الماتىداعى پاللياتيۆتىك كومەك ورتالىعىنا (حوسپيس) جاپونيا ۇكىمەتى 119 كوپقىزمەتتى كەرەۋەت سىيعا تارتتى. كۇنشىعىس ەلى الداعى ۋاقىتتا قوستاناي مەن شۋ وڭىرلەرىنىڭ اۋرۋحانالارىنا دا كومەك قولىن سوزباق.
دۇنيە ءجۇزى بويىنشا حوسپيس, ءپاللياتيۆتى كومەك, گەرونتولوگيالىق كومەكتى ەڭ كوپ كورسەتەتىن مەملەكەت جاپونيا بولىپ سانالادى. بۇل ورتالىقتار سىرقاتى اۋىر پاتسيەنتتەر مەن جاسى كەلگەن قارتتارعا ايرىقشا كوڭىل ءبولىپ, كومەكتەسۋ نەگىزىندە قۇرىلعان. ەلىمىزدە 1997 جىلدان باستاپ جاپونيا ۇكىمەتىنىڭ قايتارىمسىز كومەك كورسەتۋ ماقساتىنداعى «ءشوپتىڭ تامىرى» الەۋمەتتىك باعدارلاماسى جۇمىس ىستەپ كەلەدى. وسى 17 جىلدا اتالمىش الەۋمەتتىك جوباعا جاپونيا ۇكىمەتى 5 ملن. دوللار كولەمىندە قارجى جۇمساعان. 2013 جىلى الماتىداعى پاللياتيۆتىك كومەك ورتالىعى وسى باعدارلاماعا قاتىسۋعا ءوتىنىش ءبىلدىرىپ, ۇستىمىزدەگى جىلدىڭ 17 ناۋرىزىندا ەكى تاراپ كەلىسىمشارتقا قول قويعان بولاتىن.
ءوز كەزەگىندە الماتى قالاسى دەنساۋلىق ساقتاۋ باسقارماسى باسشىسىنىڭ ورىنباسارى ماناس رامازانوۆ اتالمىش جوبا اياسىنداعى وسىنداي اۋقىمدى سىيلىقتارى ءۇشىن الماتى قالالىق دەنساۋلىق ساقتاۋ باسقارماسىنىڭ, جالپى مەديتسينا قاۋىمداستىعى اتىنان جاپونيا ۇكىمەتىنە, سونداي-اق, بۇگىنگى شاراعا قاتىسىپ وتىرعان جاپونيانىڭ قازاقستانداعى ەلشىسى ماساەسي كاموحارا مىرزاعا العىس ءبىلدىردى.
– ورتالىقتا ەمدەلىپ جاتقان ناۋقاستاردىڭ دەنى ونكولوگيالىق دەرتپەن اۋىراتىندار جانە مەديتسينالىق قىزمەتكەرلەردىڭ كومەگىن قاجەت ەتەتىن جاسى كەلگەن ادامدار. سوندىقتان جاپونداردىڭ كورسەتىپ وتىرعان كومەگى ءپاللياتيۆتى ورتالىق ۇجىمىنىڭ جۇمىسىن جەڭىلدەتەدى. ماسەلەن, گيگيەنالىق جاعىنان, ولاردى كۇتىپ, تاماقتاندىرعاندا ۇلكەن قولعابىس بولماق, – دەدى م.رامازانوۆ.
1999 جىلى الماتى قالاسى اكىمدىگىنىڭ شەشىمىمەن ىرگەسى قالانعان قالالىق ءپاللياتيۆتى كومەك ورتالىعىنىڭ ماقساتى – نەگىزىنەن داۋاسىز دەرتكە شالدىققان ونكولوگيالىق ناۋقاستار مەن مەديتسينالىق قىزمەتكەرلەردىڭ كومەگىن قاجەت ەتەتىن جاسى كەلگەن ەگدە ادامدارعا پاللياتيۆتى كومەك, ياعني, ەم-دوم جاساۋ, اۋرۋدى سەزبەۋگە قارسى تەراپيا, كاسىبي مەدبيكەلىك كۇتىم, ناۋقاستار مەن ولاردىڭ جاقىندارىنا پسيحولوگيالىق جاعىنان قولداۋ كورسەتۋ. ەلىمىزدە زاماناۋي تەحنولوگيالاردى پايدالانىپ, جاڭا قوندىرعىلاردىڭ يگەرىلۋى سوڭعى 5 جىلدا ءتۇرلى قاتەرلى دەرتتىڭ بەتىن قايتارۋعا ىقپال ەتۋدە. قالاداعى پاللياتيۆتىك كومەك كورسەتۋ ورتالىعىندا ەم-دوم قابىلداپ جاتقان ناۋقاستار دا, مەيىربيكەلەر دە كوپقىزمەتتى كەرەۋەتتەردى ۇزاق ۋاقىت كۇتتى.
جاپونيا ۇكىمەتىنىڭ اتىنان الماتى قالاسىنداعى ونكولوگيامەن اۋىراتىن ناۋقاستارعا ارنالعان كوپقىزمەتتى توسەكپەن قامتاماسىز ەتۋ جوباسىنىڭ اياقتالۋىمەن قۇتتىقتاعان ەلشى ماساەسي كاموحارا مىرزا «ءشوپتىڭ تامىرى» باعدارلاماسى جاپونيا ۇكىمەتىنىڭ ادامنىڭ ءومىر ءسۇرۋ دەڭگەيىن جوعارىلاتۋ ماقساتىندا قۇرىلعانىن, ول ۇكىمەتتىك ەمەس ۇيىمداردىڭ, ءبىلىم بەرۋ جانە مەديتسينالىق ەمدەۋ مەكەمەلەرىنىڭ جۇمىستارىن قولداۋعا باعىتتالعانىن جەتكىزدى.
– قازاقستاندا وسى باعدارلاما اياسىندا, ياعني 1997-2014 جىلدارى 70 جوبا رەسپۋبليكانىڭ بىرنەشە ايماعىندا جۇزەگە استى, – دەدى ەلشى مىرزا. – بۇل كوپقىزمەتتى كەرەۋەتتەر ورتالىقتاعى مەديتسينا قىزمەتكەرلەرىنىڭ ناۋقاستارعا قاۋىپسىز كۇتىم جاساۋدا ۇلكەن ءرول اتقارادى. سوندىقتان دا بۇل كەرەۋەتتەر سىرقاتى اۋىر ناۋقاستاردى كۇتۋدەگى بىردەن ءبىر شەشىم بولىپ تابىلادى, سونداي-اق پاتسيەنتتەردىڭ كوڭىل-كۇيىنە جاقسى اسەر ەتەدى دەپ ويلايمىن.
شىندىعىندا دا, جاڭا تەحنولوگيامەن جاسالعان ءموبيلدى توسەكتەر ناۋقاس ادامعا وتە ىڭعايلى. دوڭگەلەگى بار, قوزعاۋعا جەڭىل. ورتالىقتىڭ اعا مەدبيكەسى نۇرجان شوتاەۆانىڭ ايتۋىنشا, بۇل توسەكتەر مەدبيكەلەر مەن كىشى مەديتسينا قىزمەتكەرلەرىنىڭ جۇمىسىن 80 پايىزعا جەڭىلدەتەدى. «ءبىز بۇرىندارى ناۋقاستاردى ءوزىمىز كوتەرەتىنبىز. قازىر كورىپ وتىرسىزدار, ەندى وزدەرى وتىرىپ, تۇرا الادى. توسەكتىڭ ەكى جاعىندا قورعانىشتارى بار. ول دا بىزگە ۇلكەن كومەك. سوندىقتان, ناۋقاس جاندارعا وسىنداي قولۇشىن سوزعان جاپونيا ۇكىمەتىنە, ونىڭ حالقىنا شىن جۇرەكتەن راحمەت ايتامىز», – دەدى ول.
گۇلزەينەپ سادىرقىزى,
«ەگەمەن قازاقستان».
الماتى.
