى جىلى سۋ اۋىلدىق وكرۋگىندە تۇراتىن, ءبىر اۋلەتتىڭ قازىناسى, 75 نەمەرە مەن 30-عا تارتا شوبەرەنىڭ, 8 شوپشەكتىڭ اجەسى زاۋرە سەيدىمبەكقىزى دا كەلىن-قىزدارىمەن كەلىپ ءوز تاڭداۋلارىن جاسادى.
تۇركىستان وبلىسى
